¹ Nandiniky ndraiky mandeha mahakasikin'gny fahoria aby ze vita teo ambany masoandro zaho. Dra ingo, gny ranomason'gny napahoria, vo ereo dra nana ndre ia ndre ia mbo hapiono anazy! Teo an-tagnan'gny papahory andreo gny hery, vo sy nisy ndre raiky aza hapiono andreo! ² Noho zay dra miarahaba gny olo maty zaho, reo ze fa maty, fa sy gny miay, reo ze mbo velo. ³ Kanefa, sambasy noho ereo ro gny olo ze sy mbo noharia, ze sy mbo nahita gny asa rasy aby ze vita teo ambany masoandro. ⁴ Vo itako fa gny asa kiraidraiky vo gny fahaiza-manao kiraidraiky dra nazary fisiriritan'gny piara-mony hasa. Zay avo koa dra ento vo fikasa hanohisy gny sioky. ⁵ Gny mola mamorisy gny tagnany sady sy miasa, ka dra gny nofony avo gny hahiny. ⁶ Fa soa loasy gny tombony raiky tana amin'gny asa mangiky noho gny ro tana amin'gny asa zay miezaky gny manohisy sioky. ⁷ Boakeo dra nandiniky mahakasikin'gny raha fahatany maro ndraiky zaho, fifanzavogna zavo maro teo ambany masoandro. ⁸ Misy gny larazan-delahy ze mitoboky raiky. Sy mana ndren ia ndre ia izy, ndre zanadahy ndre rahalahy. Sy misy fifaragna gny asany, vo gny masony sy mbo afa-po amin'gny harena azo. Nagnotany tegna izy ho: " Ho amin'ai gny hiasako fatrasy vo handavan'gny vatako gny fifalia?" Raha fahatany avo koa zay, toe-draha rasy. ⁹ Soa loasy gny olo ro miasa noho gny raiky; no mindray ereo dra afaky mahazo karama soa ho an'gny asany. ¹⁰ Fa no lavo gny raiky, dra afaky mapiary gny namany gny raiky hafa. Kanefa, gny alahelo dra magnaraky gny raiky ze reriky no fa lavo izy ka sy misy ndre raiky aza mapiary anazy. ¹¹ No ro mindray mandry, dra mety hafa ereo, fe akory gny hapafana reriky gny raiky? ¹² Gny lelahy raiky gny mety resy, fa gny ro mety afaky manohisy fanafiha, vo gny kofehy telo sy mora tapahy. ¹³ Soa loasy gny mahatra fa tanora hendry manahaky ze pazaka antisy mola zay sy mahafatasy zazy gny fomba itenoa fapitandrema. ¹⁴ Mary zay ndre nazary pazaka aza gny tovolahy raiky boakagny am-pigadra, ndre dra mbo nateraky hahatra ao amin'gny fanzakany aza izy. ¹⁵ Kanefa, zaho dra nahita gny olo aby ze velo vo mandeha ambanin'gny masoandro mandefa gny vatan'ereo magnagny amin'gny tovolahy hafa zay nisanga manahaky gny pazaka. ¹⁶ Sy misy fafaragna ho an'gny olo aby ze magniry gny hagneky gny pazaka vaovao, fa afar dra maro amin'ereo gny sy hisiriry anazy sasy. Ento vatany zay toe-draha zay vo fikasa hanohisy gny rivosy.