¹ Fa gny raha aby dra fa voatondro amin'gny fotoany, vo gny vanim--potoa ho amin'gny tanzona kiraidraiky ambany lagnisy. ² Misy fotoa ahateraha vo gny fotoa ahafatesa, fotoa hambe vo fotoa hamokara, ³ Fotoa hamonoa vo fotoa hagnasitragna, fotoa handrava vo fotoa hanangana. ⁴ Misy fotoa hitomagnia vo fotoa hihomeheza, fotoa handala vo fotoa handihiza, ⁵ fotoa hagnariam-bato vo fotoa hamoriam-bato, fotoa hamihigna olon-kafa, vo fotoa handrara gny famihigna. ⁶ Misy fotoa hitaliavan-draha vo fotoa hiegnena mitalia, fotoa hifikira amin-draha vo fotoa hagnaria anizay, ⁷ fotoa hanataha vo fotoa hanzaira, fotoa hisigna vo fotoa hizaka. ⁸ Misy fotoa hitiava vo fotoa hankalegna, fotoa hialia vo fotoa hihavagna. ⁹ Ino gny tombony azon'gny piasa amin'gny asany? ¹⁰ Fa hitako gny asa ze omen'Agnahary ho taterahin'gny olombelo. ¹¹ Fa nano gny raha aby hifagnaraky amin'gny fotoany Zagnahary. Fa napitoesy gny mandrakizay tao am-pon'ereo avo koa Izy. Nefa sy afaky hahatakasy gny asa lahibe zay nahin'Agnahary gny olombelo, hatramin'gny fetombohany ka hatramin'gny fifaragnany. ¹² Fatako fa mosy raha soa ho an'gny olo noho gny mifaly vo manao raha soa hatragny no mbo velo koa izy--- ¹³ vo gny olo aby dra tokony hihina vo hino, dra tokony hahay hifaly amin'gny soa ze boakamin'gny asany aby. Fagnomeza boakamin'Agnahary zay. ¹⁴ Fatako fa ze iaby ahin'Agnahary dra maharisy mandrakizay. Sy afaky apia zay na angala, akory Zagnahary gny fa nanao anizay mbo agnatognan'Gny olo Anazy amin'gny voninahisy. ¹⁵ Ze iaby misy dra afa nisy, ze iaby hisy dra fa nisy. Zagnahary dra nanao gny olombelo hitalia reo raha mivony. ¹⁶ Fa nahita gny faharasia ze etiky ambany masoandro zaho, zay tokony hisy gny rariny, vo eo amin'gny toeran'gny fahamarigna, dra gny faharasia gny tao. ¹⁷ Ho zaho am-po ho: " Ho sarain'Agnahary amin'gny fotoany gny olo-mary vo gny rasy fagnahy gny amin'gny raharaha vo gny asany aby," ¹⁸ Ho zaho am-po ho: " Mizaha toesy gny olombelo Zagnahary mbo hanehoa andreo ga manahaky gny biby ereo." ¹⁹ FA amin'ero dra sahala gny mahazo gny zanak'olombelo vo gny mahazo gny biby. Gny fahafatesan'gny raiky dra manahaky gny fahafatesan'gny raiky hafa. Mitovy gny fofon'ain'izy aby. Sy misy tombony ho an'gny olombelo eo amin'gny biby. Fa moa se sy fofon'ay avo gny raha iaby? ²⁰ Gny raha iaby dra samby mizotry amin'gny toera raiky. Gny raha iaby dra boakamin'gny botany, vo gny raha iaby dra hipoly botany. ²¹ Ia gny mahay na miakasy ambony agny gny fagnahin'gny olombelo vo mizoso amin'gny tany ambany agny gny fagnahin'gny biby? ²² Ka dra sapako ndraiky fa sy misy raha soa ho an'gny olo noho gny mifaly amin'gny asany, fa zay gny asa nanendre anazy. Ia gny afaky handay anazy mihery mbo hagnety ze miseho afarany?