¹ Dra gny fa avy nivavaky Solomona dra nisy afo nizoso boak'agny an-dagnisy dra nandevo reo fagnatisy oroa vo reo nandevo reo fagnatisy oroa vo reo soro, dra nameno gny tragno gny voninahis'i Yaveh. ² Sy afaky nizoso tao an-tragnon'i Yaveh reo pisoro, akory heniky gny voninahiny gny tragnony. ³ Nagnety avokoa gny vahoakin'Israely gny fa nilasaky gny afo dra teo amigny tragno gny voninahis'i Yaveh. Napekohoky gny tavany tamigny tany teo amigny rarivato ereo, nivavaky, dra nagnome fandala an'i Yaveh. Hoy ereo ho: "Fa soa Izy, fa maharisy mandrakizay gny famindra-pony." ⁴ Ko nanolosy soro ho an'i Yaveh gny pazaka vo gny vahoaky aby. ⁵ Nanolosy soro agnomby ro arivo sy ro aly vo agnondry aman'osy 120. 000 i Solomona pazaka. Ko nitokananigny pazaka vo gny vahoaky aby gny tragnon'i Yaveh. ⁶ Nisanga reo pisoro, nizoro tegny amize nanopoany aby gny sirairay; reo Levita avo koa niaraky tamireo raha magnenon'i Yaveh, ze nataon'i Davida pazaka ba hagnomeza fisora an'i Yaveh tao amigny hira manao anizahoky ho: "Fa maharisy mandrakizay gny fagnekeny mahatoky." Napagneno gny tropetrany teo agnatrehan'ereo aby reo pisoron'aby, dra nisanga avokoa gny Israely aby. ⁷ Nanoka gny agnevonigny kiaza teo anoloanigny tragnon'i Yaveh i Solomona. Teo gny nanolorany gny fagnatisy oroa vo gny tavinigny fanati-pihavana, akory gny alitara varahy ze nataony dra sy hay hifahara gny fagnatisy oroa, gny fagnatisy hohany, dra gny sabora. ⁸ Nataon'i Solomona nandrisy gny hafitoa gny firavoravoa tamizay fotoa zay, dra gny Israely aby niaraky taminazy, dra fengona lahibe vatany, hatragny Lebo Hamata dra hatragny amigny lohasakan-driaky Egypta. ⁹ Tamigny andro fahavalo dra nanao fivavaha magnetriketriky ereo, akory nihazo gny fanakona gny alitara, vo gny ferova nandrisy gny hafitoa ereo. ¹⁰ Tamigny andro fahatelo amby ropolonigny vola fahafito, dra napoly gny vahoaky tagny amigny tragnony tami-pifalia vo tamigny fo ravoravo i Solomona nohonigny fahasoava ze nasehon'i Yaveh tamin'i Davida, Solomona, dra gny Israely olony. ¹¹ Manahaky anizay gny nahavitan'i Solomona gny tragnon'i Yaveh vo gny tragnony manoka. Gny raha aby ze avy tamigny fon'i Solomona ba hatao ao atragnon'i Yaveh vo ao atragnony, dra nitaterahiny soa ama-sara. ¹² Niseho tamin'i Solomona i Yaveh gny hariva dra nizaka taminazy ho: "Fa reko gny vavakao, dra fa nifily ty toera tihoky ho anigny vatako ho tragnonigny soro zaho. ¹³ Raha atao ho magnily reo lagnisy ba sy hisianigny ora Zaho, na raha mandidy reo valala handevo gny tany, na raha mandefa arety eo amigny aloko zaho, ¹⁴ dra raha gny oloko, ze tokavy amigny agnarako, gny hanetry gny vatany, vo hivavaky, vo hitalia gny tavako, dra hiala amigny fomba rasin'ereo, dra hahare agny an-dagnisy zaho, hagnenga gny fahotan'ereo, dra hagnasitrany gny taniny. ¹⁵ Amizay dra hisokaky gny masoko dra gny sofiko hiteno soa reo vavaky ze atao ato amity toera tihoky. ¹⁶ Fa amizao dra nifily vo nanoka ty tragno tihoky ba ho eo mandrakizay gny agnarako. Gny masoko vo gny foko dra ho eo isan'andro. ¹⁷ Raha gny aminao, raha mandeha eo agnatrehako manahaky gny nandehanan'i Davida babanao hanao, makato ze nandidiako anao aby dra mitandry reo didy aman-dalako, ¹⁸ dra hametraky gny seza fiandrianigny fazakanao zaho, araky gny nizakako tao amigny fagneke raiky taminy Davida babanao, gny fa nizaka zaho ho: 'Sy ho foa amigny taranakao gny ho panapaky eo amin'Israely.' ¹⁹ Fa raha mivadiky hanao, dra mahafo reo lalako vo reo didiko ze napetraky teo anoloanao, ry raha manopo zagnahari-hafa vo mekohoky eo amin'izireo hanao, ²⁰ dra ho fongoriko hiala amigny taniko ze nameko anereo reo. Ty tragno tihoky ze natokako ho amigny agnarako tihoky, dra hariako sy ho eto agnatrehako, dra hataoko ho ohabola vo somonga eo amireo olon'aby zay. ²¹ Na dre fa soa tarehy vatany aza ty tepoly tihoky amizao, dra ho tohy vo hisioiky ze manavasava anizay aby. Hagnotany ereo ho: 'Nagnino Yaveh gny nanao anizao tamity tany tihoky vo tamity tragno tihoky?' ²² Gny hafa hamaly ho: 'Akory ereo nahafo an'i Yaveh, zagnaharin'ereo, ze ninday gny razamben'ereo hiala boak'amigny tany Egypta, dra nihazo reo zagnahari-hafa vo nekohoky tamin'ereo vo nanopo anereo. Izay gny atony nindesan'i Yaveh anizao loza aby izao eo amin'ereo."'