¹ Akoasy an'izay dra namboasy alitara varahy izy, ropolo hakiho gny halavany, dra ropolo hakiho gny sakany. Folo hakiho gny haabony. ² Nataony vy avo koa gny magnididy gny tavin-drano, folo hakiho gny molony. Dimy hakiho gny haabony, dra telopolo hakiho gny magnodidy anigny tavin-drano. ³ Gny ambinigny molosigny tavin-drano magnodidy dra nisy agnombilahy, folo isaky gny hakiho, natambasy ho raiky miaraky amigny tavin'drano gny fa vita gny tavin-drano. ⁴ Napetraky teo agnabonigny agnomby ro ambiny folo gny tavin-drano, gny telo mitoliky magnavarasy, gny telo mitoliky magnandrefa, gny telo mitoliky magnasimo, dra gny telo mitoliky magnasignana. Napetraky teo atendron'ireo gny tavin-drano, dra nifanila gny zorony efas'ereo. ⁵ Matevy manahaky gny voho-tagna gny tavin-drano, dra gny molony dra voatefy manahaky gny molosy kapoaky, manahaky gny vogninigny lilia. ⁶ Mahalany rano telo arivo bata gny tavin-drano. Namboasy koveta folo lahibe ho fanasa raha avo koa izy; nasiany dimy teo akavana, dra dimy teo akavia; fitova apesa amigny fagnatateraha gny fagnatisy oroa gny nisasa teo amireo. Gny tavin-drano koa, ba hisasan'ireo pisoro. ⁷ Namboasy reo pisy ziro volamena folo ze natao reo toromariky ho anigny sary izy; napetrany tao atepoly reo, dimy teo amigny akavana, dra dimy teo amigny akavia. ⁸ Namboasy latabasy folo izy dra napetrany tao atepoly reo, dimy teo amigny akavana, dra dimy teo amigny akavia. Namboasy koveta volamena zato izy. ⁹ Fagnapin'izay dra namboasy kiazanigny pisoro vo kiaza lahibe, dra vatrangaranigny kiaza izy; nipetahany varahy reo vatrangaran'ireo. ¹⁰ Napetrany teo amigny ilany akavananigny tragno, tagny asinagna, mitoliky magnasignana gny tavin-drano. ¹¹ Namboasy vilagny, lapely fahandroa, dra apondra famafaza i Hirama. Ko dra vitan'i Hirama gny asa ze nataony ho an'i Solomona pazaka tao atragnon'Agnahary: ¹² dra reo andry ro, kapitaly boribory ze teo ataponigny andry ro, dra fitoeranigny haingo makarakara ro ba hanarogna reo kapitaly boribory ro ze teo atapon'ireo andry. ¹³ Fa namboasy ampongabendagnisy efa-zato ho an'ireo hengo makarakara izy: apongabendagnisy ro andala isaky gny fitoeranigny makarakara aby ba hanarogna gny kapitaly boribory ro ze teo amireo andry. ¹⁴ Namboasy sangana vo koveta natao teo agnabonigny sangana avo koa izy; ¹⁵ tavin-drano raiky vo agnomby ro ambiny folo eo ambaniny, ¹⁶ reo valiny, lapely fandrofa, fizaisy, dra fitova hafa aby avo koa. Nataon'i Hirama gny matihanina tamigny varahy voalio, ho an'i Solomona pazaka, ho anigny tragnon'i Yaveh reo. ¹⁷ Nagnitriky gny pazaka teo amigny lemaky gny Jordana reo teo amigny tanimanga agnelagnelan'i Sokota vo Zaretana. ¹⁸ Dra manahaky anizay, gny namboaran'i Solomona reo fanaky aby maro be reo; sy afaky nifatary vatany gny lazanigny varahy. ¹⁹ Namboasy gny fanaky aby ze tao atragnon'Agnahary i Solomona, gny alitara volamena avo koa, dra reo latabasy ze nametraha gny mofonigny fagnatreha; ²⁰ gny pisy ziro mbamigny ziron'ireo, ze voatoka ho oroa eo anoloanigny efisy agnatiny__reo dra vita tamigny volamena malio; ²¹ dra reo vonikazo, reo ziro, dra gny lela-ziro, dra volamena malio. ²² Gny fanapaha-ziro, gny koveta, gny sotro, dra liti-kazo magnisy fagnoro avo koa dra vita tamigny volamena malio avokoa. Gny amigny fidira manoka atragno, reo vatrangara agnatiny manoka amigny toera masy faratapony dra gny vatrangaranigny tragno, ze, anigny tepoly, dra vita tamigny volamena.