¹ Tafara izay le namonjy tanagne maro naho vohitse maro isan-karazae ty Jesosy, nitalily naho nisaontsy fagnombara soa mahakaseke ty fanjakan'Agnahare. Nindre amy iareo roambefolo lahy, ² manahake o ampela ilae niafake amy ty fagnahy raty naho ty aretegne: Maria notokavigne te Magdalena, ty fa nagnakaragne kokolampogne fito, ³ Johana, valy i Koza mpandrae ty raha alakany i Heroda, le i Sosana; naho ty maro hafa iaby, zay tamy ty fanagna iareo, le nagnomey izay nilae iareo. ⁴ Naho mbe nisy ndaty maro nivory, le niavy niharine Aze ty ndaty tsikiraike boake amy ty tanàgne misy aze, le nanao fagnoharagne reke te: " ⁵ Nisy mpambole niavy hamafe ty voa'e. Naho fa reke namafe le nahazo ty sisy i lalagney ty ilae, le nivoalialia izao, le nizamane ty vorogne. ⁶ Fa ty ilae ka nifafe tamy ty vato, fe ie vaho nitiry, le nikorefotse naho fa tsy nilegne. ⁷ Ty ilae nahazo ama ty tsilo, le nindre nitiry reketse i fantikey i voa zay ndra namehe aze. ⁸ Ty ilae nahazo ama ty tane mamokatse le nagnomey vokatse soa raha tsy tantane." Tafara i Jesosy nitsara o raha maro reo, le nihorentsegne mafe Reke nanao tihoeke: "Ze managne sofigne hitsanognagne, le mitsanogna." ⁹ Nagnontane Aze i mpianae rey ty amy ty tea'e ho ambara amizao fagnoharagne zao. ¹⁰ Le hoe Reke te: "Fa nomeagne anareo ty fahafantaragne ama ty raha mietake amy ty fanjakan'Agnahare, fa hoe ty ilae le manao fagnoharagne Raho, mba tsy hahaonigna iareo ndre ty iareo mahaonigne, le tsy ho fanta iareo ndre ty rei'e." ¹¹ Le izao ty ombà i fagnoharagne zay: Ty voa le saontsin'Agnahare. ¹² Ty nifafe an-dalàgney le iareo ze naharey, fie nanjary ny kokolampogne le nandrae ze rehake tagnate ty fo'e ao, mba tsy hinoa'e le tsy ho tra-drombake iareo. ¹³ Le iareo tama ty vato rey, naho fa naharey i saontsy, le nandrae zao an-kafaleagne. Fa ie tsy misy fototse, tsiela avao ty finoa iareo, le naho avy ty fotoagne hanoagne tsokevetse iareo le ho poke iareo. ¹⁴ Ze voa nifafe tama ty tsilo zay le iareo ze naharey ty saontsy, fa naho fa nandeha amy ty lalae iareo le finehe ty varae naho ty fikaramagne naho ty raha soa amy ty tane toy, le tsy nisoa ty voa'e. ¹⁵ Fa ty voa nafafe tamy ty tane soa, le iareo naharey saontsy amy ty fo maregne naho soa, le iareo ze mitagne zao soa le namokatse zao am-paharetagne. ¹⁶ Le tsy misy ndaty mamelogne jiro, le tinako'e amy ty rako'e na hanao izao ambane fandriagna agne. Fa hanao izao amy ty toeragne fisiagne jiro, mba ho talake ty maro ze militse ty hazavagne. ¹⁷ Toe tsy misy raha avony tsy hiboake, ndra raha ahetake natao tsy ho fantatse le hiboake amy ty raha mazava. ¹⁸ Le mitsanogna soa ze managne, le mbe hotoloragne ze beibey, fie ze tsy managne ka, le ndra ty raha tama'e ho azo'e le mbe hoafahagna amae.'' ¹⁹ Niaveo ty rene'e naho ty rahalahi'e niharine Aze, fie tsy niafake ty niharine Aze noho ty hamaro ty ndaty. ²⁰ Le nisy nagnombara Aze te: "Ty reneo naho ty rahalahio miambegne Azo an-tany ao, te hahavazoho Azo. ²¹ Jesosy nanoigne iareo tihoeke: "Reneko naho rahalahiko ka ze mitsanogne ty saontsin'Agnahare naho ty manao izao." ²² Ndraike andro le nijogna amy ty sambo kede Reke reketse ty mpiana'e, le Reke nirehake izao tamy iareo tihoe: "Handeha tika hoandafy sihanakey." ²³ Le nandeha iareo. Le naho fa nandeha ingy iareo le niazon-droro ty Jesosy. Le nisy rivotse bey niavy amy sihanakey, le nifeno rano i sambokedey, le fa alokalofe ty raha loza iare. ²⁴ Le nadeha mbamae teo iareo mpianae hamoha i Jesosy, nanao tihoe: "Andriantompo! Andriantompo! ho mate ntika!" Le nifoha Reke le nirehake mafe i rivotsey naho ty onja i ranoy, le nijanogne, le nikepake soa ty tamy iareo. ²⁵ Le nirehake tamy iareo Reke te: "Aia ty finoa'areo?" le nihondrahondra ty tahotse iareo. Natahotse ro niveren-draha iareo, le nifagnontane tihoe: " Ia moa o lahio, ro ndra rano ndra ty rivotse rarà'e le mete iabike." ²⁶ Naho fa nahazo ty faritse i Gerasena, mifagnila amy ty sihana i Galilia. ²⁷ Le naho fa tambonem-bongo ey ty Jesosy, le nifanalaka amy ty lahilahy raike boake an-tanagne misy kokolampo zay. Le fa ela ty tsy nisikina'e naho ty tsy nitoboha'e agnate tragno fa lefa tan-kibory tey avao. ²⁸ Ie nahatrea i Jesosy reke, le nikorentsegne mafe agn'ampeo naho nihohoke nanao tihoeke: "Inogne ty raha ifandrambesako amao Jesosy, Ana i Andidimbonegne agne? Feregneso raho, ko ampijaleagne raho." ²⁹ Le Jesosy nandrara o fagnahy ratio hiala amy o lahio. Fa fa niela ty nahazoa'o lahy io zao, le ndre ty finatotse tamy ty rojo vigne reke handroizagna aze, le pinotepote'e iaby o rojo'o le mbe nindese ty raha amy ty tane tsy trea maso iaby reke. ³⁰ Jesosy nagnontane aze te: "Ia ty agnarao?" Le hoareke te: "Legiona," fa toe fa maro ty kokolampo nilitse amae. ³¹ Fa o kokolampo reo nangatake Amae ty tsy hagnariagne aze andavake lalike agne. ³² Le nisy lambo maro nihinagne tagnila i vohitsey. Le nangatahae i kokolampo rey Amae ty himoake amy io ao, le nimete ty Jesosy. ³³ Le niakatse tamy o lahio i kokolampo rey le nifindra tamy lambo rey, le nibaratsiake nilay ampo ty haly i lambo rey le nitonta agnate ty sihanake le nimate. ³⁴ Naho nahavazoho ty raha nisy teo i mpiraoke i lambo rey, le nivoratsake nilay naho le nitalily zao tatonda agne. ³⁵ Izao le niakatse iaby ty ndaty tan-tanàgneo hagnente zao raha nisy zao, le niharine i Jesosy iareo le nahatrea i lahy raike niakara i kokolampogney. Le i lahy nitoboke agnila i Jesosy teo, nisikigne naho fa nahilala, le nanjare natahotse aby iareo. ³⁶ Le iareo ze nahatrea izao le nitalily ty fomba nahasitragne i lahy nilira ndrekoko'o. ³⁷ Le ze ndaty fokoa iareo Gerasena le nangatake ty hisintaha i Jesosy amy iareo eo, fa nititititike ty tahotse iaby iareo. Izao le nandeha amy ty sambo kede Reke mba hafahae iareo hiheregne. ³⁸ I lahy raike niazo ty kokolampogney nangatake ty himetea'e fa hindre amae, fie Jesosy nagnirake aze nirehale izao te: ³⁹ "Miheregna an-tragno'o agne le agnombarao ze raha nisy iabike ty nataon'Agnahare amao." Le i lahy le nandeha amy ty lalae, le nitalily zao tamy ze tanàgne iabike arake ty nampanoa i Jesosy aze. ⁴⁰ Le naho fa niheregne ty Jesosy, le nandrae Aze ze ndaty tao, fa toe fa nandigne Aze ka. ⁴¹ Le ingo, nisy lahy natao Jairo zay, raike amy ty mpitarike ta Synagoga ao, le niharine naho nihohoke amy ty fandia i Jesosy, le nangataka Aze ho mbamae an-tragnoe agne, ⁴² fa ty anan-kampela'e heka'e, ampela mbe folo taogne roe ambe, lefa marine ho mate. Le naho fa nandeha amy ty lalae ty Jesosy, le nifampisisike magnodidigne Aze iaby ze ndaty tan-tanàgneo. ⁴³ Le nisy ampela raike fa nagnare ty lio'e fa agnate ty roambifolo taogne ty teo ro fa nampikintsigne ty volae iabike, [Fanamarenagne: Ze ndaty managne ty fahaia'e le nagnomey hevetse naho tokoe hampidirigne etoa ty fehen-drehake te: nampikitsigne ty volae iabike (reke)] fie le tsy nisy nahasitragne ndre ia ndre ia. ⁴⁴ Le nimbafara i Jesosy ao reke le nitsapa ty lamaba i Jesosy, le avy le nijanogne eo naho eo avao ty lio'e. ⁴⁵ Jesosy nagnontane izao te: "Ia nitsapa Ahike aniany?" Naho fa nilagne ty maro, le hoe ty Petera te: "Andriantompo, magnodidigne Azo iaby ze fonga ndaty sambe mikiteke Amao." ⁴⁶ Le Jesosy nanao tihoeke: "Nisy nitsapa Ahike, k'atao le avy le nisy hery niafake tamako ato." ⁴⁷ Naho fa nitrea i ampelay te mbe tsy takogne reke, le nititititeke naho nihohoke Amae eo. Le nifoti'e agnatrehao ndaty eo ty antoe nitsapa'e Aze, naho ty fomba avy le nahasitragna aze eo naho eo. ⁴⁸ Le Reke nirehake amae te: "O anak'ampela, ty finoa'o ro nahajangagna azo, mandena am-piadanagne." ⁴⁹ Niaveo naho mbe reke mirehakey, le nisy ndaty raike boake an-tragno ty mpitarike ty Synagoga, nanao tihoe: "Fa mate ty anak'ampelao. Ko sahiranegne sasa o mpampianatseo." ⁵⁰ Naho fa naharey izao ty Jesosy, le namale i Jairo tihoeke Reke te: "Ko matahotse, fa minoa avao, fa ho sitragne zay." ⁵¹ Naho fa nizilike an-tragno ao Reke, le nandrara ty ndaty tao tsy hisy hilitse naho tsy i Petera le i Jaona naho i Jakoba avao, le ty rae i ampelay naho ty rene'e. ⁵² Le ty ndaty tao le nisaona naho nitagny aze iabike, ⁵³ fa Reke nanao tihoeke: "Ko mitagny nareo, fa tsy mate reke fa miroro." Le nihehea iareo Reke, fa fa mate ty fafantara iareo i ajaja ampelay. ⁵⁴ Le norambese'e tamy ty fita'e i ampelay le nikoike mafe Reke, nanao tihoeke: "Anake, mifohaza!" ⁵⁵ Le niheregne ty fagnahi'e le avy le nitsangagne eo naho eo reke. Le nagnirake iareo hagnomey hanegne aze Reke. ⁵⁶ Le niverinehake ty rae naho ty rene'e i ajajay, le rinara'e Jesosy tsy hampibeobeoke zao raha nisy tao zao.