¹ Naho fa nahavita saontsy niaholo ndaty teo ty Jesosy, le nizilike ta Kapernaomy Reke. ² Le nisy kapitene raike nanagne mpitorogne izay nihasia'e, narary le fa raty zay. ³ Naho fa naharey ty talily mahakasike i Jesosy reke, le nagnirake ty lahibey Jiosy ho Amae agne, hangataka Amae ty hiavia'e hitaha ty mpitoro'e. ⁴ Le naho fa niavy tamy Jesosy eo iareo, le nilalilaly tamae, nanao tihoeke: "Evà ty hatao'o izao amae reke, ⁵ fa toe tea ty tanendraza'ay, le mbe i reke avao ka ty nagnamboatse anjomban'Agnahare ho anay." ⁶ Le nionjongne nindre amy iareo ty Jesosy. Le naho mbe ni-lavitse i tragnoy Reke, le nagnirake ajalahy i kapiteny hirehake Amae tihoeke: "Andriantompo, ko manahiragne ty vatao Rehe, fa tsy fagnevako ty izilihao amy ty tragno misy ahike. ⁷ Izao le nanao izao ty vetsevetseko te tsy fagneva ty vatako ro hiharine Azo, fa misaontsia saontsy raike le ho sitragne ty mpitorogne ahy. ⁸ Ndre raho ka le lahilahy mbe ambane fahefagne, managne miaramila mbe ambaneko avao ka. Hoa raho tamy ty raike toy te: 'Mandenà,' le mandeha reke, le amy ty raike hafa ka: 'Mbetoa,' le avy reke, le amy ty mpitoroko ka te: 'Ano'o toy' le atao'e zay." ⁹ Naho fa nahaonigne izao Jesosy, le nilatsa amae Reke, le nitolike amy ndaty maro nagnorike Aze nanao tihoeke: "Ataliliko soa anareo, fa ndre ty ta-Israely le tsy nahatreavako fiantofagne manahake zao." ¹⁰ Naho fa niheregne ta-tragno agne ze nirahegne hoagne, le nahavazoho fa jangagne soa i mpitorogney. ¹¹ Tafara izay tsy niela avao, le nandeha amy ty tanagne tokavigne Naina zay Jesosy, nindre tamy ty mpianae naho ty ndaty lahialegne. ¹² Naho fa narine ty lala i tanàgney Reke, le nisy lahy nivilasy fa nindesegne niakatse, anake lahy heka ty rene'e (fa tsy amy ty vali'e), le ndaty maro boake amy tanàgne ty nindre amae. ¹³ Naho fa nahavazoho aze ty Andriantompo, le nirotike ty arofo'e nanao tihoeke: " Ko mitagny" ¹⁴ le nanganike Reke nitsapa i vata misy i volamena ay, le nijanogne i ninday aze rey. Hoa Reke te: "Ie zao kahe, manao zao amao Raho, mifohaza." ¹⁵ Le nitsangagne i nimate'y nahavita nirehake, le i Jesosy nanese aze aman-drene'e ey. ¹⁶ Le nindra ty taho'iareo, le sambe nagnonjogne ty fisaoragne an'Agnahare nirehake tihoe: "Mpitoky bey ro natroatse ho amy tikagne eto" le "Andrianagnahare ka nitretrea ty tarira'e." ¹⁷ Ty talily mahakasike i Jesosy toy le nirey sikala a Jodia naho ty faritse iabike narine aze. ¹⁸ I mpiana i Jaona rey nitalily amae miomba o raha reo. ¹⁹ Le nitoka roe amy mpianae rey ty Jaona le nagnirake iareo ho amy i Andriantompo hirehake tihoeke: "Ihe vao linigne'o, ke mbe tokoe hagnente hafa ntikagne? ²⁰ Le naho fa niharine i Jesosy iareo, le hoe natao i lahy rey te: "Jaona mpampiandro nagniraka anay Amao atoy io hagnontany tihoe: 'Ihe vao linigne'o, ke mbe tokoe hagnente hafa ntikagne?'" ²¹ Tamy zao lera zao le nagnaha ndaty maro ama ty aretegne, toreo naho fijaleagne boake amy ty fagnahy raty Reke, le ndaty goa maro ro nampahatreave'e. ²² Nanoigne iareo tihoeke Jesosy te: "Naho fa boake amy ty lalagne nomba'areo nareo, le atalilio amy Jaona ze nioniareo naho ty nirey areo. Nahatrea ty goa, nandeha ty kepeke, nalio ty boka, naharey ty karenegne, nivagnombelo ty nimate, le nagnombaragne talily soa ze ndaty agnate ty tsy fisiagne. ²³ Haha ze ndaty tsy mijanogne miantoke Ahike amy ze kila raha ataoko." ²⁴ Naho fa nandeha ndaty nirahe i Jaona rey, le nisaontsy amy ndaty maro miomba i Jaona tihoe Jesosy: "Hagnente ino ty niakara areo andiolio agne? Bararata naezegneze ty rivotse vao? Ndra hagnente inogne ty niboaha'areo agne? ²⁵ Lahilahy nihamigne soa vao? Henteo, fa ze magnisy akanjo lafo vily naho iareo miaigne amy ty fiainagne soa fa le amy ty anjomba ty mpanjaka ao. ²⁶ Ndra hagnente ino ty niboaha'areo agne? Mpitoky vao? Eka, hoa Raho ama'areo, fa ie le mbe mandako ty mpitoky. ²⁷ Ie ro fa sinoratse tihoe te: 'Ingo, halefako hiaolo azo ty mpinday ty hafako, izay hanomagne ty lalao mialoha azo.' ²⁸ Ataliliko anareo, fa ama areo nasama ty ampela le tsy misy bey nao oharegne ama i Jaona. Fa ie ty farae kede amy ty fanjakan'Agnahare ro bey naho reke." ²⁹ (Naho fa naharey zao ze ndaty iabike, ty mpitake karatse, le nagnombara fa maregne ty Andrianagnahare, fa toe niandro amy ty fampiandro i Jaona iareo. ³⁰ Fa ie iareo Fariseo naho iareo mpahay lily Jiosy rey le nandietse ty vetsevetsen'Agnahare ho'e ty vata'iareo, fa toe tsy nampiandro i Jaona .) ³¹ "Amy ty inogne, ro mete ampanahafeko ty tarira ty ndaty toa? Manahake ty inogne igny iareo? ³² Manahake ty ajaja mihisa antsena ao iareo, zay mitoboke naho mifampitoka mirehake tihoe: 'Nitioka soly hoanareo zahay, fie tsy nitsinjake. Nibeko tama'areo zahay fie tsy nitagny nareo.' ³³ Fa Jaona mpampiandro niavy tsy nihinagne mofo naho divay, le hoe nareo te: Misy kokolampogne reke.' ³⁴ Ty Ana Ondaty niavy nihinagne amy ty mofo le hoe nareo te: 'Henteo fa mahavetse naho mpinogne Reke, ragne'o mpitake haga naho ty tsivokatse!' ³⁵ Fa ty hilala le fa voamaregne amy ty anae iabike." ³⁶ Le ty raike tamy Fariseo rey nampandroso i Jesosy hindre hikama amae. Le naho fa nilitse tantragno i Fariseo'y tao ty Jesosy, le niambesatse nikama ambone latabatse. ³⁷ Indroa nisy ampela raike tsivokatse an-tanagna eo. Naho fa nioni'e te fa niambesatse amy lataba i Fariseo'y Reke, le ninday fitovy nifeno menake magnitse reke. ³⁸ Le naho nitsangagne tafarae narine ty fandia'e reke, le nitagny nampipopoke ty ranomaso'e hahalegne ty tomboe, le finafae tamy ty volo'e naho le norokorofae, le nagnosotse zao tamy mena'e magnitsey. ³⁹ Naho fa nahatrea izao i Fariseo nampandroso i Jesosy, le nametsevetse an-troke te: "Naho toe ny mpitoky ty lahy toy, le nifanta'e te ampela manao akore o miozaoza Amae eo, te tsivokatse." ⁴⁰ Jesosy nanoigne aze nisaontsy tihoeke: "O Simona, misy raha ambarako amao." le hoareke te: "Ambarao izao, mpampianatse." ⁴¹ Jesosy nisaontsy hoe izao te: "Teo ty mpampitrosa nanagne mpitrosa roe lahy. Ty raike tokoe hagnavake lime anjato denaria, ty raike lime ampolo. ⁴² Naho fa sambe tsy nahavake izao tamae iareo roe lahe le sambe nenga'e agne izao. Naho izao, le ia amy iareo roelahe areke ro loe ho tea Aze? ⁴³ Simona nanoigne Aze nanao tihoe: "Tsy ho ny hanavake bey ie." Le hoe ty Jesosy amae te: "Maregne ty tsarao." ⁴⁴ Nitolike amy ampelay ty Jesosy le nirehake amy Simona te: "Onio ty ampela tiagne. Nilitse an-tragno'o atoa Raho, tsy namea'o rano hanasako ty tomboko, fa ie nampipopoke ty ranomaso'e handegnagne ty tomboko le namafa izao ama ty volo'e. ⁴⁵ Niavy Raho tsy norofao, fa ie le tsy nitofa ty nagnoroke ty tomboko. ⁴⁶ Rehe tsy nagnosotse diloilo ty lohako, fa ie le menake magnitse ty nosorae ty tomboko. ⁴⁷ A izao le ataliliko azo fa, ty hakeo'e lako le afake amy ty habey ty fitea'e. Fa ze nahafahagne kede, le kede hatea." ⁴⁸ Le hoa Reke amae te: "Afake ty hakeo'o." ⁴⁹ Iareo ze niaro toboke teo le sambe nifangnontane tihoe: "Ia Intoy afake magnaha hakeo?" ⁵⁰ Le hoe ty natao i Jesosy amy i ampelay te: "Ty finoa'o ro naharombaka azo, mandenà aman-kasoa."