¹ Tafara ze raha zay ty Jesosy le niboake amy iareo indraike tamy ranomasy i Tiberiasy eo. Izao ty fomba niboahae: ² Simona Petera le nindre amy i Tomasy, Didymo ty nifitokavañe aze, Natanaela boake e Kana e Galilia añe, iareo ana i Zebedio, navaho ty mpiana i Jesosy roe ilae. ³ Izao ty natao Simona Petera amy iareo: "Handeha hañarato raho." Le tihoe ty natao iareo te: "Hindre amao ka zahay." Le nandeha iareo naho le nijon-daka-kede raike, fe ie ndra lolie iareo tsy nahazo tañate ty alen-draike. ⁴ À naho fa nagararake atiñana ty andro, le nitsangañe an-dranomasiñe eo ty Jesosy, fe ie le nofy iareo mpianae te ie Jesosy io. ⁵ Izao ty natao Jesosy amy iareo: "O ry anjalahy, tsy manan-kohaneñe vinareo?" Le tihoe ty natoy iareo Aze: "Einhe." ⁶ Izao ty natao e te: "Atoraho areo andrira lakañe eo havana harato areo, le hahazo nareo." Le natora iareo harato oy naho le tsy nileo iareo jininy naho ty halako ty fiañe niazo. ⁷ Ie niavy eo, le tihoe ty natao mpianatse tea i Jesosy amy Petera te: "I Andriatompo io." Naho fa naharey ty hoe izao ty Simona Petera fa Andriatompo io, le naombe e ambonen'akanjo 'ey (fa toe tsy niakanjo reke), le nivoañe ampo ranomasiñe ey. ⁸ Tila iareo mpianatse tampo lakañe ao ( fa tsy lavitse olo 'ey iareo, fa eo amy ty roan-jato hakiho eo), naho le nitarike harato feno fiañe 'ey. ⁹ Naho fa niakatse añolo' ey iareo, le nahatrea afo nariañe ty teo navaho fiañe ty tambone eo, miharo mofo. ¹⁰ Izao ty natao Jesosy te ie: "Mindesa fiañe lako nareo amo niazo areo nareo." ¹¹ Le niakatse ty Simona Petera naho le nitarike harato oy añolo ey, feno fiañe bey; 153. Maro ty bey, fe ie le tsy niriatse haratoy. ¹² Izao ty natao Jesosy amy iareo: "Avia hitendre maraindray." Tsy nahavany nañontane Aze iareo mpianae te: "Ia Iheo?" Fanta iareo fa i Andriatompo io. ¹³ Niharine ty Jesosy, le nandrae mofo, naho nañomey aze iareo, le nanao izay avao ka fiañe 'ey. ¹⁴ Fañintelo e amy io ty niboaha i Jesosy amy iareo mpianae tafara ty fivañombeloe. ¹⁵ Naho fa boake nitendre maraindray iareo, le izao ty natao Jesosy amy Simona Petera te: "Simona ana I Jaona, tea Ahy mandako iareo viheo?" Izao ty nato Petera Aze te: " Eka Rañandria, onio fa tea Azo raho." Le tihoe ty natao Jesosy amae te: "Fahano o anondriko reo." ¹⁶ Nisaontsy fañindroe e indraike Reke te: "Simona ana i Jaona, tea Ahy viheo?" Le hoe ty Petera te: "Eka Rañandria, onio fa tea Azo raho." Hoe ty Jesosy amae te: "Toroño o anondriko." ¹⁷ Le mbe nisaontsy fañinteloe Reke te: " Simona, ana i Jaona, tea Ahy viheo? Le nikoretse fy fo Petera fa fañintelo i Jesosy zay ty nanao izao amae te: "Tea Ahy viheo?" Le tihoe ty natao amae te: "Rañandria, Ihe ro mahaoniñe ze kila raha, naho toe le onio tea Azo raho." Le izao ty natao Jesosy aze te: "Fahano o anondriko o." ¹⁸ Ambarako azo, fa mboe nikede rehe, le fa zatse nañombe irerike ty akanjo o naho le nandeha amy ze teao, fa naho fa miha-antetse rehe, le ho ndaty hafa ro hampiakanjo azo navaho hinday azo amy ze tsy zoto handenàñe." ¹⁹ Nisaontsy izay ty Jesosy mba hahafantarane te ie amy ty karazan-kavilasy manao akore ro hañomea i Petera volonahitse an' Andrianañahare. À naho nivita ty fisaontsia izay, le izao ty natao amy Petera te: "Oriho Raho." ²⁰ Nitolike ty Petera le nanatrea mpianatse tea i Jesosy nañorike iareo, ze raike niankiñe añila i Jesosy eo ka tamy fihinanañey eo le nanao izao te: "Rañdrandria, ia o raike hifotetse Azo?" ²¹ Nahatrea aze ty Petera naho le nanao tihoe amy Jesosy te: "Rañandria, inoñe o atao lahy io?" ²² Izao ty natao Jesosy amae te: "Naho zotoko ty hitoera e mandra-piaviako, le ino ty dika izay amao?" Oriho Raho." ²³ Le nibaratsiake amy iareo firahalahia e toe le tamy iareo eo ze raha zay, fa tsy mate o mpianatse eo. Fe ie tsy nisaontsia Jesosy ty Petera te tsy ho mate ze mpianatse ilae, fa tihoe te: "Naho zotoko ty hitoerae mandra-piaviako, le ino dika izay amao?" ²⁴ Ireke o mpianatse nitsangañe ho voavolombeloñe momba ze raha zay, navaho nanoratse aze, naho le fantatika fa tò ty fañambarà e. ²⁵ Lako ty raha natao i Jesosy ilae. Naho voasoratse kiraidraike aby zay, le ataoko ndra izao tontolo zao tsy ho niombe ty boke ho soratañe.