¹ Manao izay, ndao hadòn-tika ty nifotora ty hafa i Kristy le hiditse amy fahavañonañe. Ndao tika tsy hañenga indraike ty foto ty fañaliovan-kakeo noho tsy asa ty vilasy navaho ty finoañe an' Andrianañahare, ² na ty foto ty fampianarañe momba ty batisa, ty fametrahan-tañañe, ty fivañonam-belo ze ndaty nivilasy, navaho ty fitsarañe mandrakezay. ³ Hanao izay avao ka tika naho apon' Andrianañahare. ⁴ Fe ie tsy hay atao ho iareo ze fa nañazavane indraike izay, ze nañohatse ty fañomezañe hirike an-dañitse añe, ze ndrae ty Fañahy Masiñe, ⁵ naho ze nañandrañe ty saontsy soan' Andrianañahare navaho ze hery ty toñon-taoñe ho avy, ⁶ fe ie avy eo le tonta--- tsy hay ty hañereñe iareo amy fibebahañe indraike. Izay le vinono iareo ho ey teña iareo indraike ty Anak' Andrianañahare, naho le nafahae baraka ampo ty maro ao. ⁷ Fa ze tane mitroke ty orañe matete-piavy amizay, navaho ze mahavokatse ze raha mitiry paia ty ndaty niasa tane--- io ro tane nandrae fitahiañe biake aman' Andrianañahare. ⁸ Fa naho mahavokatse fatike zay, le tsy misy ipaiañe aze naho le fa añila fañozoñañe. Hiretse ty hiafara izay. ⁹ Fa izahay le miantoke ze raha fanjaka vatae momba anareo, ry longo mamy, ze raha momba ty fakonjeañe, ndre ie nirehake manahake izay aza zahay. ¹⁰ Fa toe tsy mba tsy mareñe ty Andrianañahare naho hahaliño ty asa areo navaho ty hatea natoroe anareo noho ty tahinae, fa toe mpanompo ty mpino nareo naho le mbe ho mpanompo iareo hatrañe. ¹¹ Mañiry mafe zahay ty mba haharey fahazotoañe manahake izay hatram-parae kiraidraike amareo ho anto ty fahatokisañe feno. ¹² Izay le ty mba tsy hanjarea areo kamo, fa ho mpitsokombe iareo mandova fampitamaeñe amy ty finoañe naho ty faharetañe. ¹³ Fa nampitamaen' Andrianañahare ty Abrahama, le nitatae tamy ty Teñae Reke, naho fa tsy niafake nitata tamy ty ndaty bey vatae. ¹⁴ Le tihoe ty Natao: "Hitahy azo vatae Raho, naho le hahamaro azo." ¹⁵ Tamy ze fomba zay, le nahazo ze nampitamaeñe aze tafa ty nandiñisae tamy ty faharetañe ty Abrahama. ¹⁶ Fa ze ndaty le mampitata amy ndaty bey vatae mandako vatae iareo. Isake ty tampetse ty fanointoy iareo, le misy fañekeañe raike natao ho fañamafeañe. ¹⁷ Naho fa nanampa-kevetse ty hampiboake mazava tamy iareo mpandova ty fampitamaeñe ty tsy fiova ty hasoa ty kendren' Andrianañahare, le nimeie antoke tamy ty fañekeañe zay. ¹⁸ Nanao izay Reke mba ho amy ty alala ty raha azo ovañe roe--- ze tsy hain' Andrianañahare ty handañitse amizay--- le hanañe fampiononañe mafe mba hitanañe mafe ty fatokiañe napetrake alohantika eo, tika, ze nilay mba hanañe fialofañe. ¹⁹ Manañe ze toky zay tika ho fiaro naho vatofantsike hay iatoañe ho ey ty fañahintika, fatokiañe miditse ampo ty fitoerañe añate e amboho ty lamba ao. ²⁰ Nizilike tamy ze fitoerañe zay ao ty Jesosy ho mpiaolo lalañe antika, le hanjare mpisorombey mandrakezay mañorike ty fomba ty Melkizedeka.