¹ Fa ze mpisorombey aby, finily ty ndaty, le tinondro mba hiasa amy ty añara ondaty amy ze raha momba an' Andrianañahare, le mba nanolorae fañomezañe navaho fañatetse ho ey ty hakeo. ² Afake mifañarake mora Reke amy ty tsy mahafantatse navaho ze mahery vatae satria ty ireke ambatae avao le voalily ty fahalemeañe. ³ Manao izay, ie avao ka ty tinake hanolotse soroñe ho ey ze hakeo e irerike, manahake ty natao e hoe ty hakeo ondaty. ⁴ Tsy ho aze ambate ro handrambesa ty ndaty ze volonahitse zay. Fe ie, kinanjin' Andrianañahare reke, manahake i Arona. ⁵ Le manao izay avao, Kristy tsy mboe liae nañomey hasiñe ty vatae tamy ty nifanoae ty vatae ho mpisorombey. Fe ie, ze raike nisaontsy amae zay ro nitsara te: "Anako Rehe; Ho Raeo Raho te anito." ⁶ Hoe izay avao ka ro natalilie tamy ty toerañe hafa te: "Mpisoroñe tsy tampetampetse Rehe arake ty fomba i Melkizedeka." ⁷ Tañate ty andro nofoe, Kristy nanolotse vavake navaho fangatahañe niharo tamy ty koike mafe naho ranom-pihaino an' Andrianañahare, ze raike afake nandrombake Aze zay tamy ty havilasy. Rey Reke naho ty tañie. ⁸ Ndre ie anake aza Reke, niana-dahatse tamy ze raha niaretae. ⁹ Natao ho nivañoñe Reke le niavy, ho ey ze ndaty miantoke Aze, ifotora ty fakonjeañe tsy tampetampetse. ¹⁰ Le tinondron' Andrianañahare manahake mpisorombey io Reke arake ty fomba i Melkizedeka. ¹¹ Manan-katalily tsiefa momba i Jesosy zahay, fa sarotse ty mañazava izay hatra amy ty naha-lalovañe ty ravembia areo. ¹² Fa henane zao le tokoe ho mpañanatse nareo, inareo le mbe mipay ndaty hampianatse anareo ty foto ty lily nahafan' Andrianañahare. Ronono ro paia areo, fa tsy venten-kaneñe! ¹³ Fa ze ndaty minon-dronono ririe le tsy ampe hilala amy ty hafa ty fahamareñañe, fa toe mboe nikede reke. ¹⁴ Fa ty vente-mahakama le ho ey ze bey. Iareo le niofañeñe tamy ty fañavahañe ty soa amy ty raty ty hilalae navaho ty habey iareo.