¹ Adono hitohy ty fiteavañe am-pirahalahiañe. ² Ko haliño ty mampandroso ty ambahiny. Fa amy ty alala izay, ro nampiboaha ty ilae fampandrosoañe ty anjely mone izao tsy fantae. ³ Tiahivo ze nigadra, manahake ty niharofehe tamy iareo nareo. Tiahivo ze nahaore azo, manahake iareo ka nareo amy ty vatañe. ⁴ Adono ho hajaeñe kiraidraike ty fanambaliañe. Adono ty fandrea ty fanambaliañe mba halio, fa Andrianañahare le hitsara ze mpangalatse valy ondaty naho ze tsivokatse. ⁵ Enao añe ty findesa areo ty vata areo ho afake amy ty hatea vola. Mifalea amy ze raha hanaña'reo, satria Andrianañahare le nisaontsy te: "Tsy hañenga anareo Raho ndra ty hahafoe anareo aza." ⁶ Ntao tika ho fale mba hahavany hirehake te: "Mpandrombake ahy ty Andriatompo; naho le tsy hatahotse raho. Inoñe ty hohay ondaty atao ahiko?" ⁷ Dineheo iareo mpitarike anareo, iareo ze mitalily ty Saontsin' Andrianañahare amareo, naho le vetsevetseo ty voka ty fihetse iareo. Tsokombeo ty finoa iareo. ⁸ Jesosy Kristy le tsy miova omale, naho androany, ara le mandrakezay. ⁹ Asao tsy mete taomeñe amy ze karazam-pampianarañe hafahafa. Fa soa naho hamafeseñe amy ty fahasoavam-po, fa tsy amy ty haneñe tsy mañampe iareo mandeha mindre amy iareo. ¹⁰ Manañe vato fanoan-tsoroñe tika naho le tsy anaña iareo mpanompo ty tabernakely fahefañe ty hihinañe amae. ¹¹ Fa ty lio ze biby nivonoeñe atao vokatse ho ey ze niota le nindese ty mpisorombey an-toerañe masiñe ao, añate izay ty vata iareo le oroañe alafe tobe ey ao. ¹² Manao izay Jesosy avao ro nijale alafe lalambey tanañey ao, mba hañamasiñe ty ndaty amy ty alala ty lioe irerike. ¹³ Manao izay ndao tika hiheo Amae añe alafe tobe ey ao, hinday ty hasala-barakae. ¹⁴ Fa tsy manañe ela etoy tika. Fe ie, mandiñe ze raike ho avy zay tika. ¹⁵ Amy ty alalae, naho, le ntao tika hanandratse an' Andrianañahare hatrañe, fiderañe boake boake amy ty fivimby miantoke ty tahinae. ¹⁶ Asao tsy ho haliñontika ty manao soa naho mañampe kiraidraike aby, fa amy ty fañatetse manahake zay ro mampalio arofo an' Andrianañahare. ¹⁷ Mañoriha naho mañekea ze mpitarike anareo, fa iareo ro miaro ty fañahy areo, manahake iareo hanao fañambarañe. Mañekea mba hanao izay an-kafaleañe iareo mpinday anareo, fa tsy an-kasemporañe, naho le manjare tsy misy dikae ho anareo. ¹⁸ Mivavaha ho anay, fa izahay le nino fa manañe feo fieretseretañe mañalio naho mañiry hiaiñe am-pahamareñañe ze kila raha. ¹⁹ A le asozoko nareo mba hanao izay, le mba ho tsiela ty fibaliko ama areo. ²⁰ Naho le ie Andrianañahare mpañaha, nampivañombeloñe ty bey ty mpiarake aondry, le Jesosy Tompontika, tamy alala ty lio ty fanitike mandrakezay, ²¹ le nañasoa anareo amy ze kila asa soa mba hanoañe ty zoton' arofoe. Lonike mba hiasa ampiaintika ao Reke le ho vañoñe miatreke Aze, amy ty alala i Jesosy Kristy, ze ho meam-boninahitse mandrakezay. Amena. ²² Naho le mankahery anareo, rahalahy raho, mba mba hiaretse ty rehake fampionoñañe nisorateko ho anareo. ²³ Fantaro fa nafahañe Timoty rahalahintika, hindre amako hañente anareo naho avy aloha reke. ²⁴ Ano veloma ty mpitarike anareo aby naho ze hene mpino. Iareo ze boake Italia añe le manao veloma ananreo. ²⁵ Lonike ho amareo aby ty fahasoavañe.