¹ Manao izay, satria nata ty voavolombeloñe lako arikoboñe nihoe rahiñe tika, le ndao tika hañenga ty ze favesatse iaby naho ze hakeo mora manao arikoboñe antika. Ndao tika hañiañe am-pahalisañe ty fahahiañañe napoe alohantika eo. ² Ndao hiambeñe amy i Jesosy, mpamototse naho mpañatanterake ty finoañe. Fa noho tsy hafaleañe nipetrake taolo eo, le niaretse ty hazonajale Reke, tsy nivetsevetse ty hasalara izay, naho le niambesatse ankavana ty seza fiandriañan' Andrianañahare. ³ Manao izay le dineho ty momba Aze, ze raike niaretse fandierañe nanahake ty boake amy ty mpañota handietse ty vatae, mba tsy ho vozake am-po areo ao nareo naho le hipo-kobaiñe. ⁴ Mboe tsy nandietse nareo ndra nilofo hahalietse ty hakeo hatra amy fampipohan-dio, ⁵ naho le haliño areo ty fampiononañe nampianareñe anareo manahake ty amy ty anake te ie: "Ry ana-dahy, ko ambaneñe ty lily Andriatompo, ndra mihavozake naho atoroe nareo." ⁶ Fa Andriatompo ro hanaze ze hene raha teae, naho le Ie ro manaze ty anake kiraidraike rambese e. ⁷ Mahantanteza fiajaleañe manahake ty lily. Andrianañahare le minday anareo manahake ty anae. Ty anake manao akore ty teo naho le tsy jineran-drae? ⁸ Fa naho tsy manan-dily, manahake ty anaña ty maro nareo, le anake amontoñe fa tsy anae. ⁹ Naho le, nanan-drae ara-batañe manahake ty mpanaze tika, naho niasy iareo tika. O vao tsy tokoe hañorike ty Rae ty fañahy tika naho ho veloñe? ¹⁰ Fe ie ankolafie hafa, iareo rae nanaze antika tañate ty andro tsy ampe arake ty tò tamy iareo. ¹¹ Mone izao nankolafie ilae, nanao ze soa ho antika ty Andrianañahare mba hahaiantika manañe anjara amy ty fahasiñae. Tsy misy fañasazeañe niboake ho soa, ndre ie le mangotsokotsoke aza. Fe ie ze afara kede le mamokatse vokatse feno fiadanam-pahamareñañe ho iareo ze nizarañe tamy izay. ¹² Manao izay hamafeso ty taña areo ze miraviravy naho ze ongo areo maleme. ¹³ Manoa lalam-batañe ho ey ty tombo areo, mba ze maleme le tsy ho hiboake fa ho jangañe. ¹⁴ Anjaho ty fiadanañe mindre amy ze kila ndaty, naho le ndra ia ia ka tsy hahatrea ty fahamasiñañe naho tsy mindre amy Andriatompo. ¹⁵ Miambena mba tsy hisy ndra ia ia tsy hanañe ty fahasoavan' Andrianañahare, naho le tsy hisy halake ty fangirifiriañe mitombo hiterake korontañe, mba tsy ho maro ty voloto amizay. ¹⁶ Miambena mba tsy hisy tsivokatse ndra ndaty tsy an' Andrianañahare manahake i Esao, nivarotse ty hazoke e ho ey ty haneñe raike. ¹⁷ Fa nareo mahafantatse fa naho fa afake zay, naho fa mañiry ty handova fitahiañe reke, le niliere e, satria tsy nahatrea hirike amy ty fibebahañe reke, ndra ie le hañajake izay amy ty ranomaso aza. ¹⁸ Fa nareo tsy niavy amy ambohitse tsy vany tsapaeñey eo, vohy ty afo mañoro, ieñe, faieñe, naho tioke. ¹⁹ Inareo tsy niavy amy trompetra mañeno mafe ey eo, ndra feo mirehakey ze tsy pitsanoñe aze ey le mangatake mba tsy hisy rehake hafa ho rehafeñe amy iareo. ²⁰ Fa iareo tsy hahay niaretse ze nandiliañe te: "Ndra ie biby mitsapa ty vohitse aza, le mahay tsy ho torahem-bato zay." [Fañamarihañe: Ze dikan-drehake ilae taolo le vakieñe hoe izao: "Fa ndra ie biby raike mitsapa ty vohitse aza, le mahay tsy ho torahem-bato zay na ho vonoeñe amy ty anan-tsipike."] ²¹ Fa mampatahotse loatse ty fahatreavañe ze natalily Mosesy te ie: "Matahotse raho naho le mititike." ²² Fa inareo ka, le niavy ambone vohitse Ziona ey naho le amy tanàn' Andrianañahare veloñe, Jerosalema an-dañitse añe, naho tamy iareo anjely añale e tamy ty fankalazañe. ²³ Nareo niavy eo le niheo amy ty foko ndaty niterake voalohae, ze voasoratse an-dañitse añe. Nareo le niavy amin' Andrianañahare, ie ty mpitsara ze kila raha, naho le niheo amy ty fañahy ondaty mareñe natao tsy manam-pitsikoañe. ²⁴ Niavy amy Jesosy eo nareo, ie ty mpañalalañe ty fanitike vaovao, naho tamy ty lio napoke soa vatae mandako ty lio i Abela. ²⁵ Asao nareo tsy hadietse ze raike mirehake. Fa naho tsy nilay iareo tamy iareo nandietse ty raike nampitao iareo an-tane etoy, le kede vatae ty hilaisantika naho mihodiñe amy ty raike ze nampitao antika boake an-dañitse añe. ²⁶ Indraike andro, ty feo ty fihezeñezeña ty tane. Fa henaneo Reke le nampitamae naho nisaontsy te: "Tsy ty tane avao ro hahezekezeñe indraike, fa o lañitse eo ka." ²⁷ Ze rehake, "Indraike avao" zay, le mitsakore ty fampitsahañe ze raha afake hezenkezeñeñe, izay le, ze raha namboarañe, mba hitoetse ze raha tsy hezenkezeñeñe. ²⁸ Manao izay, fa toe mandrae fanjakañe ze tsy voa hezenkezeñe, le ao soa ho mpañorike tika naho le amy ze fomba zay le hidera an' Andrianañahare am-pañajañe vatae naho an-tahotse. ²⁹ Fa ty Andrianañaharentika le afo mandevoñe.