¹ Ry Galatiana gege! Ia ty namoreke anareo? T'a imaso'areo teo ty nanehoagne Jesosy Kristy ty ankazo najale. ² Le izao avao ty raha teako ianaragne ama'areo: Nandrae ty fagnahe tami'ty asa ty lily fa tami'ty finoagne nirey'areo vao nareo? ³ Gege vatae vao nareo? Nanomboke ami'ty fagnahe nareo, le hiafara ami'ty nofotse vao hinaneke zao? ⁴ Niaretsy raha maro tami'ty tsy misy dikae vao nareo_fa naho tena sasa-poagne vatae zay? ⁵ Ireke magnomey fagnahy anareo vao naho manao asa sahàtse ama'areo le manao izay am'ty asa ty lily sa ami'ty fitsanognagne finoagne'y? ⁶ Manahake i Abrahama ''nino an'Andrianagnahare le natao zay ho hato'e,'' ⁷ le manahak'izay, fantaro, fa ze ami'ty finoagne le ana'i Abrahama. ⁸ I Soratse Masigne'y, fa naha'onigne aolo te Andrianagnahare hagnamaregne o Jentilisa'o ami'ty finoagne, le nitalily i talilisoa'y niaolo i Abrahama nisaontsy te hoeke: ''Ave amao ty hitahiagne ty tane'toy''. Le, ze ami'ty finoagne ho tahiegne mindre am'i ⁹ Abrahama, ndaty ty finoagne. ¹⁰ Iareo mitavandra ami'ty asa ty lily le voaozogne; fa voasoratse te hoeke: ''Voaozogne iaby ze tsy magneke ze fonga raha voasoratse agnate ty bokin-dily ao, naho ze manao izay.'' ¹¹ Henaneke zao le mazava fa tsy misy ndaty homeagne hato agnatrehan'Andrianagnahare'eo ami'ty alala'ty lily, satria ty maregne ho velogne ami'ty finoagne. ¹² Fa tsy arake ty finoagne ty lily, fe ie, ''Ty ndaty manao ty asa ty lily le ho velogne ami'io.'' ¹³ Kristy nagnavotse antika tami'ty ozo'ty lily tami'ty niaviae ho ozogne ho antika__fa voasoratse te hoeke: ''Voaozogne iaby ze mihantogne ami'ty hatae'' _ ¹⁴ mba hoavy am'o Jentilisa'o ty fitahia'i Abrahama ami i Kristy Jesosy ao, mba ho ami'ty finoagne ty hahazahoantika ty fampitamà ty Fagnahe. ¹⁵ Nareo rahalaheko, engao'areo raho hirehake ty fatao'ondaty. Ami'ty fifagnekeagne atao'o ndaty io, tsy misy afake magnafoagne naho manovogne ze ao, naho fa napetra'ty lily zay. ¹⁶ Fa nambara t'am'i Abrahama naho tami'ty tarirae o fampitamanagne'o. Tsy midika zay te hoe: ''ho ey ty tarira,'' manondro ndaty maro, fe ie ndaty raike avao, ''ho ey'ty tarira'o,'' le i Kristy. ¹⁷ Le izao ty teako ho rehafegne: ''Ty lily, ze niavy telo-polo naho efa-jato taogne t'afara atoy, le tsy hahafoagne ty fagnekeagne fa napetran'Andrianagnahare mialoha. ¹⁸ Fa naho avy ami'ty lily'ty lova, le fa tsy boak'ami'ty fampitamanegne sase zay. Fa Andrianagnahare nagnomey izay i Abrahama ami'ty alala'ty fagnantegnagne. ¹⁹ Inogne areke ty tea'i lily'i hiaviagne? Nasiagne zay ho ey'ty fandikan-dily, mandra-piavia-ty tarira i Abrahama ami'ty nanoagne i fampagnategnagne'y. Natao ty mpiaolo raike hanan-kery boak'ami'ty anjely ty lily. ²⁰ Fe ie o mpiaolo'o midika fa ndaty mihoatse ty raike, fe ie raike avao ty Andrianagnahare. ²¹ Mandietse ty fampagnategnan'Andrianagnahare'o vao o lily io? Sondia'e zay! Fa naho misy lily nomeigne ze afake magnomey havelo, le boak'ami lily vatae ty fahamarenagne. ²² Fa i Soratse Masegne'y nampigadra ze raha ambane ty hakeo. Nanao izay ty Andrianagnahare mba hagnomeagne ho ey ze mino ty fampagnategnagne ami'ty hamonjeagne an-tika ami'ty alala'ty finoagne i Jesosy Kristy. ²³ Taloha'ty niavia ty finoagne, le nitanagne ho andevo t'ambane ty lily tikagne, nigadraegne mandra-piboaha ty finoagne. ²⁴ Boak'eo i lily'i nanjare mpiambegne antika para ty iavia'i Kristy, mba hagnomeagne hato ami'ty finoan-tika. ²⁵ Henane zao niavy ze finpoagne zay, le fa tsy ambane ty mpiambegne sasa tinka. ²⁶ Fa inareo iaby le anan'Andrianagnahare ao ami'ty finoagne i Kristy Jesosy. ²⁷ Fa maro ama'areo ty natao batisa tami'i Kristy ao, ro nadrae i Kristy. ²⁸ Le fa tsy misy ka ndra Jiosy na Grika, ndra andevo ndra ndaty afake, ndra lahilay ndra ampela, fa raike avao nareo am'i Jesosy Kristy. ²⁹ Le naho ey'i Kristy nareo, le tarira'i Abrahama, naho mpandova arake ty fampagnantegnagne nareo.