¹ Voalohahe vata'e noho izay, le nandrisike raho fa o fangatahagne'o, vavake, fiambaneagne, naho fisaoragne le natao hoe ze kila'o ndaty iaby, ² hoe ze mpanjaka naho ze kila amy ty fahefagne eo, mba ahafahantika miaigne am-piadanagne naho miaigne milamigne amy ty toe-pagnahy arake an'Andrianagnahare naho ze kila fahendreagne. ³ Izay le soa naho azo ekegne agnatrehan'Andrianagnahare mpagnavotse antika eo. ⁴ Iri'e mba havotagne iaby ze kila'o ndaty naho avy amy ty fahafantaragne ty maregne. ⁵ Fe ie raike avao ro Andrianagnahare, le raike avao ka ro mpagnelagnelagne an'Andrianagnahare naho ty ndaty, le i lahilahy Kristy Jesosy. ⁶ Reke le nagnome ty vata'e ho vilim-pagnavotagne hoe ze kila'o ndaty, manahake ty fijoroagne vavolombelogne amy ty fotoagne toko'e ho ie. ⁷ Fe ie amy ze tanjogne zay, raho, ty vatako, le natao ho mpitory naho ho Apostoly. Mirehake ty marigne raho. Tsy mavande raho. Mpampianatse ze kila Jentilisa amy ty finoagne nahio fahamaregnagne raho. ⁸ Noho izay, teako ty lahilahy ndre ia ndre ia mba hivavake naho hanandra-tagnagne masigne tsy ama'ty habosehagne na amy ty fifandieragne. ⁹ Manahake izay ka, teako ty ampela mba hisikigne ty siky magneva ty vata'e, amy ty fahamatoragne naho ty famehean-tegna. Tsy toko'e hanao volo mirandragne, na volamena, na voahangy, na sikigne lafo vily. ¹⁰ Teako iareo hisikigne amy ze mete hoe iareo ampela ze manoro toe-pagnahy arake an'Andrianagnahare amy ty alala ze kila asa soa. ¹¹ Le toko'e hianatse am-pitsignagne naho hagneke vata'e ty ampela. ¹² Tsy engako hampianatse ty ampela na hagnampatse fahefagne amy ty lahilahy, fa hitsigne avao. ¹³ Fe ie i Adama ro niforognegne voaloha'e, vaho izay i Eva. ¹⁴ Le tsy voafitake ty Adama, fe ie ty ampela ro voafitake vata'e tamy ty tsy fagnarahan-dily. ¹⁵ Ndre izay aza, havotagne avao reke amy ty alala ty fisamahagne, naho mitohy amy finoagne naho fitiavagne le fahamasignagne miarake amy ty fampionognan-tegna ka.