¹ Paoly, apostoli'i Kristy Jesosy arake ty lilin'Andrianagnahare mpamonje antika naho i Kristy Jesosy tokintika, ² hoey i Timoty, anaky lahy marigne amy ty finoa'e ao: Fitiahian-tsoa, famindram-po, naho fiadanagne boake aman'Andrianagnahare Rae naho i Kristy Jesosy Tompontika. ³ Arake ty nangataheko mafe hata'o naho fa niala t'a Makedonia tao raho, mitoboha a Efesosy ao mba hahafaha'o mandily ze ndaty ila'e tsy hampianatse foto-pampianaragne hafa. ⁴ Tsy toko'e hitandregne ze talily naho (tetiarana) tsy misy fiafara'e iareo. Izay le niterake alihevetse fa tsy magnampy ty drafitsin'Andrianagnahare, ze amy ty alala ty finoagne. ⁵ Fitiavagne boaka amy ty fo malio ty tanjo ty lili'e, boaka amy ty feo'ty fandinehagne soa, le boaka amy ty finoagne tsy misy hasoa miatreke. ⁶ Tsy nahatratse o tanjogneo ty ndaty ila'e naho le nisintake o raha reo ho amy ty fandaharan-drehake gegegege agne. ⁷ Iareo le te ho mpapiana-dily, nefa iareo tsy mahazo ty raha rehafe'e naho hizingizigne'iareo. ⁸ Fe ie tika le mahafantatse fa ty lily le soa naho misy raike mampiasa aze amy ty ara-dalàgne. ⁹ Itika le mahafantse izay, fe ie ty lily le tsy natao hoe ty ndaty marigne, fa hoe ty mpandika lily naho ty ndaty mpitologne, hoe iareo raty fagnahy naho ty mpanota, naho hoe'o mpisandoke ho andrianagnahare reo naho tsy masigne'o. Izay le natao hoe'o ze mamono ty rae naho ty rene'e, hoe'o mpamono ndaty reo, ¹⁰ hoe'o raty fitondran-tegna ara-nofo reo, hoe'o sodomita'o, hoe'o mpitavagne ndaty mba ho andevozegne, hoe'o mpavande'o, hoe'o vavilombelogne tsy maregne'o, naho ndre ino ndre ino hafa manohetse ty fampianaragne maregne. ¹¹ O fampianaragne'o le mifagnarake amy ty talily soa'ty volonahe'i Andrianagnahare voatahe i naankigne tamako'y. ¹² Isaorako ty Kristy Jesosy Tompontika. Nampahery ahy Reke, fa nata'e matoky raho, le nifily ahy ho amy ty fanompaogne Reke. ¹³ Mpitimbo raho, mpagnenjeke, naho lahilahy marengerenge. Nefa nahazo famindram-po raho satria tamy ty tsy fahafantaragne ro nanaovako izay noho ty tsy finoagne. ¹⁴ Fa ty fahasoava'i Tompontika ro nanarogne tamy ty finoagne naho fitiavagne ze ami'i Kristy Jesosy ao. ¹⁵ O hafatse zao le azo antoke naho magneva ty kila fagnekeagne iaby, fe ie ty Kristy Jesosy le niavy t'an-tane etoy hagnavotse ze manan-keloke. Iraho ro tena niraty tama'iareo. ¹⁶ Fe ie noho ze anto'e zay ro namelagne ty heloko, mba amy ty alalako, ty bey vata'e, i Kristy Jesosy le mete haneho ze kila faharetagne. Nanao izay Reke ho ohatse hoe'o ze magniry hatoky Aze hoe'ty fiainagne mandrakizay. ¹⁷ Le hoe'ty mpanjaka'ty taogne, tsy mete mate, tsy hita maso, ty Andrianagnahare tokagne, lonike ty laza naho ty volonahitse mandrakizay doria. Amena. ¹⁸ Ze lily zao ro omeko azo, Timoty, anako, arake ze fitokiagne mahakasik'azo taloha tagne, fe ie rehe le mete hialy ty aly soa, ¹⁹ ty fitanagne ty finoagne naho ty feo ty fandinihagne soa. Tamy ty fandieragne zay, misy ty nanao sambo vaky ty finoa'e. ²⁰ Manahake i Hymeneo naho i Aleksandro, ze nomegne hoe i andrebolisy mba hampianaragne iareo tsy hitimbo.