¹ Hananeke zao mampahatsiaro anareo raho, nareo rahalahy, ty ami'ty talilisoa naho nambarako tama'areo, le niraese'areo naho ijoroa'areo. ² Ami'ty alala'izay talilisoa zay ro voataha nareo, naho mimane mafe ami'ty rehake nitaliliako t'ama'areo nareo, naho tsy ty hoe ninonino fahatane. ³ Fa natoloko ho vatan-draha voalohae ho anareo ze voarambeko avao ka: fa mate ho ey'ty hakeontika ty Kristy naho ty ami'ty Soratse Masegne, ⁴ le nalevegne Reke, le Ireke nitsangagne tami'ty mate tami'ty andro fahatelo naho ty saontsy ty Soratse Masegne. ⁵ Kristy le niseho tama'i Kefasy, le avy eo tama'iareo roa ambifolo; ⁶ boak'eo le niseho ndraike tama'iareo rahalahy mihoatse ty dimanjato Reke. Mbe velogne ty ankamaroa'iareo, fa ty ilae fa nivilasy. ⁷ Boak'eo Reke niseho tama'i Jakoba, boak'eo tama'iareo apostoly iaby. ⁸ Ty tena farae, le niseho tamako Reke, le hoe raha tami'ty ajaja terake tsy ampe volagne. ⁹ Fa iraho ty farae kede am'iareo apostoly. Izaho le tsy evae ty atao ty hoeke apostoly satria nagninjake ty fiangonan'Andrianagnahare raho. ¹⁰ Fa noho'ty fahasoavan'Andrianagnahare ro naha hoe izao ahike, naho tsy foagne ty fahasoavae amako ato. Fe ie, niasa mafe vatae noho ty ndaty iaby raho. Fe ie tsy raho zay, fa ty fahasoavan'Andrianagnahare mindre amako. ¹¹ Naho zay reke ndra izaho zay ndra iareo, ami'ty nitalilia'ay le ami'izay ro ninoa'areo. ¹² Hananeke zao naho nambara fa ty Kristy le natsangagne tami'ty mate, akore ty hahafaha'ty ilae ama'areo mirehake fa tsy misy ty fivagnoambelogne? ¹³ Fa ie naho tsy misy fivagnoambelogne, le tsy nivagnombelo ka ty Kristy; ¹⁴ le naho tsy natsangagne ty Kristy, le foagne ty fitaliliagne, naho foagne ka ty finoa'areo. ¹⁵ Ie zay, le trea ho vavolombelogne diso momban'Andrianagnahare zahay satria nijoro vavolombelogne nanohitse an'Andrianagnahare, nirehake ty ie natsangae ty Kristy naho fa tsy nanao izay Reke. ¹⁶ Naho tsy natsangagne ty mate, le ndra i Kristy aza tsy natsangagne; ¹⁷ le naho tsy natsangagne ty Kristy, le foagne ty finoa'areo naho le mbe agnate ty hakeo'areo nareo. ¹⁸ Le zay raha iaby zay mate ama'i Kristy ao naho fa montso avao ka. ¹⁹ Naho ami'toy fiaignagne toy avao ro anagnan-tikagne toky ami'ty hoavy am'i Krisy ao, le tikagne ro tena mahaferenaigne ami'ty ndaty iabike. ²⁰ Fa haneke zao le fa nivagnombelo ty Kristy, raike voaloham-boka'iareo ze nimate. ²¹ Fa satria niavy tami'ty alala ty ndaty raike ty fahafatesagne, le avy tami'ty alala'ty ndaty raike avao ka ro niavia'ty fivagnonambelo. ²² Fa hoe ty nahafatesa'ty ndaty iaby tama'i Adama, le ho velomegne ama'i Kristy avao ka ty ndaty iaby. ²³ Fe ie sambe ami'ty filaharae manokagne ty tsikiraike: Kristy, ty voaloham-bokatse, le avy eo iareo ze ey'i Kristy le ho atao velogne ami'ty fiaviae. ²⁴ Boak'eo le ho avy ty farae, naho fa hamea'i Kristy ho an'Andrianagnahare Roae ty fanjakagne. Zay le naho fa hagnafoagne ty lily iaby naho ty fahefagne iaby le ty hery Reke. ²⁵ Fa tsy maintsy manjaka Reke para-ty ametrahae ty fahavaloe iaby ambane faliae 'ao. ²⁶ Ty fahavalo farae hozamanegne le ty fahafatesagne. ²⁷ Fa "Napetrae tambane faliae ao iaby ze kilaraha." Fa voasaontsy fa: "Ireke ro nametrake ze kilaraha," le mazava soa fa tsy tafilitse agnate'izay i raike nagnisy ze kilaraha hagnorike ty vatae'y. ²⁸ Naho fa magnorike Aze ze kilaraha, le ty Anake vatae ro hagnorike i raike naho nampagnorike ze kilaraha'y ho Aze. Hiseho zay mba ho kilaraha ami'ze kilaraha ty Andrianagnahare Roae. ²⁹ Ndra ie ka inogne ty raha paiave'iareo vita batisa ho ey'ty mate? Naho tsy natsangagne vatae ty maty, nagnigne iareo ro natao batisa ho ey'iareo? ³⁰ Nagninogne areke, tikagne ro am-bava loza isan'dera? ³¹ Miatreke fahafatesagne isan'andro raho! Izay le azo antoke manahake ty fiheverako ty ama'areo, naho azoko ama'i Kristy Jesosy Tompontika ao. ³² Inogne ro tomboe azoko, boak'ami'ty fomba fahita'ty olombelogne, naho nialy tami'ty biby te Efesosy raho, naho tsy natsangagne ty maty? "Ndao tikagne hihinagne naho hinogne satria ho-mate tikagne maray." ³³ Ko mete ho fitahagne te hoeke: "Manimba ty fisaignagne soa ty naman-draty." ³⁴ Mandiniha! Miaigna am-pahamarinagne! Ko manohy aman-kakeo! Fa ty ilae ama'areo le tsy managne fahalalagne an'Andrianagnahare. Mirehake izay ho ami'ty fahamegnara'areo raho. ³⁵ Fa ty ndaty raike hirehake te ie: "Manao akory ty nivagnoambelo, le ami'ty karaza na vatagne inogne ro hahavia'iareo?" ³⁶ Tsy mahafantatse ndra inogne ndra inogne nareo! Ze hafafe'areo le tsy hanomboke hitombo naho tsy mate zay. ³⁷ Ze nafafe'areo le tsy ty vatagne naho ho avy, fa voae avao. Zay le mete hanjare vare na raha hafa. ³⁸ Fa homean'Andrianagnahare aze ty vatagne ami'ze filie'e, le sambe ami'ty vatae iaby ty voa tsikiraike. ³⁹ Tsy ty nofotse iaby ro mitovy. Fe ie, raike ty nofo'ty olombelogne, le hafa ty nofo'ty biby, naho nofotse hafa ty ey'iareo vorogne, le hafa ty bibin-drano. ⁴⁰ Misy avao ka ty vatagne an-dagnets'agny naho ty vatagne ambone tane eto. Fa karazae raike avao ty vonenahi'ty vatagne an-dagnits'agne naho hafa ty voninahi'ty ambony tane eto. ⁴¹ Raike ty voninahi'ty masoandro, le hafa ty voninahi'ty volagne, naho voninahitse hafa ty ey'ty kintagne. Fa ty kintagne raike miavake ami'ty kintagne raike hafa ka ami'ty voninahitse. ⁴² Manahak'izay ka ty fivagnonambelogne. Ze afafy le mete simba, le ze atsangagne le tsy mete simba. ⁴³ Afafy tami'ty fahafaham-baraka zay; le natsangagne am-bonenahitse. Afafy tami'ty fahalemeagne zay; le natsangagne ami'ty hery. ⁴⁴ Afafy ami'ty vatagne voajagnahary zay; le atsangagne ho vatagne ara-fagnahy. Naho misy vatagne voajagnahary, le misy vatagne ara-pagnahy ava ka. ⁴⁵ Le fa voasoratse avao ka te ie: "Lasa fagnahy velogne ty Adama lahilahy voalohae" Ty Adama raike farae le lasa fagnahy magnome fiaignagne. ⁴⁶ Fa tsy ara-pagnahy ro avy voalohae fa ty voajagnahare, le boak'eo ty ara-pagnahy. ⁴⁷ Ty ndaty voalohae le boak'ami'ty tane, namboaregne tami'ty fotake. Ty ndaty faharoa le boak'an-dagnits'agne. ⁴⁸ Manahak'iraike namboaregne tami'ty fotake, manahak'izay ka ty ndaty raike an-dagnits'agne, le manahal'izay avao ka iareo ze boak'an-dagnets'agne. ⁴⁹ Manahake ty nandesantika ty lili'ondaty fotake, le handay ty lili'ty ndaty an-dagnets'agne ka tikagne. ⁵⁰ Le izao ty rehafeko, nareo rahalahy, fa ty nofotse naho ty lio le tsy afake handova ty fanjakan'Andrianagnahare. Na ze mete simba handova ze tsy mete simba. ⁵¹ Ingo! Raha-to tsy trea ro ho rehafeko ama'areo te ie: Tsy ho mate iabike tikagne iaby, fa hovaegne iabike tikagne iaby. ⁵² Hiova tikagne ami'ty andro raike, agnate ty indraike mikipi-maso, ami'ty anjiva farae. Hagneno ty antsiva, le ze mate le hatsangagne tsy ho mete lo, le hovaegne tikagne. ⁵³ Fa toy vatagne mete simba toy le tsy maintsy hisikigne ze tsy mety lo, le toy vatagne mete mate toy le tsy maintsy hisikigne ty tsy fahafatesagne. ⁵⁴ Fa naho fa misikigne ty tsy mete simba toy vatagne mete simba toy, le naho fa misikigne ty tsy fahafatesagne toy vatagne mete mate toy, le ho avy ami'ty ty talily voasoratse te ie, "Voatelegne tami'ty fandreseagne ty fahafatesagne." ⁵⁵ "Ihe fahafatesagne, aia ty fandreseao? Ihe fahafatesagne, aia ty fitibi'o?" ⁵⁶ Ty hakeo ro fitibi'ty fahafatesagne, le ty heri'ty hakeo le ty lalàgne. ⁵⁷ Fa isaoragne an'Andrianagnahare, ty nagnomey antikagne fadreseagne ami'ty alala'i Jesosy Kristy Tompontika! ⁵⁸ Naho zay reke, nareo rahalahy, miarena soa le ko mihozongozogne. Miroboroboa manofots'andro ami'ty asa'i Tompo, satria fanta'areo fa tsy sasa-poagne ty asa'areo ama'i Tompo ao.