¹ Le mahakasike ty famoriam-bola ho ey'iareo mpino, manahake ty nanoroako lalagne ty fiangona'i Galatia, le manahak'izay ka ty tokoe hatao'areo. ² Ami'ty andro voaloha'ty heregnadro, le tokoe hanokagne raha ty tsikiraike ama'areo le hagnaja izay ami'ze vita'areo. Magnanoa izay mba tsy hisia'ty famoriam-bola naho fa avy raho. ³ Naho fa avy raho, ndra ia ndra ia orihe'areo, le alefako miarak'ami'ty taratasy mba hanolorako ty fagnate'areo ho ey'i Jerosalema. ⁴ Naho mete amako avao ka ty mandeha, le handeha hindre amako iareo. ⁵ Fa hoavy ama'areo agne raho naho fa mandalo a Makedonia. Fa handalo a Makedonia raho. ⁶ Mete afake hijanogne ama'areo raho ndra agnate ty hasara manontolo aza, mba hahafaha'areo magnampe ahy ami'ty liako, ndra aia ndra aia tane ombako. ⁷ Fa tsy magniry ty hahatrea anareo agnate ty fotoagne kedeke raho zao. ⁸ Fa magniry ty hijanogne maharetsaretse miarak'ama'areo, naho tea'i Tompo. Fa hijanogne a Efesaosy raho para-piavia ty Pentekosta, ⁹ satria fa lalagne malalake ty nisokatse ho ahike, le misy fahavalo maro. ¹⁰ Le naho fa avy ty Timoty, le imaneo mba tsy hatahotse reke mindre ama'areo, fa manao ty asa'i Tompo reke, manahake o atako'o. ¹¹ Ko engagne hisy ndaty hanao tsinontsinogn'aze. Ampeo reke ami'ty lalagne ombae ami'ty fiadanagne, mba hahavia'e amako eo. Fa magniry aze mba hindre hiarak'am'o rahalahy io raho. ¹² Le mahakasike i Apolosy rahalahentika, le nampirisik'aze mafe raho mba hamangy anareo miarak'am'o rahalahy reo. Fa mbe tsy vognogne vatae ty ho avy reke zao. Ndra te izay aza, ho avy reke naho fa mete ty fotoagne. ¹³ Miambena, mijoroa soa ami'ty finoagne, miasà manahake ty lahilahy, maherea. ¹⁴ Le anovo am-piteavagne ze raha atao'o iaby. ¹⁵ Fanta'areo ty tarimo'i Stefanasy, fa iareo reo ty niova fo voaloha'e t'a Asais, le iareo reo nametrake ty vata'iareo ho ami'ty fanompoagne iareo mpino. Le mampirisike anareo raho, nareo rahalahy, ¹⁶ mba hagnorike ty ndaty manahak'izay le ami'ty ndaty iaby ze magnampe ami'ty asa naho miasa miarak'ama'ay. ¹⁷ Mifale ami'ty viavia'i Stefaniasy, Fortinasy, naho Akaiosy raho. Nameno ty tsy naha-teo anareo iareo. ¹⁸ Fa namelombelogne ty fagnahiko naho ty anareo iareo. Le naho zay reke, fantaro ty ndaty manahak'izay. ¹⁹ Iareo fiangona'i Asia le manao veloma anareo. Akila naho Pritsila le manao veloma anareo ami'i Tompo ao, miarak'ami'ty fiangonagne naho ami'ty agnanjomba'iareo. ²⁰ Ze rahalahy iaby manao veloma anareo. Mifagnanoa veloma ami'ty oroke masigne. ²¹ Iraho, Paoly, manoratse itoy ami'ty tagnako. ²² Naho misy ndaty tsy tea i Tompo, le lonike ho voafatsy reke. Ha avy, ty Tompontika! ²³ Lonike ho ama'areo ty fahasoava'i Jesosy Tompo. ²⁴ Ho ama'areo iaby ty fiteavako am'i Jesosy Kristy ao. [Fagnamarihagne: Ty dikan-teny taloha le magnampe hoeke: "Amena. " Fa ty vaovao tsiefa ilae, agnate'izay ty ULB naho ty UDB, le magnafake izay.]