¹ Alao tahake raho, manahk'ahy mpangalake tahake i Kristy. ² Naho mitsiriry anareo raho satria mahatsiaro ahike ami'ty raha iaby nareo. Mitsiriry anareo raho satria mitagne mafe ty fombafomba manahake ty nanolorako aze t'ama'areo. ³ Le teako ho azo'areo fa Kristy ro lohala'ty lahilahy iaby, fa ty lahilahy ro loha'ty ampela, le Andrianagnahare ro loha'i Kristy. ⁴ Le magnafake voninahitse ty lohae ze lahilahy mivavake na mitoky naho misaron-doha. ⁵ Fa magnafake voninahitse ty lohae ze ampela mivavake na mitoky tsy misaron-doha. Fa tsy hafa naho mitovy ami'ty ampela magnaratse ty lohae zay. ⁶ Fa naho tsy misaron-doha ty ampela, le tokoe tampahegne ho bory ty voloe. Naho mahamegnatse ty ampela ty manampake ty voloe na ty magnaratse ty lohae, le tokoe holombofae ty lohae. ⁷ Fa tsy tokoe handomboke ty lohae ty lahilahy, satria reke ro sare naho voninahin'Andrianagnahare. Fa ty ampela le voninahi'ty lahilahy. ⁸ Fa ty lahilahy le tsy natao boak'ami'ty ampela. Fa ie, ty ampela ro natao boak'ami'ty lahilahy. ⁹ Fa tsy misy lahilahy finorogne ho ey'ty ampela. Fa ie, ty ampela ro finorogne ho ey'ty lahilahy. ¹⁰ Zay ro tokoe hanagna'ty ampela ty famantara ty fahefagne ami'ty lohae, noho ty anjely. ¹¹ Ndra te izay, ami'i Tompo ao, tsy mahaleo-tegna ami'ty lahilahy ty ampela, na ty lahilahy mahaleo-tegna ami'ty ampela. ¹² Fa naho boak'ami'ty lahilahy ty ampela, le ty lahilahy ka le boak'ami'ty ampela. Naho boak'aman'Andrianagnahare ze kila-raha. ¹³ Tsarao ty vata'areo: Mete ami'ty ampela vao ty mivavake aman'Andrianagnahare tsy misaron-doha? ¹⁴ Tsy ty voa-jagnahare vao ro mampianatse anareo fa naho ty lahilahy ro lava volo, le fahafaham-baraka hoaze zay? ¹⁵ Tsy mampianatse anareo vao ty voa-jagnahare fa naho ty ampela ro lava volo, le voninahitse ho aze zay? Fa nameagne aze ty voloe mba handombofae aze. ¹⁶ Fa naho misy te-hialy hevetse am'izay, le tsy managne fampiharagne hafa zahay, ndra ze fiangonan'Andrianagnahare. ¹⁷ Fa agnate ty torolalagne magnarake, le tsy mitsiriry anareo raho. Fa naho fa miarake miavy nareo, le tsy ho ami'ty soa zay fa ho ami'ty farae raty. ¹⁸ Fa tami'ty voalohae, le reiko fa naho fa miarako mivory am-piangonagne ao nareo, le misy fizarazaragne ty ama'areo, naho mino izay ami'ty ampahae raho. ¹⁹ Fa tsy maintsy misy fitsitokotokoagne ty ama'areo, mba hisaoragne ama'areo eo ze naho fa nekeagne. ²⁰ Fa naho fa mivory nareo, le tsy ty Fanasa'i Tompo ro hohane'areo. ²¹ Naho fa mihinagne nareo, le sambe mihinagne ty mahakamae manokagne ty tsikiraike aloha'ty hikamà'ty hafa. Kerey ty raike, naho ty hafa nanjare mamo. ²² Tsy managne tragno hihinanagne naho hinomagne rano vao nareo? Hatao'areo tsikitragno vao ty fiangonan'Andrianagnahare naho hogegea'areo ze tsy managne ndra inogne ndra inogne? Inogne ro tokoe horehafeko ama'areo? Tokoe hitsiriry anareo vao raho? Tsy hitsiriry anareo am'izay eo raho! ²³ Fa niraeseko boakam'i Tompo avao ka ze ampahafantareko anareo, fa Jesosy Tompo, tami'ty halegne nifoteragne Aze, le nandrae mofo. ²⁴ Naho fa avy nisaotse Reke, naho nanampake izay le nisaontsy te: "Intoy ty vatako, naho hoanareo. Ano'areo zao ho fahatsiarovagn'Ahike." ²⁵ Manahak'izay ka naho niraese'e ty kopy naho fa avy nikama, le nisaontsy Reke ty hoeke: Toy kopy toy ro fagnekeagne vaovao ami'ty lioko. Ano'areo zao ndra ombia ndra ombia nareo naho fa minogne, ho fahatsiarovagne Ahy." ²⁶ Ami'ty fotoagne iabike hihinana'areo toy mofo toy naho hinoma'areo am'itoy kopy toy, le magnombara ty fahafatesa'i Tompo pandra-piavie nareo. ²⁷ Ndra ia ndra ia, ty am'izay, mihinagne mofo naho minogne ami'ty kopi'i Tompo ami'ty fomba tsy fanao, le hanan-kakeo ty ami'ty vatagne naho lio'i Tompo. ²⁸ Tokoe handinike ty vatae heke ty ndaty, le am'izay le tokoe hihinagne ty mofo naho hinogne ami'ty kopy reke. ²⁹ Fa ze mihinagne naho minogne naho tsy mahafantatse ty vatagne, le mihinagne naho minogne fitsaragne ho ey'ty vatae. ³⁰ Zay ro mahavy ty maro ama'areo ho osa naho marare, le ty ilae ama'areo ho mate. ³¹ Fa naho mandineke ty vatae tikagne, le tsy ho tsaraigne. ³² Fa naho fa voasora'i Tompo tika, le mpagnara-dalàgne, mba tsy hanankakeo reketse ty tane toy. ³³ Naho zay reke, nareo rahalaheko, naho fa mivory mba hihinagne nareo, le mifandignasa. ³⁴ Naho misy ty ndaty raike keregne, ndao reke hihinagne an-tragno agne, am'izay naho fa mivory nareo le tsy ho ami'ty fitsaragne zay. Le mahakasike ze raha hafa sinora'areo, le hagnomey torolalagne raho naho fa avy.