¹ Teako ho fanta'areo, ry rahalahe, fa iareo roaentika le t'ambane ty rahogne ao iaby naho namakivaky i ranomasegney. ² Ty ndaty iaby le natao batisa ho ama'i Mosesy t'agnate rahogn'ao naho t'agnate ranomasegne, ³ le ty ndaty iaby le sambe nihinagne hanem-pagnahy mitovy. ⁴ Ty ndaty iaby le ninogne tami'ty lamilamim-pagnahy naho nagnarake iareo, le Kristy zay lamilamy zay. ⁵ Fe ie ty Andrianagnahare le tsy nagnomey hato'o ty ankamaroa'iareo, le ty fate'iareo le naparitake t'antane liolio agne. ⁶ Hanane zao o raha reo le ohatse hoantika, mba tsy hagniriantika raha raty manahake ty nipaia'iareo. ⁷ Ko manompo sampy, manahake ty ilae t'ama'iareo. Izay le manahake ty voasoratse hoeke: "Ze ndaty nitoboke mba hihinagne naho hinogne, le nitsangagne hihisa." ⁸ Ndao tika tsy holakofilagne, manahake ty natao'ty maro t'ami'iareo. T'agnate ty raik'andro, le ndaty telo arivo sy roa alegne ty nimate noho'ty am'izay. ⁹ Ndao ka tika tsy hitsapa i Kristy, manahake ty natao'ty maro t'ami'iareo naho zinama' ty menaragne. ¹⁰ Ko mimonomonogne ka, manahake ty natao ty maro t'am'iareo naho zinama'ty anjeli'ty fahafatesagne. ¹¹ Le zao raha zao ty nisy t'ama'iareo mba ho ohatse ho antika. Nisinoratse mba ho fampianaragne antika o raha'reo__ho amantika naho niavia'ty fara-andro. ¹² Naho zay reke le ze mihevetse ty vatae fa mitsangagne mahitsy mitandregne soa mba tsy hitonta. ¹³ Tsy nisy fakam-pagnahy nahazo anareo naho tsy iraisa'ty olombelogne iaby. Fe ie ka, Andrianagnahare le matoky. Tsy hagnenga anareo ho alaim-pagnahy mihoatse ze zaka'areo Reke. Miarake ami'ty fakam-pagnahy le hagnomey anareo ty lalagne hisiragne avao ka Reke, mba hahafaha'areo miaretse izay. ¹⁴ Naho zay reke, ry longoko, mandosira lavitse ty fanompoan-tsampy. ¹⁵ Mirehake anareo manahake ty ndaty manan-tsaigne raho, mba hahafaha'areo mitsara ze rehafeko. ¹⁶ Ty kapoa'ty fisaoragne naho isaorantika, ie vao zay tsy fiharoagne ami'ty lio'i Kristy? Ty mofo naho vakientika, ie vao zay tsy fiharoagne ami'ty vata'i Kristy? ¹⁷ Satri raike avao ty mofo, tikagne maro ka le vatagne raike avao. Tikagne iaby le mandrae ami'ty mofo raike avao. ¹⁸ Henteo iareo vahoa'i Israely: ie vao iareo ze mihinagne ty fagnatitse tsy mpandrae anjara am'o alitara eo? ¹⁹ Inogne areke ty horehafeko? Te ie tsy misy dikae zane ty sampy? Sa ty mahakama naho natao fagnatetse tami'ty sampy ro tsy misy dikae? ²⁰ Fa mirehake ty raha atao'iareo Jentilisa manompo sampy fagnatetse raho, fa ame'iareo ho'ey ty kokolampogne o raha' reo fa tsy an' Andrianagnahare. Tsy teako nareo ho mpitraoke ami'ty kokolampogne! ²¹ Tsy afake minogne ty kopi'ty Tompo naho ty kopi'ty kokolampogne nareo. Tsy afake mitraoke ami'ty lataba'i Tompo naho ty lataba'ty kokolampogne nareo. ²² Sa manao ze hampamarahy i Tompo vao tikagne? Mahere ta'ireke vao tikagne? ²³ "Ty raha iaby le ara-dalàgne, "fa tsy ty raha iabike ro mahasoa. "Ty raha iaby le ara-dalàgne, " fe ie tsy ty raha iaby ro mampivoatse ty ndaty. ²⁴ Tsy misy tokoe hipay ty tombontsoae manokagne. Fe ie, ty tsikiraike le tokoe hipay ty tombotsoa'ty ragne'e. ²⁵ Afake mihinagne ze raha avarotse an-tsena ey nareo, fa ko magnontane ty vetsevetse. ²⁶ Fa "Ey'i Tompo ty tany, naho ze kilaraha misy amae'eo." ²⁷ Naho misy tsy mpino mitoka anareo hikama, naho magniry ty handeha nareo, le hano ze raha misy aloha'areo eo naho ko mandefa eretseretse ami'ty sai'areo. ²⁸ Naho misy mirehake ama'areo hoeke: "Toy hanegne toy le boak'ami'ty fagnatetse ami'ty mpanompo sampy, " le ko mihinagne izay. Zay le ho'ey'ty nampahafantatse anareo, naho ey'ty fieretseretagne. [Fagnamarihagne: Ty dikan-teny taloha ilae le magnampe hoeke: "Fa ty tane naho ze raha amae le ey'i Tompo. "Fa ty dikan-teny soa vatae le tsy misy izay. ] ²⁹ Tsy mirehake raho te ie ty fieretseretao manokagne, fa ty fieretsereta'ty ndaty hafa. Fa nagninogne ty fahaiako ro tokoe ho tsarae'ty fieretsereta'ty hafa? ³⁰ Naho mandrae anjara ami'ty hanegne am-paksitrahagne raho, nagninogne ro tevatevahegne ami'ty nagnomezako fisaoragne? ³¹ Naho zay reke, ndra mihinagne ndra minogne nareo, ndra inogne ndra inogne atao'areo, le ano'areo ho vonenahin'Andrianagnahare iabike. ³² Ko magnomey fagnafitohignagne ty Jiosy ndra Grika, ndra ty fiangonan'Andrianagnahare. ³³ Miezake ty hahafale ty ndaty iaby ami'ty raha iaby raho. Tsy mipay ty tombontsoako raho, fa ty ey'ty maro. Ataoko zay mba ho voavonjy iareo;