¹ Naho namana, mpifehe ty tafike ty mpanjaka i Syria, le lahilahy bey vaho bey hasy eo amaso ty tompone, satria tamity alalane ro nagnomeza Yaveh faharesea i Syria. Lahilahy matanjake, bey herim-po avao kea re, kanefa boka. ² Nandeha niakatre isan-tokone reo Syriana naho nangalake ajampela kele raike bakao amity tane Israely. Nanompo ty valy ty nama re. ³ Hoe ty ajampela tamity tompovavene hoe:" Enga anie mba hiarake amity mpaminane ze agne Samaria ty tompoko! Naho hagnafake ty tompoko amity haboka re." ⁴ Ka nindeha ty Namana naho nirehake tamity mpanjaka ze nirehafe ty ajampela kele bakagne amity tane Israely. ⁵ Le hoe ty mpanjaka Syria hoe:" Mindehana amizao, naho hampinday taratasy ho ahy ty mpanjaka Israely raho." Lasa ty Namana naho ninday talenta volafoty folo, volamena enegnarivo, vaho akanjo fisoloa folo niarake tamine. ⁶ Ninday ty taratasy ho ahy ty mpanjaka israely avao kea ra ze nirehake ty hoe:" Laha fa ente aminao ty taratasy toy, le ho hisanao fa nandefa i Namana mpanompoko aminao raho, mba hagnafahanao aze amity habokane." ⁷ Laha fa bake namaky ty taratasy ty mpanjaka Israely, le nandrovitre ty akanjone re naho nirehake ty hoe:" Feie vao Zagnahare raho, ka hamono na hemelo, ro mipay ahy hagnafake lahilahy amity haboka ty lahilahy toy? Hoe ty mpiay hifandietre amiko re." ⁸ Ka laha fa rey Elisa ty lahilahin'Agnahare fa nandriatre ty ankanjone ty mpanjaka Israely, le nandefa rehake tagne amity mpanjaka re nanao ty hoe:" Nagnino ro nirovitenao ty akanjonao? Engao re hamonje ahy amizao, le ho haine fa misy mpaminane ao Israely." ⁹ Ka avy niarake tamireo soavalene vaho kalesena ty Namana naho nitsanga teo ambaravara ty tragno Elisa. ¹⁰ Nagnirake mpinday talily tagne amy Elisa, nanao ty hoe:" Mindehana naho ampandro impito ao amy Jordana ty vatanao, le hihere amity lalane ty nofonao; halio riha." ¹¹ Fa meloke ty Namana naho lasa ka nanao ty hoe:" Ingo, nataoko fa hiakatre hamonje ahy re naho hitsanga vaho hikaike ty agnara Yaveh Zagnaharene, naho hagnofahofa ty tagnane amity toera ka hagnafake ty habokako. ¹² Feie Abana vaho Farpara, renerano i Damaskosy, tsy soa kea naho ty rano iaby ao Israely? Tsy afake miandro ao amireo vao raho le halio?" Le nihere re naho lasa amin-keloke. ¹³ Bakeo reo mpanompo Namana niharine ka nirehake tamine ty hoe:" Ry raeko, laha nandily anao hanao zaka-sarotre ilane ty mpaminane, feie tsy nanao zay vao riha? ka vaho maike fa , laha fa mirehake tsotra anao re ty hoe:' Ampandro ty vatanao le halio riha?" ¹⁴ Bakeo le nindeha nizotro re naho nampandro ty vatane impito tao amy Jordana, nanenke reo torohevetre ty lahilahin'Agnahare. Nihere manahake ty nofon-kolo ndraike ty nofone, naho sintra re. ¹⁵ Nihere tagne amity lahilahin'Agnahare Namana, re vaho reo mpiray lia tamine iaby naho nitsanga teo agnoloane. Hoe re ty hoe:" Ingo, haiko amizao fa tsy misy Zagnahare magnera ty tane laha tsy ao Israely avao. Laha zao, raeso ty fagnomea bakamity mpanomponao." ¹⁶ Fa Elisa namale hoe:" Laha mboe velo kea ty Yaveh, ze eo agnoloa ro hitsanganako, le tsy handrambe na ino ino raho." Nampirisike Elisa mba handrambe ty fagnomea i Namana, fa nilietse re. ¹⁷ Laha zao le hoe Namana ty hoe:" Laha tsy zay, le mangatake aminao raho mba hagnomea ty mpanomponao tane ampe zaka ty ampondra roe, satria manomboke zao, le hagnomea fagnatetre oroa na soro ho an'agnahare hafa sase ty mpanomponao laha tsy Yaveh. ¹⁸ Ao mba hamela heloke ty mpanomponao Yaveh amity zaka raike toy, le zao, laha fa militse ao antragno i Rimona ty mpanjakako mba hanompo ao, naho mitehe amity tagnako re le mihohoke ao antragno Rimona raho, le enga anie Yaveh mba hamela heloke ty mpanomponao amize zaka zay." ¹⁹ Le hoe Elisa tamine ty hoe:" Mindehana ampiadagna." Le lasa ty Namana. ²⁰ Nindeha halavira fohe avao re, laha fa nirehake tamine ty Gehazy mpanompo Elisa ty lahilahin'Agnahare ty hoe:" Ingo, le fa namindra arofo ty Namana iaze Syriana ty tompoko tamity tsy fandraisa reo fagnomea ze nientene tegne antagnane. Laha mboe velo kea ty Yaveh, le hagnorike aze raho naho handrae zaka bakamine." ²¹ Laha zao le nagnorike i Namana ty Gehazy. Laha fa nahisake ndaty nilay tao afarane ty Namana, le nitseka nizotro tamity kalesene re mba hanalaka aze naho nanao ty hoe:" Mete vao ty zaka iaby?" ²² Le hoe Gehazy ty hoe:" Mete iaby ty zaka iaby. Nirahe ty tompoko raho, nanao ty hoe:' Ingo, nisy ajalahy roe bakamireo ana ty mpaminane niavy namonje ahy bakagne amity vohitre Efraima. Miangavy rie mba ameo talenta volafoty raike vaho akanjo hisoloa roe iereo." ²³ Namale ty Namana hoe:" Fale bey raho magnomea talenta volafoty roe ho anao." Nandrisike Gehazy ty Namana naho namehe talenta volafoty roe tao agnate kitapo roe, niarake tamireo akanjo roe hisoloa, naho nametrake reo tamity roe tamireo mpanompone, ze ninday reo kitapom-bolafoty nialoha Gehazy. ²⁴ Laha fa avy tao amity tazoa i Gehazy, le nangalake reo kitapom-bolafoty tegne antagna iereo re naho nagnaja reo tao antragno; nalefane reo lahilahy, ka lasa iereo. ²⁵ Laha fa nilitse Gehazy naho nitsanga nagnoloa ty tompone, le hoe Elisa tamine ty hoe:" Bakaia riha, ry Gehazy?" Namale re ty hoe:" Tsy nindeha taia na taia ty mpanomponao." ²⁶ Hoe ty Elisa tamy Gehazy ty hoe:" Tsy niarake taminao vao ty fagnahiko laha fa nihodike tamity kalesene mba hanalaka anao ty lahilahy? Andro fandraesa vola vaho akanjo, tanen'oliva vaho tanem-boaloboke, agnondry vaho agnombe, naho mpanompo lahy vaho vave vao zao? ²⁷ Laha zao le ho aminao vaho ty fokonao zisikezay ty haboka i Namana." Ka niala tamity fiatrehane ty Gehazy, boka foty manahake ty havandra.