¹ Naho ty valy ty raike tamireo ana ty mpaminane niavy nitagny tamy Elisa, nanao ty hoe:" Mate ty valiko ty mpanomponao, naho hainao fa ty mpanomponao le natahotre Yaveh. Amizao ty mpampindram-bola le avy hangalake reo anako roe mba ho mpanompone." ² Ka hoe ty Elisa tamine:" Ino ro azoko atao ho anao? Ambarao ahy ino aby ro fanagnanao antragnonao ao?" Naho hoe re:" Tsy mana na ino ino laha-tsy diloilo raike tavoara ty mpanomponao antragno ao." ³ Naho hoe Elisa:" Mindehana mindra siny agne amireo mpiraike mone aminao, siny tsy misy na ino ino." Fara ze maro hindrame. ⁴ Bakeo le tsy maintsy militre ao agnatene riha naho mirindrim-baravara ao riha vaho reo ananao lahy, naho mandraraha diloilo ao amity siny iaby; naho atokano reo siny ze feno." ⁵ Ka niala Elisa re naho nirindrim-baravara re vaho reo anane lahy. Niente iereo tamine ao reo siny, ka finenone diloilo reo. ⁶ Laha fa feno ty siny, le hoe re tamireo anane:" Andeso siny hafa raho." Fa hoe ty anane tamine:" Tsy misy siny sase." Le tsy nirarake sase ty diloilo. ⁷ Naho avy re ka nirehake tamity lahilahin'Agnahare. Hoe re ty hoe:" Mindehana, avilio ty diloilo; aloavo ty trosanao, naho ivelomo miarake amireo ananao lahy ty sisane." ⁸ Ndraike andro ty Elisa nindeha tagne Sonema agne amize hitoboha ty ampela manan-danja raike; tinaone hiraike sakafo amine re. Naho isake ty handrio re, le hijano ka hisakafo ao. ⁹ Hoe ty ampela tamity valine:" Ingo, mahatsapa raho amizao fa re le lahilahy masin'Agnahare ze mandrio zisikagne. ¹⁰ Ndao tika hanao efetre kele ambone riha ho ahy Elisa, ka hasiantika fandrea agnatene ao, latabatre, seza, naho jiro. Ka laha fa avy eto amintika re, le hijano eto." 11Naho avy ndraike ty andro le nijano tao ty Elisa, nitoboke tao amity efetre re naho nangalake harerake tao. ¹² Hoe ty Elisa tamy Gehazy ty mpanompone:" Kaiho io Sonemita ao." Laha fa baka nikaike aze re, le nitsanga teo agnoloane. ¹³ Naho hoe ty Elisa tamine:" Rehafo amin-drampela hoe:' Le fa nimbetoa amizao hasahira iaby zao riha mba hiahy anay. Ka ino ro azo atao ho anao? Afake misolo vava anao agne amity mpanjaka na agne amity bey ty tafike vao zahay?"' Le namale re hoe:" Miharo mipetrake amity vahoake raho." ¹⁴ Ka hoe ty Elisa:" Ino zane ro azontika atao ho aze?" Le namale Gehazy ty hoe:" Eka mare, tsy manan-gnanake re, naho le fa antetre ty valine." ¹⁵ Ka namale Elisa ty hoe:" Kaiho re." Laha fa baka nikaike aze re, le nitsanga teo amity varavara. ¹⁶ Hoe ty Elisa:" Amity andro hoe zay, afake heren-tao, le hitrotro ajalahy riha." Ka hoe rampela:" Aha, ry tompoko vaho lahilahin'Agnahare, ko mavande amity mpanomponao." ¹⁷ Fa ty tao magnarake avao rampela le nibevoka naho niterake ajalahy, arake ze le fa nirehafe Elisa tamine. ¹⁸ Laha fa nihabey ty kolo, ndraike andro le nindeha niarake tamity raene, ze niarake tamireo mpihaza re. ¹⁹ Hoe re tamity raene:" Ty lohako, ty lohako." Le hoe ty raene tamity mpanompone:" Andeso agne amity renene re." ²⁰ Laha fa nangalake aze vaho ninday ty ajalahy tagne amity renene ty mpanompo, le nitoboke teo ampitrotroa ty kolo zisike-pitaotaovovogna naho mate bakeo. ²¹ Ka nitsanga ty ampela naho nametrake ty ajalahy teo amity fandrea ty lahilahin'Agnahare, nagnily ty varavara, naho niakatre. ²² Nikaike ty valine re, naho nanao ty hoe:" Mba andefaso raike amireo mpanomponao vaho raike amireo ampondra rie raho mba hahafahako mindeha tsiela agne amity lahilahin'Agnahare naho hihere bakeo." ²³ Le hoe ty valine:" Nagnino riha ro te-ho agne amine amizao? Tsy tsinam-bola na Sabata zao." Ka namale re hoe:" Tsy magnino rie." ²⁴ Le nasiane lasele ty ampondra raike naho hoe re tamity mpanompone ty hoe:" Ampindehano malaky; naho ko mindeha mora laha tsy mirehake raho." ²⁵ Ka nandeha rampela naho niavy tao amity lahilahin'Agnahare tagne amity vohitse Karmela. Naho laha fa nahisake aze bakalavitre ty lahilahin'Agnahare, le nirehake tamy Gehazy mpanompone re hoe:" Ingo, avy ty ampela Sonemita. ²⁶ Milay malaky mba hanalaka aze vaho hitalily amine ty hoe:" Milamy vao ty aminao vaho ty valinao naho ty ananao?"' Le namale re ty hoe:" Milamy soa." ²⁷ Laha fa niavy teo amity lahilahin'Agnahare tagne ambohitse rampela, le nitanane ty tombone. Namonje i Gehazy mba hangalake aze kanefa hoe ty lahilahin'Agnahare ty hoe:" Engao re, fa tohy vatane, naho nahaja Yaveh tamiko ty hasahira, naho tsy nirehake na ino ino tamiko." ²⁸ Le hoe rampela:" Nangatake anake taminao vao raho, ry tompoko? Tsy le fa nirehake vao raho hoe:' Ko fitahe raho'?" ²⁹ Le hoe Elisa tamy Gehazy:" Miakanjoa ho agne le vaho ento amity tagnanao ty teheko. Mindehana agne antragnone. Laha mifanoje amity ndaty riha, le ko manalama aze, naho laha misy ndaty manalama anao, le ko mamale aze. Ateheno eo amity tarehe ty kolo ty teheko." ³⁰ Fa ty rene ty kolo nanao ty hoe:" Laha velo kea ty Yaveh, naho laha velo kea riha, le tsy hiala anao raho." Ka nitsanga ty Elisa naho nagnorike aze. ³¹ nialoha malaky iereo ty Gehazy naho nametrake ty tehe teo amity tarehe ty kolo, nefa tsy nirehake na naharey ty kolo. Ka nihere tagne amy Elisa ty Gehazy naho nirehake tamine hoe:" Mboe tsy nifoha ty kolo." ³² Laha fa avy tao antragno Elisa, le mboe mate teo ambone fandrea ty kolo. ³³ Ka nilitse tao Elisa naho nirindrim-baravara tao re vaho ty kolo ka nivavake tamy Yaveh re. ³⁴ Nitsanga re naho niroro teo amity kolo; nametrake ty sognine teo amity sognine, ty masone teo amity masone, naho ty tagnane teo amity tagnane. Namototre ty vatane teo amity kolo, ka lasa nafana ty vata ty kolo-lahy kele. ³⁵ Naho nitsanga Elisa naho niherehere tao amity efetre naho niakatre ndraike ka namototre ty vatane teo ambone ty kolo-lahy kele. Nihevo-impito ty ajalahy naho namoha ty masone. ³⁶ Ka nikaike i Gehazy ty Elisa naho nanao ty hoe:" Kaiho ty Sonemita!" Ka le nikaike aze re, naho laha fa niavy tao amity efetre re, le hoe Elisa:" Alao ty ananao." ³⁷ Le nagnohoke ty vatane teo amity tane teo amity tombone re naho nandohaleke teo amity tane, ka nangalake ty anane le niakatre. ³⁸ Naho nihere tagne Gilgala ndraike Elisa. Nisy kere tao amity tane, naho nitoboke teo agnoloane reo ana ty mpaminane. Hoe re tamity mpanompone:" Anovo eo amity afo ty siny bey naho mahandroa hane ho ahy reo ana ty mpaminane." ³⁹ Nizotro tagne ambaibo mba hangalake legioma ty raike tamiereo. Nahisake voaloboke le re naho namory tagnatagnamanga le mba hamenoa ty moron-tombo ty akanjone. Tinampatampake naho natao iereo tao amity hane zay, nefa tsy nahay ty karaza zay iereo. ⁴⁰ Ka namoatre ty hane mba ho hane reo lahilahy iereo. Afake kele, laha teo am-pihinana iereo, le nikorake mafe nanao ty hoe:" Ry lahilahin'Agnahare, misy mahafate ao ambelagne!" Ka tsy afake ty hihina zay sase iereo. ⁴¹ Fa hoe Elisa ty hoe:" Mindaisa koba." Nanorake zay tao agnate valagne re naho nanao ty hoe:" Voaro ho ahy ty ndaty zay, mba hihina iereo." Ka tsy nisy zaka mahafate sase tao ambelagne." ⁴² Nisy lahilahy raike bakagne Bala-salisa nimbaeo amity lahilahin'Agnahare naho ninday mofo vita tamity vare hordea roapolo vaho hinaza, naho salohim-bare vaovao tao agnate kitapone. Hoe re:" Ameo ireo ndaty toa mba hahafaha iereo mihina." ⁴³ Hoe ty mpanompone:" Ino ro hagnomeako zay reo ndaty zato?" Fa hoe ty Elisa hoe:" Ameo ty ndaty toa, mba hahafaha iereo mihina, satria Yaveh nanao ty hoe:" Hihina iereo naho hagnisy sisane." ⁴⁴ Ka nagnomea zay iereo ty mpanompone; le nihina iereo, naho nisy sisa tavela, arake ty reha ampagnategna Yaveh.