¹ ''Kwahavizya wa shivanza sha mwa Efeso we umusimbilaje: 'Amazwi ga wuyo we alemile inzota 7 munyove yakwe indilo havili we akujenda pakasi pavilema nyale vya golidi 7, ² ''Imanyile imbombo zyaho, nivyahayikungule vyaho, havili nukuteshela kwa kujimbilila kwaho, havili utangavatetela vala ve vavivi, lole uvayezizye ve vakuyiyanga ukuva va positili lole tevevavo, havili uvazile venevo ukuva valuma ilenga. ³ Ujimbilileyenye umwa kuteshela havili unyamuye izina lyane, pe utalisite. ⁴ Nkandi zye nkukupilia ine zye ulesile ishikunzi shaho ishitanzi. ⁵ Ukumbuhaje lelo pe wamile kufuma pe wagwiliye. Upinduhaje havili uvombaje imbombo intanzi. Peka peka pe wapinduha, ndiyinza kwiwe havili ndiyefya ishilema nyale kwiwe kufuma pa vuyo vwakwe. ⁶ Lole uli nasho ishi: she uzipasite imbombo zya va Nikolayiti, zye nine nzipasite. ⁷ Lewa we ali nikutwi we atejelezye zye umupepo akuvivuzya ivivanza. Uno wenga akupota uvulugu we ndimupa ukulya izya mwikwi lya vulanzi, lye lili mwa Paladisi wa Mulungu.''' ⁸ ''Kwahavizya wa shivanza sha mwa Efeso we umusimbilaje: 'Amazwi ga wuyo we mutanzi havili wavumalilo, uno we afuye havili ahinza kuva mulanzi: ⁹ ''Ngamanyile amayimba gaho nuvupina vwaho, nkandi we dumbwe. Ngamanyile amatona ge vakukutona ve vakuyitaha veva Yuda, nashenga tevevavo. Ve vamwasinagogi lya setano. ¹⁰ Mutahanyile zye muliyimba. Yenya! usetano ava kuvasumba vamo mwimwe mujele ukuti mulingwaje, havili muliyimvilwa kumasiku 10. uvanje we musuvaliwa ukufiha nakuvufwe, havili pe ndikupa impumpu ya vulanzi. ¹¹ Leha uno we ali namakutwi, we ayivwe kuzye umupepo wukuyanga kuvivanza. Uno wenga akupota uvulugu we uvufwe vwa vuvili vutali munanga.''' ¹² ''Kwa havizya wa shivanza sha mu Peligamu we umusimbilaje: 'Amazwi ga wuyo we ali nupanga umuhozu konti konti: ¹³ ''Ine manyile kwe mukwihala, kula kwe ishitengo shavumwene isha setano shili. Lye iwe ulemeleye nkani izina lyane. Manyile ukuti utaluhanile ulwitiho mumwane, mwope namunsiku zya Antipa uhome wane, umusuvalilwa wane, we vahamugoga pakasi palimwe, kula kwe usetano akutendama. ¹⁴ Nkandi ndili nazyo zimo nyinsi izya kukususya: Mwe mula imwe muli navo vamu ve vazilemile nkani ivimanyisyo vya Balaki, we amumanyisizye uBalaki ukusumba ishipunulo pantanzi pa vana Yisilayeli ukuti valye ivya kufinjila ku malungu nukuti vavembuhaje. ¹⁵ Inza vunuvu, muli navo vamu ve valemile nkani ivimanyisyo vya Nikolayiti. ¹⁶ Pinduha, ilelo! Pala utanga vomba vunuvu, pe ndiyinza luvilo kukwaho, havili ndilwa nawo nupanga wa mwilomo lyane. ¹⁷ Leha uno we ali nikutwi, we atejelezye zye umupepo akuvivuzya ivivanza. Kuno we akupota uvulugu, we ndimupa umana wumo uwa kukwilu, pe ndimupa nivwe izelu poka nizina ipya lye lisimvilwe pimwe, izina lye nawumo we alimanyie nkandi wuyo weka we akuliposhela.''' ¹⁸ ''Kwa havizya wa shivanza sha mu Tiyatila simba: 'Aga ge mazwi ga mwana wa Mulungu, we aminso gakwe gali ngati moto we wukwaha havili ivinama ngati shijela she shikulama: ¹⁹ ''Nzimanyile imbombo zyaho; nishikunzi nulwitiho nu vuvombezi nu kutehama kwaho ukwakujimbilila. Manyile ukuti vye wavomba shinishi vilusizye vye uhavomba pa vwandilo. ²⁰ Nkandi ndinasho ishi isha kukususya: Ukumutetela umwantanda u Yisibeli, we akuyitaha weka ukuva mukuvwi umwantanda. Ukujendelela muvimanyisyo vyakwe akuhopela ava vomvi ukuvomba uluvembu nukulya ivya kulya vye vafinjiye ku malungu. ²¹ Nkamupa uwene ahavalilo hakupinduha, nkandi atakwanza ukupinduha kuluvembu lwakwe. ²² Yenya! Ndikusumbila iwe pashitala sha vavinupe vala ve vavembusile nawo mumayimba amapiti nkani, peka peka avene vapindushe ku mbombo zyakwe. ²³ Ndivahomanjila avana vakwe vafwe, pe ivivanza vyonti vilimanya ukuti nene ne nkulondolezya insivo namoyo. Ndivapa ku wonti uwimwe ukuyanga nimbombo zyinyu. ²⁴ Nkandi mwevonti imwe muli mu Tiliyatila, ku wonti we atakushilema ishimanyisyo ishi havili vatakuvimanyaga vye vamu vakuvyita vintu ivyivizu ivya setano- kwimwe nkuti, 'Ntakuviha umuligo uwamwavo piwe.' ²⁵ Muhavele honti uhondeye ulemansye nkani ukufishila pe ine ninza. ²⁶ Uno we akupota nukusunga imbombo zyane ukufishila ku vumalilo, kuli wuyo ndimupa uvulamulili munsi yonti. ²⁷ 'Alivalajila avene nindisa yashijela, ngati nsonta zya ivumba mwe alizibazulania mutuzande.' ²⁸ Inza she ine nkaposhela kufuma kwa Tata wane, havili nine ndimupa uluzota lwa nzanchi. ²⁹ Leha uno we ali nikutwi, we atejelezye zye umupepo akuvivuzya ivivanza.'''