¹ Woka uwavahavizya 7 we alemile imbiga 7 ahinza nukuyanga kuline, ''Nzaga, ine kwe nkakulanjizye ulunanjiho ulwa muvembu umupiti nkani we atendamiye aminzi aminji. ² Na wuyo we avamwene ava munsi vavomvile uluvembu, pe nipele ilya luvembu lwakwe nave vakutendama munsi vahozilwe.'' ³ Pe uhavizya anyamuye ine mumupepo ukuvala mulugwa, nkamwenya umwantanda atendime pa shinyamana she shavulaye she shizuye namazina aga musamu. Ishinyamana shali namatwe 7 nimpembe 10. ⁴ Umwantanda azyaye ivya muhola we ashemamiye havili ayiyemvizye nu golide, namavwe aga pamwanya, nu vwambo. Uwene alemile kunyove yakwe ishikombe (ulupindi) isha golige she shizuye nivintu ivyakuhalazya ni vinyazu ivya luvembu lwakwe. ⁵ Pasheni shakwe pasimvilwe izina lye lyali nukusula kwakwe kwe kwavwamile: ''U Babeloni umupiti nkani, umama uwu vavembu nivintu ivya kuhalazya ivya munsi.'' ⁶ Nkenya ukuti umwantanda ahozilwe amavanda aga vantu avafinjile ava Mulungu na mavanda aga ve vahamufwila uYesu. Lwe ine namwenya uwene, nasukuminye nkani. ⁷ Nkandi uhavizya ahayanga kuline, inkulinganie ukusula kwakwe kwe kuvwamile ukwa mwantanta nizya shinyamana she shimunyamuye wuyo, ishinyamana she shili namatwe 7 nimpembe10. ⁸ Ishinyamana she washivwenyi shipuma, ishi teshipuma, shipalamiye ukuzuva ukufuma mushiliva she shitapeleleye (kuvuzimu). pe ishene shiliva kulunanjiho. Vala ve vakutendama munsi, vala ve namazina gavo gatasimvilwe mwa kalata uwa vulanzi ukufuma kwe vashenya ishinyamana, mwe pe shalipo lumo, nishi shitalipo havili shikwinza. ⁹ Ishi shikwitizya insivo izya njele. Amatwe 7 magamba 7 ge umwantanda atendamiye. ¹⁰ Avene havili ve vamwene 7. Avamwene 5 vaguye, woka akujendelela, na lwe afiha, ahondeye asyalishile kuhavalilizyo ahansi. ¹¹ Ishinyamana she shalipo lumo, nishi shitalipo, she uwene we mumwene uwavu 8 vala 7 nukuvala kulunanjiho lwakwe. ¹² Impepo 10 zye vazivonyi veva mwene 10 ve vala ve vashili ukuposhela ishinamwe, nkandi avene valiposhela uvulamulili ngati ve vamwene kuhavalilo hoka poka nishinyamana. ¹³ Ava ve vansivo yoka, pe vakupa amaha gavo nuvulamulili ku shinyamana. ¹⁴ Ilelo pe valilwa uvulugu nu mwana wa Ng'onzi alivipota ivwene mwe pe uwene mupiti uwa vapiti wu Mwene uwa va Mwene- navala ve ali navo vitwa, na vagolosu vala.'' ¹⁵ Uhavizya ahayanga kuline, ''aminzi ge vagavonyi, pala pe umuvembu atendime, vali vantu, nimpuga, ninsi, ninjango. ¹⁶ Impembe 10 zye vazivonyi- izyene nishinyamana vili muvenga umuvembu. ivyene vilimuviha wuyo ukuva weka nishitali, vilimumilula umuvili wakwe, uwene valimupemba nzila nawe moto. ¹⁷ She uMulungu ashivisile mu moyo gavo ukufisya ukwanza kwakwe pakwivwana ukupa amaha gavo aga kushilajila ishinyamana ukufiha gakwanilisiwa. ¹⁸ Umwantanda we vamuvonyi nkaya impiti ye yili namaha ukulajila pa vamwene ava munsi.''