¹ Bapaanga ba guzolo, gimi gimbaana nudu sameene bisi mutulu Ndaga-Nzaama yimana mwamaga ande gulumu mu bihene gimbaana ndebunu buyi salamana gugele bini; ² dudoogo gu miogo mi baada bafa bana bama kono lugwigili. ³ Duya sa mudimi ni Nzaama wunu wuya gugusu ndaga yiga dodoga, buga nuseleene mapimi, buga nugebe mu kebe ga baada bafa, lowo banu gidi gimi, ⁴ bunwa sala gisala pimi ndebunu buduya nuloomo mu gusala. ⁵ Duya nulomeene ni Nzaama gadwalasa mu nzili gwana midimi mibini ande mu guganga midimi. ⁶ Bini bapaanga, gebaana ande muudu wunu wuya wingisi gisaga-saga mu gukono gulaba mapaana madu nulongo bisi, ⁷ bini beene nuyaaba budu gele bisi mu kebe gabini, lowo ni mu gisaga-saga, ⁸ lowo dusala nuwa bugogo bu gudia gubisi, asi dusala mu pasi pibi ande mooso. ⁹ Lowo guya leesege ni lowo duma faana mu gunu wa bugogo bubisi, ¹⁰ nuyaba ni ludu gele mu kebe gabini, dunu longa ni muudu wunu wuya kono guzolo gusala gisala, gakono gudia gwana se. ¹¹ Duya wugu ni mu kebe gabini gwigi ande baada baya kono guzolo gusala gisala, baya wingisi gisaga-saga ande mapaana mapamba-pamba, ¹² duya baloomo ni bawesele gifu gini, basalaaga gisala, balu disaaga biwi beene. ¹³ Bini bapaanga, nukono guwoono mu gusalaaga mapimi. ¹⁴ Ni gwigi ande muudu wuya kono gulaba mapaana madu nusonogeene mu kebe ga mugaana, numu si misi, nukono gubambagana we nde, gawugu gwana nsono; ¹⁵ gumu menge lowo, asi numu ludigeene, gigi paangabini. ¹⁶ Meeme Poolo, yitu nuwa mbodo gu miogo, gini gigi gidimi gi migaana mi meeme mimiosogo miyi sonogaaga. ¹⁷ Nzaama mungaa dalalaa, ganu dululu midimi, ganu dele mu disi lwana lupimi, ¹⁸ daanga lulwosogo galaana pwede ndebunu bwigi guzolo gwana mu kuuma-Mfumabisi Yesu.