¹ Bapaanga ba yizolo, mutula bufugu bunsugu ande gimvugu gibisi we nde, muudu gakono gunu bwisi si bitsi mu mapaana ma bupala ² ni lowo ma gisaga-saga ni lowo si mu mugaana ni lowo manungu maba madodo ni mabisi. gebaana bakono gunu doneene, ³ ni daanga lunu luma gugu bunwini mono bidimi, ⁴ ndeege mfuma-bupala bugini dumaaga baada baana mu gumu lumusu ni gigi Nzaama yataa bimi bibiosogo, bubini musaamaaga mu kebe ga manzo ma Nzaama, gini lusa ndeege ni gigi nzaama. ⁵ Bunuya wibigi ni buyi nuleele luyi gele gunu? ⁶ Dalaana loolo gimi giya muganga nzili, gigaya lameene mu gwiyi mu daanga lwana, ⁷ gigi ndebunu buga gene Nzaama ni daanga luma gugu, lwini doogo gimi gini gimu gangaga nzili. ⁸ Muudu mufa giniya duugu mu ngolo yi Sadana, ⁹ giniya doneene baada bana bakono gugabeene Paana Yipimi yi Mfumu Yesu ni bahulugu, gini salaaga bipa bi gifande gifa bi bupala, ¹⁰ asi Yesu bugini muzwa gu mbawa yi gono lunde. ¹¹ Nzaama gaya bawa baada bana bakono guyabeene nzili yi Yesu, ¹² mutulu baguumunu mapaana mana ma bupala, bakono guhulugu, babege duumbu. ¹³ Bapaanga ba guzolo, duya mudoono hoso daanga Daada Nzaama mutulu wunu soolo duugu luyanaga ni bunwini hulugu mu mapimi mabini ande Muhungaana ande lugwigili lubini, ¹⁴ ndelunu wunu demene mu gulaba Paana Yipimi mutulu nuwingini mu mugieme wu Mfumabisi Yesu. ¹⁵ Bapaanga ba guzolo, galaana ngolo lugwigili lubini ande gulaba mapaana mamosogo mayi nulongo mu gono lubisi ande mu migaana mibisi. ¹⁶ Mfumabisi Yesu wunu zolo ande Gidaabisi Nzaama banu we ngolo mu midimi ande gusa mudimi, ¹⁷ ande gunu dala mu disi lupimi, nusalaaga mapimi ande guduusaaga ndaga Yipimi gugele baada.