¹ Me Polo, apostolo e Kristu Yezu oshin oyileang Nzeam, ti otwung osu Timonte, ² sitifugna wandimi mpe atwung asu ne lukwikilu e Kristu atsangia ne Kolosi. Ngrasya ti ngemba e Tea Break eyi la gnu. ³ Sikeara nsag na viye na Nzeam, Tea e Nkum esu Yezu Kristu, mpe silesami ntangu enkum djwi na gnu. ⁴ Sitiyug lukwikilu egnu na Yezu Kristu ti bolingo egnu e vear ankum emison wo djwi na Nzeam. ⁵ Olagni na bolingo ewo djwi na etura emitsug gnu ne vii awuo amowumagniwo ne dzug. Omiyugagni vii awo ntangu eyolongagniwo Otuba o viavi Oshong Owuo. ⁶ Oshong Owuo oyikum etay egnu, oyiwur mbuma mpe oyipeagn buu opfugn. Etay egnu mpi eli ko oshin omog, yum eshuu eyiyug gnu Otuba Owuo mpe eyolongagniwo na masonga vii alir ngrasya e Nzeam. ⁹ Djwi na oleang owo, yum eshuu eyiyugsu oshong one, sipitsu ndem ve na nsama djwi na gnu. Sileling na Nzeam oyuragni na ontiegn ti na wagn o Mpeve djwi ojiagni vii ankum aleangnde. ¹⁰ Silesami djwi oyiagni na epier eleang Nkum mpe esosepelisa ne vii ankum. Silesami djwi opuragni etshia ewuo eshin n'eshin mpi ofweagni n'oshin ognu onjia Nzeam. ¹¹ Silesami djwi Nzeam olendisagni na biuu o nkembo ende djwi oyiagni na molende mpi otshungagni itura ne vii ankum. Silesami djwi okearagni na kiese nsag na viye ya Tea Nzeam, eyikii nde okugagni mvey ikab i mambote eyikabelinde wasantu ne wia e mwinda. ¹³ Nde wur eyiselimi n'ekub e mpib mpe eyiseshwer n'ekub e Mon nde e nsiya. ¹⁴ Simivug djwi na Mon nde, ndug wur emiseveye ndolula i masumu. ¹⁵ Mon ali ignigning i Nzeam epitsuwo ngyen. Ali ekelamu e nteang ne vim ankum ayikii Nzeam. ¹⁶ Vim ankum amikelamawo djwi na nde, ne dzug ti ne buu, vim atsangyen wo na epitsuwo ngyen. Yug wampeve wali ne nkway ekub, wali na lukumu, wali n'ekub ti na biuu, vim ankum nde wur eyikii mpe vim ankum akelamiwo djwi na nde. ¹⁷ Ali ne nteang e vim ankum, ye vim ankum agnim djwi na nde. ¹⁸ Ali ote o djung, djung eli dibundu. Ali luyantiku mpe wur enteang emifutumuka n'ewa djwi ayi Nkum e vim ankum ayikelami. ¹⁹ Djwi na wo, Nzeam s'oyurinde na bunzambi ende opfugn, ²⁰ ye djwi ne mbug e Mon vim ankum akey ngyokana na Nzeam ndemie. Nzeam amikeara ngemba ne mbug alung ande ne kulunsi. Nzeam atikeara ngemba kati e vim ankum ti nde ndemie, eyi vim ali le buu, to eyi vim ali le dzug. ²³ Ye gnu mpi, ne nyangu emog akabwanignu na Nzeam ye akumgnu wambeni inde djwi na vii apwo ankum abanzikignu mpe akikignu. ²² Kansi opean, ne mbug e ewa e djung i Kristu, Nzeam atikeara kimpangi kati egnu ti nde. Akinde ngwign djwi okumagni wasantu ne viy ande, okwon ngyagni na bifu mpi na ipwo ata emog ye ekwon ngya va vear esofugnagni djwi na vii apwo. ²¹ Yo yina ofwetagni nsatsuga ne lukwikilu, satsugagni etura ku n' evug eyolakelagniwo n'Oshong Owuo oyiyug gnu. Oyatsugagni etura itay ikiy ve. Ene eli Oshong Owuo oyilong wo wur enkum eyikiiwo ne buu. Me Polo mikum mon otshia o Oshong Owuo onagn. ²⁴ Opean, nde na kiese djwi na mpay ileyenme djwi na gnu. Ye me ku ndalungisa ne djung ime vim ayizangi ne mpay iyiyen Kristu djwi na djung inde eyi Eklezia to Dibundu. ²⁵ Ntikum wur otshia e Dibundu e Nzeam, n'oshin omimpea Nzeam otshia ondongagni Otuba o Nzeam opfugn. ²⁶ Ene eli djwi i sekele eyiziyi Nzeam avear wamvwe na wamvwe. Kansi opean atiyegnewo na vear akwikila wande. ²⁷ Nzeam alingnde angyegne kimvwama mpe nkembo e diswekamo ene n'ekiri enkum e buu. Diswekamo ewo eli : Kristu ne kati egnu, nde asopeagninde kivuvu e mviya nkembo e Nzeam. ²⁸ Eli Kristu elelongsu. Silekebisi vear ankum mpi silalong na wagn ensign djwi wakum wasantu a djwidjwi ne Kristu. ²⁹ Djwi na wo ndekii mpe ndelwi mpi ndepii djung inkum n'otshia owo oshin o biuu ti kikesa otshia elekii ne kati eme.