¹ Yug otikie ishia y'okristu omuu, opikug mfugn djwi iwo ve ne nteang e zuzi eli ompakana. Veara djwi iwo ne nteang iwur iyi akristu, iyi Nzeam amatsug n'ikir djwi na nde ndemie. ² Ofwete ndjiagni gnugnun eli su vear ali sa Nzeam vear ayasamisa okir to buu. Yug ayasamisagnu okir eshu emog, ofwetagni nkug ngwong eman iwu ikiag kiag. ³ Ofwete ndjiagni gnugnun ayasamisagnu wanzio ! Djwidjwi okug nsamisagni vii a luzingu ene. ⁴ Ye yug olagni n'oshur djwi na vi a luzingu ene, atsagnu mvey wazuzi ampakana djwi na ngwong ewu elir akristu. ⁵ Ndatuba ngwign djwi na ngyegne oshin nge efwetegnu ngyug nsogn gnu gnemie. Efwete ngya na wur emog kati egnu eli n'ontiegn djwi na nkug ngwong ashia asikug mpwe kati atwung asu akristu ampeam ti ankear. ⁶ Kansi asiyen gnu akristu amu kati egnu watitsa mfugn akristu amu ne nteang e tibinali e wasivili ye ondimagni nde zuzi eli ompakana awong djwi iwo ! ⁷ Yug oli n'oshur ya otwung omu, eling ntuba nde okakie ve vim eanafwete yie nkie. Pea mbug ya otwung omog ompeam to onkear djwi avey ondii oyie mpe osiange tibinali. ⁸ Ondi onkie ngwign, gnu olevaragni vii oshin opwo mpe vear aledjim gnu wali atwung agnu ampeam n'ankear. ⁹ Ojiagni gnugnun vear apwo wapayavea ekub e Nzeam ve. Oyakwikilagni vear anagn ve yug wamiyia onkabagni vii akiy. Vii a djwidjwi eli nde vear alekii kindumba, vear alesami biteke to alesambili wur ikiy n'ondi o Nzeam, vear aledjag lusilu eyikiiwo ne libala, vear alepii djung ne vii apwo alir akey, vear aleang ntshib djung ampeam n'ampeam mpe ankear n'ankear, ¹⁰ vear alekami wumu, vear amileang ekr ensign, vear amileang vean, vear adjim mpe akusila atwung, mpe vear adjim mpe akuma vear amu vim, vear anagn ankum wapayavea ekub e Nzeam ve. ¹¹ Amu ne kati egnu akiikiwo vii anagn. Kansi gnu Nzeam amoyogagni, amolimagni masumu, amotsugagni n'ikir djwi na nde ndemie, amokumisagni vear awuo ne nteang ende. Amikie vii ankum ane ne mbug e biuu o Nkum Yezu Kristu ti e Mpeve e Nzeam esu. ¹² Vear amu waletubi ngean : Nde na nswa e nkie vim enkum eleang me, djwi nde nkikangama ma Kristu. " Djwidjwi, kansi djwi inkum emipeawo nswa epilag ve nde eli na mfunu djwi na me. " Nde na nswa e nkie vim enkum eleangme - kansi mpaleang ve konso vim ekum nkum eme. ¹³ Vear amu ko waletubi wuwun " Vim a nda akiiwo djwi na ipfugn to djung i wur , ye djung i wur akiiwo djwi na vim a nda - kansi ko sisep ene, Nzeam ayadjag nde vim ankeape, vim a nda ti djung i wur. Kieleka, vear waletubi mingi djwi na lwong etamvur vear. Kansi Nzeam akakie djung isu djwi na kindumba ve. Ye djung eli djwi na nsadila Nkum, ye Nkum asisadisande djung. ¹⁴ Nzeam afutumusinde Nkum Yezu l'ewa, ye ayafutumusande su ko na biuu onde djwi zizingi dyaka. ¹⁵ Ofwete ndjiagni nde djung ignu ili ikab i djung i Kristu. Asikugsu mvey ikab i djung i Kristu djwi na ntshib na ntsug ondii omog na djung onkear o ndumba ? Kaku ve. ¹⁶ Jiagni gnugnun wur enkum emikangama nda onkear o ndumba atikum djung imog na nde. Eli kesi oshin etuba Masonama djwi na libala : " Wankeape asikum wo osugn omog." ¹⁷ Ye vear ankum asikangama wa Nkum asikum wo mpeve emog wa nde. ¹⁸ Yo yina yug oling nkie disumu e bizumba, ling mpila e nkim etey n'eviang enkum ! Vear atsawontuba wuwun " Disumu enkum etsankie wur aliwo ne lien i djung, kansi wur ekie disumu e akey, akie disumu ne kati e djung inde ndemie. ¹⁹ Ofwete ndjiagni gnugnun djung ignu eli evuru, tempelo e Mpeve Santu eli na kati egnu. Nzeam opeagninde Mpeve Santu ende ye opean djung ignu epa eli dyaka djung ignu gnemie ve. Djung ignu ili i Nzeam. ²⁰ Nzeam amoshumagninde n'isu ininen, isu i luzingu e Mon nde. Yo yina, peagni osiang ya Nzeam ne vim ankum akiegnu ne kati e djung ignu i vear.