¹ Me, Polo, wur efugn onkian one. Sositene, ewur esu ne lukwikilu, ali nendien ndame, ntangu efugn me onkian owo. Nzeam aleangnde ngii emog e wantumwa i Yezu Kristu ye anson nde djwi mosadisi. ² Onkean one oli djwi na evur e Nzeam eli le Kolinto, djwi na vear ankum amison Yezu Kristu djwi na Nzeam, ti wur enkum, ondii onkum olinde, emivye Nzeam djwi osadili ne dzin i Nkum esu Yezu Kristu, Nkum ewo ye Nkum esu. ³ Nzeam, Tea su ti Nkum esu Yezu Kristu waloleangagni ye walopeagni ngemba. ⁴ Atsame nkeara Nzeam eme nsag na viye ntshu inkum djwi na gnu, djwi na olwi o ngrasia emopeagni Yezu Kristu djwa ayoleangagni. ⁵ Kristu amopeagni vim ensign. Amosadisagni gnu na ntuba masonga inde ye na ndjia Nzeam. ⁶ Gnu gnemie, along awo amosiamisagni biu n'oshin oletubignu vii alir Kristu. ⁷ Nsambila djwi na gnu oshin oli kaku ata kabu emog eyum na Mpeve Santu e Nzeam emikwon gnu ne ntangu ekwung gnu eshuu e Nzeam eyakumisande Yezu Kristu Nkum ye eyoyegnende n'avear ankum. ⁸ Nzeam ayakiende ko okumagni biuu ne mpila nde osadilagni tii ne nsuka, oshin onagn, gnu gnemie opayayiagni ata n'ipwo imog ve eshuu e Nkum Yezu Kristu eyakeande ne buu. ⁹ Nzeam ayakukisande vii ankum emiwongnde na nkie. Nzeam amoviagni, yo yina s'emiveagnu mpila e ndjia ti ndeang Mon nde, Yezu Kristu, eli Nkum esu. ¹⁰ Atwung ame, ngwigna na gnu le dzin i Nkum esu Yezu Kristu, na ngia ko n'otuba omog n'odzum, na nkwon ngia na bokabwani kati na gnu. Yiagni n'etura ti na ngindu imog ne vii ankum akiegnu, mbiy ayayen gnu nde ne mulimo, oledjiagni ko vim oshin omog. ¹¹ Avear o Klowe ankabiwo wuwun otinamagni akab akab ne kati egnu. ¹² Djwi ili kog. Konso wur ne kati egnu aleling ngiug ko longi ende. Wur na wur aletubi n'oshin onde. Emu ndenden, " Me, ndadjie ko Polo." Emu ndenden, "Me, ndadjie ko Apolosi."Emu diaka ndenden, "Me ndedji Petro." Mbiy wur ensuka ndenden, "Kansi me, ndedji Kristu." Kansi Kristu wapikug n'ombag akab akab ve. Wakakwog Polo ne kulunsi djwi na gnu ve. Wur eyopeagni mbotika akopeagni mbotika le dzin i Polo ve. ¹⁴ Ndakeara nsag ne viye ya Nzeam djwi n'oshin oyipime mbotika ko na ndambu e vear fioti n'endien; kati ewo Krispusi nda Gayusi. ¹⁵ Epa eli djwidjwi ve nde apime vear anagn mbotika ne dzin ime. ¹⁶ (Opean ndakana memen apime mbotika ko ya vear opeang o Stefanasi, kansi djwi na vear amu, mpikani diaka ve nde apime mbotika ya vear amu akiy ne Kolinto). ¹⁹ Yo yina, vear aletsu ewa djwi na vii a Nzeam wapikug ndjia along a kulunsi. Kristu awinde ne kulunsi djwi na wo, kansi oshong o kulunsi kaku mfunu ve djwi na wo. Kansi djwi na su vear amivug mpe emikeara Nzeam ne luzingu, oshong owo okie kati na su na biuu o Nzeam. Profeta emog afugn nde ngean n'Otuba o Nzeam : "Wagn e vear abansa wuwun wali ankea ntiegn, ayadjagme, ye ayakieme nde vii ankum alebongisi ankea wagn akwon ngwong." ²⁰ Ankea wagn wali nonkagn n'okiri? Wapijia ata vim ve ne vii a Nzeam. Kaku ata emog ekie otshia ompfugn, kaku ata emog eli biuu n'otshia o nsug esign. Yo yina Nzeam s'eyegninde ndenden wagn enkum ankea wagn eli ifara. ²¹ Ne wagn o Nzeam, vear akakwikila wakakug ndjia Nzeam na wagn o wo wemie ve. Yo yina Nzeam s'eyinde na kiese e ntum oshong eyiyen vear a wagn kesi vii a buzoba. Eli oshong olelongsu ye eli na biuu e mbikisa wur enkum esidjir wog. ²² Wayuda waling ngien bidimbu bikumbwa ne viy avear djwi wadji wur elong. Wagreki waling ontiegn ne mbug e mabanza ilir wangindu i mulimu. ²³ Kansi su sisakula oshong olir Kristu, eyi wi ne kulunsi. Djwi na Wayuda oshong olir kulunsi o Kristu oli vim emog epikug wo ndjir ve djwa ewa ne kulunsi etsawomveara botutu. Djwi na Wagreki, vii anagn ali vii a ibuma kibeni mpi epikug wo ndjir ve. ²⁴ Kansi djwi na su, vear ayivi Nzeam djwi sikug ndjia vii anagn, Kristu ali biuu o Nzeam djwi na nunga ewa ye ali wagn o Nzeam djwi na ndjia Nzeam mpe na ndokuka vii olir nde. Eseang ewuo epilir epuy e djung to mabansa i vear ; na Kristu wapitsu nkabula n'okir etay emog Wayuda mpi etay emu vear a buu ikey mpe vear a mpuy i djung ikey. ²⁵ Yo yina, vii amonika ibuma djwi na Nzeam alenga vii a wagn ankum asikug mbansa avear a buu. Ye ikab imilega okiag ne djung i Nzeam elenga vim ankum a vear a buu na biuu. ²⁶ Atwung ampeam ti atwung ankear, liragni oshin o wur oyignu ntangu eyoviagni Nzeam. Liragni oshin nge oyignu kaku mfunu. Okayiagni vear a kuluta wagn ne kati e vear ankum. Okayiagni ne mfunu entsign ve djwi vear walemfuki na gnu. Okayiagni n'ansur a lukumu ve. ²⁷ N'ondii onagn, Nzeam ason nde vii ayi kaku ntina ve ne nteang e vear apikwikili djwi vear awo wakwon nsambila wemie. Nzeam aponinde na nsadila vii a ibuna djwi na nsukisa vii a biuu etsankwikila vear. ²⁸ Nzeam ason nde vii atsangien vear apikwikili kesi kaku na mfunu ve djwi na ngyegne nde vii abansawo wowon ali na mfunu entsign kaku wo na mfunu ata fioti ve. ²⁹ Nzeam akinde ngagni djwi wur akwon ngia na mpila e mvey lukumu ndemie mpe djwi akeari lokumu enkum na Nzeam. ³⁰ Yug omikangamagni opean na Yezu, eli djwi na Nzeam. Yezu nde wur eyiseyeggni wagn o Nzeam, nde wur eyiseson djwi na Nzeam, nde wur eyisevug mpi eyisewum, eyisebateli. ³¹ Yo yina, kesi emifugniwo n'Onkean o Nzeam wuwun : " Wur eling nkumikumisa akum nkumikumisa djwi na vii amikie Nzeam djwi na nde."