¹ Mutaweruzgaje, chifukwa munginze mweruzgiche. ² Pakuti ukweruzga ko mukweruzgan'ya uko, namwe nyene mukwinzu kweruzgika; ichipimo Cho mukupimira abamwinyu, inthi binze babapimire namwe. ³ Choni cho ukwen'ya ichiswaswa cho chili mwilyinso ilya mukamu wako, kwene ukuleka ukughanaghanira chiswaswa cho chikuru cho chili mwilyinso lyako? ⁴ Ngapo ungamubuzga bulibuli wo mukamu wako ukuti, 'Nzomerezga ukuti mfumye chiswaswa cho chili mwilyinso lyako,' nomba yen'ya, ichiswaswa cho chikuru chili mwilyinso lyako? ⁵ We wakupusika iwe! Yambiwe ufumye ichiswaswa cho chikuru cho chili mwilyinso lyako, po aponyene ukwinzu kwen'ya nu kufumya ichiswaswa cho chili mwilyinso ilya mukamu wako. ⁶ Mutatwale ichinthu cho chizelu ku mbwa awe, mutasumbire ingale zginyu panthanzi pa ngulube. ukunyira ukuti zingalyatalyata ni vinkhando vyakwe, po pakung'anamuka zingabavulazga. ⁷ Mulabe, po inthi mwinze mupochelere. Mulondore, po mukwinzu kuchaga. Mugogode po kukwinzu kubiguchira imwe. ⁸ Pakuti wonsi wo akulaba , wo bakumupa; na wo akulondora, akwaga; na wo akugogoda, bakumwigulira. ⁹ Nadi angaba munthu buli pakasi pinyu, wo umwana wakwe akumulaba ubuledi, ka uwene angasenda ibwe lyo angamupa? ¹⁰ Pamo ukumulaba inswi, ka angamupa injoka? ¹¹ Ubonyene nangabuli, imwe mwe babibi mumanyire kubapa abana binyu vinthu vyo vyinza, aponyene nkhaninkhani ukwakurusya, Ubaba winyu uwa kumwanya inthi abape ivinthu ivyinza ku bo bakumulaba. ¹² Ichifukwa chakwe, ivinthu vyonsi vyo mukwanza ukuti abanthu babachitire, umwakuyanana bulo, namwe nyene mubachitire uwonyene, pakuti ilyo lyo lilamulo na vyo abaneneri bakalemba. ¹³ Mwinjire pakamulyango akansi akakuyifinyirizga. Chifukwa chakwe inzira yakwe yikuru yo yikuya ku gahena, po binji bo bakujendamo. ¹⁴ Pakuti akamulyango kakuyifyenyerezga bwelere, yo nzira iyakuya ko kuli wumoyo, po bakuchepa bo bakuyaga. ¹⁵ Muchenjere na baneneri bo bilenga, bo bakwinza kuimwe ni vyakuzwara vyo vili ngati vya mberere, kwene mukasi mwabo muli ngati bachimbwe bo bakali nkhani. ¹⁶ Inthi mubamanye nimbombo zgabo. Ka abanthu bangayaba amaolenji pa mimvwa pamo bangayaba amakunyu pa ntholomvu? ¹⁷ Uwonyene ikwi lyo lyinza likupasa ivipasi ivyinza, kwene ikwi lyo libibi likupasa ivipasi vyo vibibi. ¹⁸ Ikwi lyo lyinza litangapasa vipasi vibibi, po ikwi libibi litangapasa ivipasi ivyinza vyo vinganona. ¹⁹ Ikwi lyonsi lyo litangapasa ivipasi ivyinza ivyakunona, bakulidumura nukulitajira pa moto. ²⁰ Uwonyene, abanthu bakwe mukwinzu kubamanya ni vipasi vyabo. ²¹ Te aliwonsi wo akunena niine ukuti, 'Mulungu, Mulungu,' ukuti wo akuyu kwinjira kumwanya awe, kwene wo akuchita ukwanza kwa Baba wane uwa kumwanya. ²² Abinji balinena kuine pisiku ilyo, 'Mulungu, Mulungu, asi twaneneraga amazwi mwizina lyinyu, na mwizina lyinyeso twafumisyaga imizimu yibibi, nukuchitaso imbombo iyinji iyamaka mwizina lyinyu?' ²³ Aponyene po nkhwinzu kubabuzga pawuzelu ukuti, 'Nthakabamanya awe! Fumiko kuiine, mwe banthu mwe mutakwivwira amalamulo!' ²⁴ Uwonyene aliwonsi wo ayivwa amazgu gane aga nukugawomvya, akwinzu kuyanana nu munthu wakuchenjera, wo akazenga inyumba yakwe pa mabwe. ²⁵ Po kukatonya imvula iyikulu iyamaka, po aminzi gakizula, po ichimphepo chikinza nukututa inyumbiyo, yitakagwa chifukwa yikazenjeka pamabwe. ²⁶ Po aliwonsi wo ayivwa amazwi gane aga nu kwambura ukugawomvya, akwinzu kuyanana nu munthu wo apusire, wo akazenga inyumba yakwe palusesenga. ²⁷ Po imvula ikatonya, na majenje gakizula, po imphepo yikatuta pinyumbiyo, po yikagwa, nu kugwa kwakwe kukaba kukuru hee.'' ²⁸ Nomba uYesu akati amalizga amazwi ago, ichigulu icha banthu icho chikazizwa nu kusambizga kwakwe, ²⁹ chifukwa akabasambizgaga ngati munthu uwa mazaza, osati ngati balembi babo.