¹ Muchenjere ukuti mutachite wunenesyo winyu panthanzi izga banthu ukuti muloreche nabo, nanthi wo uwonye, mute mube ni mphoto iyakufuma kwa Baba winyu wo ali kumwanya. ² Uwonyene nanthi ukuya kupereka ivyawanangwa ivya pabwira, utarizge ivitoliro panthanzi zgako mo bakuchitira abapusichizgi mu masinagogi na munzira, mwakuti abanthu babachindiche abene. Ine nadi nkhunena niimwe, abene inthi bapochelere nzira imphoto yabo. ³ Kwene iwe pakupereka ivyawanangwa ivya bwira, inyobe yako iya kumongo yitamanye vyo inyobe yako iya ndyero yikuchita, ⁴ uwonyene ukuti ivyawanangwa vyako ivya bwira vibe vyakulubazu. UBaba wako uwakwen'ya ivyamulubazu alikuwezezga iwe. ⁵ Kwene imwe po mukuputa, mutabe ngati mwe bapusichizgi abakupusichira, chifukwa bakutemwa ukuyiputa ichakwimilira mu masinagogi na munzira izga ndekana, ukuti baloreche ku banthu. Nadi nkhunena niimwe, abene bakupochera nzira imphoto yabo yonsi. ⁶ kwene iwe, pakuyiputa, injira kuchipinda chako. Wigalire nu lwiji lwako, uyipute kwa Baba wako wo ali mulubazu. Po uBaba wako wo ali mulubazu alikuwezezga iwe. ⁷ Kwene pakuputa, mutawizgaje-wizgaje awe ngati mo bakuchitira abanthu abakunzi, chifukwa bakughanaghana ukuti inthi bivwike pakuti banena amazwi aginji. ⁸ Chifukwa chakwe, imwe mutayane nabo, pakuti uBaba winyu akumanya vyo mukusoberwa po muchiri mutamulavire. ⁹ Imwe mukwenera ukuyiputa munzira iyi: 'We Baba witu we wuli kumwanya, izina lyinyu lizelupe. ¹⁰ Uwufumu winyu winze. Ukwanza kwinyu ko kuchitiche mo kubereye kumwanya, uwonyene na pacharu icha pansi. ¹¹ Mutupe iswe ichakulya chitu ichilero. ¹² Po mutugobochere iswe ku zakwanagwa zyitu, mo naswe twabagobochera bo batunanjira iswe. ¹³ Po mutatusendere umwa kuyezgeka pole, kwene mutwavwe ku mulwani uyo. ¹⁴ Nanthi mukubagobochera abanthu ukwananga kwabo, namwe akwinzu kubagobochera imwe uBaba winyu uwa kumwanya. ¹⁵ Nanthi mutakugobochera abanthu ku zgakwananga zgabo, namwe uBaba winyu atakwinzu kubagobochera ku zgakwananga zginyu. ¹⁶ Imwe nanthi mwambu kufunga, mutabe ni nkhope iya chitima ngati abapusichizi, pakuti abene bakubifya inkhope zgabo ukuti balolechere ku banthu ukuti bafunzire. Nadi po nkhunena niimwe, abene inthi bapochelere nzira imphoto zgabo. ¹⁷ Kwene iwe, pakufunga, upache amafuta itwe lyako nu kugeza nkhope yako, ¹⁸ ukuti utalolechere ku banthu ukuti uli pakufunga, kwene kwa Baba wako wo ali mulubazu; po Baba wako wo akweny'a mulubazu, alikuwezezga iwe. ¹⁹ Utayibichire weka ichuma chako pa charo icha pansi, po imphezu nu mulosyo vikunanga, kweneso po abiba bakudobora nu kwiba. ²⁰ Kwene uyibichire weka ichuma chako kumwanya, ko imphezu nu mulosyo vitanganangan'ya awe, kweneso ko abiba batangadobora nu kwiba awe. ²¹ Pakuti ko kuli ichuma chako, moyo wako ko wukwinzu kuba. ²² Ilyinso wo wuzelu uwa mubiri. Nanthi ilyinso lyako likwenya pa chinthu choka, umubiri wako wonsi inthi wube wuzelu. ²³ Kwene nanthi ilyinso lyako libibi, mubiri wako wonsi wukwinzu kuba wubibi. Chifukwa nanthi ukulama ko kuli muiwe kwa chisi, ichisi icho chikulu hee! ²⁴ Pate umunthu wo angaba muzga ukutumichira ku babwana babiri, pakuti inthi umubenge yumo nu kutemwa woka, pamo alimukakamira woka nukumuyimvya wamwabo. Utangaba we muzga uwa Mulungu nu wachuma. ²⁵ Ichifukwa chakwe nkhunena niimwe, mutaghanaghanire wumoyo winyu, cho inthi mulye na cho inthi mung'were; pamo mu mibiri, cho mukwinzu kuzwara. kwene umoyo asi wakurusya ukuchira ichakulya, nu mubiri ukurusya ichakuzwara? ²⁶ Yen'ya iviyuni ivya mumlenga_lenga. Chifukwa vitakupesa awe pamo nukugobora, pamo kubika mu nthamba. Kwene uBaba winyu uwa kumwanya akuvilyesya. Asi imwe mwe bakuzirwa ukuchira ivyo? ²⁷ Wenu wuimwe wo akughanaghanira, wo angamanya kusanzizgako umusinkhu wakwe inyobe yoka? ²⁸ Choni cho mukughanaghanira ni vyakuzwara? Yenerezgi amaluba aga munkholongo, amakuliro gakwe. Gatakubomba imbombo, gatakuposa. ²⁹ Po nkhunena niimwe ukuti, napo angaba uSolomoni mu wulemelero wakwe wonsi atazwayepo ngati lyoka ilya igo awe. ³⁰ Nomba nanthi Mulungu akuzwarika ivyakumera ivya munkholongo umu uwonyene, ivyilero vilipo po indabi inthi visumbichire mu moto, asi kwakurusya inthi abazwiche imwe, mwe bakugomezga kali mphi? ³¹ Ichifukwa chakwe mutaghanaghane ukuti, 'tukwinzu kulyachi?' pamo, 'Inthi twinze tung'erechi?' pamo, 'Inthi twinze tuzwarechi?' ³² Pakuti abanthu abakunzi bakuvilondora vyonsi ivyonye, pakuti uBaba winyu uwa kumwanya akumanya ukuti mukusobechera vyonsi ivyonye. ³³ Po mujendelere ukulondora ubufumu bwakwe nu wunenesyo wakwe, po vyonsi ivyo vikwinzu kuba vyakusanzizga kuimwe. ³⁴ Ichifukwa chakwe, mutaghanaghanire ivya ndabi, ilya ndabi lyakwe inthi libe lyakuyighanaghanira pa lyeka na palyeka. Isiku lililyonsi lyakukwanira nu wubibi wakwe, nu wubibi wakwe.