¹ Aponyene uYesu akasendeka nu Muzimu po akaya kuchimbalangwa ukuyu ukuyezgeka nu satana. ² Uwene po ataliye amasiku fote musanya nu wusiku, pisinda lyakwe akivwa inzala. ³ Wo akamuyezgaga uyo akafika nu kunena nawo, ''Nanthi we mwana wa Mulungu, unene ku mab'we ago gasanduche chiwe ichakulya.'' ⁴ Uwene po akazgora akati, ''kulembesire, 'Munthu ataliyikala nu wumoyo chifukwa icha chakulya cheka, kwene na mazwi gonsi go gakufuma kwa Mulungu. ⁵ Po usatana akamusendera ku malo go gazelu, akinza amwimika pamsonje uwa tchalichi pamwanya, ⁶ po akanena nawo, ''Nanthi we Mwana wa Mulungu, uyigwisye weka pansi, pakuti kulembesire ukuti, 'alibuzga abangelo bakwe zwiiwe, Po panyobe zgabo bakwinzu kukupochelera iwe, ukuti utayivulazge ichinama chako nanthi kali mphi.'" ⁷ UYesu po akanena nawo ukuti, "kulembesileso, utamuyezge uMulungu wako." ⁸ Usatana akamusendera kwi gamba lyo litali nkhani, po akamulongozga charo chonsi icha pansi nu wukulu wakwe. ⁹ Po akanena nawo ukuti, "Vyonsi inthi inkhupe iwe, nanthi ungamfugamira ine nukumphuta ine." ¹⁰ Aponyene uYesu akanena nawo, ''Choka satana! Pakuti kulembesire, 'Ukwenera kugwadira imfumu yako yo uMulungu.''' ¹¹ Aponyene po usatana akamuleka, nomba yen'ya, abangelo bakinza nu kumutumichira wuyo. ¹² Nomba akati ayivwa ukuti uYohane bamupinya, po akafumako nukuya ku Galileya. ¹³ Po akafuma ku nazareti, akinza nu kwikala mu Karpenawo, mulubazu umwa nyanja, muvigaba ivya Zeburoni nu Naftali. ¹⁴ Ukuti vikwanirisyike vyo vikaneneka nu Yesaya umuneneri ukuti, ¹⁵ ''Ichalo icha Zeburoni ni charo icha Naftali, mulubazu umwa musewu uwa kunyanja, kwisyira ilya Yordan, Galileya iya banthu abakunzi. ¹⁶ Abanthu abakwikala mu chisi, baken'ya ukulama ukukuru, ibo bo bikaye muchizundira icha kumfwa, ukulama kukabalamila abene. ¹⁷ Aponyene po uYesu akamba ukupharazga nu kunena, ''Mung'anamuche amoyo ginyu, pakuti ubufumu bwa kumwanya bwapalamira." ¹⁸ Po uYesu po akajendajenda mulubazu umwa nyanja iya Galileya, aken'ya abanthu babiri paukuru na pauzuna, uSimoni wo akuneneka ukuti uPetro, nu Andreya umuzuna wakwe, bakasumbiraga amakonde munyanja, pakuti abene bakaba bakuloba abanswi. ¹⁹ Uwene po akanena nabo, ''Imwe mundandate ine, nkhwizu kubang'anamula, mukwinzu kuba mwe balovi babanthu.'' ²⁰ Inyengo iyonyene po bakaleka amakonde gabo, po bakamulandata. ²¹ Akati ajendaso ukufuma pala, po aken'ya abanthu babiri paukuru na pauzuna, uJakobo umwana uwa Zebediya, nu Yohane umuzuna wakwe. Bakaba mwiboti poka nu baba wabo uZebediya po bakatabaga amakonde gabo. Uwene po akabapundizga, ²² po bakalileka iboti nu baba wabo, bakambu ukumulandata. ²³ Po uYesu akajendajenda mu Galileya monsi, akasambizga mumasinagogi gabo, nukupharazga amazwi aginza aga wufumu, po akachizga amatenda gonsi nu kulwara konsi ko abanthu bakalwara. ²⁴ Po inkhani yakwe yikivwika mu Siriya monsi, abene po bakamutwalira abalwari, bo bakalemeka ni nthenda nu kuyimba ukwa mitundu nu mitundu, bo bakalemeka ni mizimu yibibi, na bo bakuzilika-zilika na bakufwa ivibalo. Po uwene akabachizga. ²⁵ Po abanthu abinji bakamulandata abakufuma ku Galileya, na ku Dekapole, na ku Yerusalemu, na ku Yudeya, na ba kwisyira ilya Yordani.