¹ Nomba amasiku gala akinza uYohane m'batizi, akinza apharazga mu chimbalangwa icha Yudeya, akanena, ² ''Mung'anamuche amoyo ginyu, chifukwa ubufumu ubwa kumwanya bwapalamira.'' ³ Pakuti uyu wo umneneri uYesaya akanena, ukuti, amazwi aga uwakupundirizga mu chimbalangwa, 'Muyan'ye inzira iya Mulungu, mugolosye inzira zgakwe.'' ⁴ Nomba uYohane akazwara ichakuzwara icha meya aga ngamila nu lamba uwa chikwera mu munini mwakwe. Ni chakurya chakwe chikaba zombe nu buchi ubwa munkholongo. ⁵ Po nomba uwene bakamwinzira abaku Yerusalemu, na baku Yudeya bonsi, na bakucharo chonsi cho chiparamine nu Yordani. ⁶ Po akabababatizga mu jenje ilya Yordani, bakanenaga ukwananga kwabo. ⁷ Uwene po aken'ya abaFarisi na baSaduki bakuya ku wubatizo wakwe, akati ku babo, ''Mwe bakupapwa ku njoka imwe, wenu wo abachenjezga ku wukali wo wukwinza? ⁸ muloresye ivipaso ivyakwenerezga ukulekana nu kwananga. ⁹ Po mutanenaje umu imwe mweka, 'Ubaba witu tuli nawe uAbrahamu.' Pakuti nkhunena niimwe ukuti mu mabwe aga, umulungu anganyamusizgamo abana aba Abrahamu. ¹⁰ Nomba pa nyengo ino inthemo yabichika pa magululuzi aga amakwi. Po ikwi lyonsi lyo litakupapa ivipaso ivyinza, lidumuriche nukulitajira pa moto. ¹¹ Ine nkhubababatizga na minzi, ukulongozga ukung'anamuka kukwananga kwinyu. Kwene uwene wo inthi ayinze pisinda lyane, wamaka agakundusya ine, wo nthanganyamula ni sapato zgakwe. Uwene inthi abababatizge nu muzimu mutuba nu moto. ¹² Ichakupetera chakwe chili munyowe zyakwe, nomba akwinzu kuyan'ya palwara pakwe, po akwinzu kuwunganika utiligu munthamba. Ivipapa akwinzu kuvyocha ni moto uwamburu kuzima. ¹³ Po nomba uyesu akafuma ku Galileya akaya ku Yordan ukuya ukubatizika nu Yohane. ¹⁴ UYohane akanzaga amukanire, akanena, ''Ine nkwenera ukuti m'mbatiziche niimwe, nomba imwe mukwinza kwiine?'' ¹⁵ nomba uYesu akamuzgora akati, ''Iwe nomba zomerezga, iswe tukwenera tukwanirisye uwunenesyo wonsi.'' Po nomba uwene akamuzomerezga. ¹⁶ Po nomba uYesu akati ababatizika, akafuma muminzi, nomba yen'ya, kumwanya kukamwiguchira, Po aken'ya uMuzimu wa Mulungu, wo wukisikaga ngati nkhunda po wukinza wimilira pa wuyo. ¹⁷ Nomba yen'ya, amazwi go gakafumira kumwanya gakati, ''Uyo wo mwana wane wo mutemwizwe, mwa wuyo mo nkhukondwa."