¹ Po likati lyachilingan'ya isiku ilya Sabata, kubuche bwakwe, isiku ilya kwamba ilya Sabata, akinza Umariya uwa ku Magadala nu Mariya uwamwabo pakwinzu kwen'ya idindi. ² Nomba lora, pakaba ichindindindi ichikuru, pakuti umungelo uwa Mulungu akisika ukufuma kumwanya, po akinza alitutapo ibwe ilyo, po akikala pamwanya pakwe pibwe ilyo. ³ Akalorechero kakwe akalorekaga ngati kamesya aka mvula, ni chakuzwara chakwe chikaba chizelu nkhani. ⁴ Po nikunyizga kwakwe, abalonda abo bakatetema nkhani, bakaba ngati banthu abakufwa. ⁵ Kwene umungelo po akazgora akati ku banthanda abo, "Imwe mutanyire, pakuti mbamanyire imwe muli pakumulondora Uyesu, uyonyene wo akapayikika. ⁶ Uwene apa nayumo, chifukwa chakuti anyamuka ku bakufwa, ubonyene mo akanenera. Zaji mwen'ye po uwene amagonire. ⁷ Po bukaji umwalubiro muye mubabuzge abasambiri bakwe ukuti, 'Anyamusire ku bakufwa. Nomba yen'yi, inthi abalongozge ukuya ku Galileya. Mukwinzu kumwen'ya uwene ukonyene.' Yen'yi, Ine nababuzga imwe." ⁸ Po abene bakafumako umwalubiro kwidindi ni lyoga umwakukondwa ukukuru nkhani, po bakachimbira ukuyu ukubabuzga abasambiri bakwe. ⁹ Nomba lori, Uyesu akakumana nabo, akanena, "Mwakata!" Po abene bakinza, nukwinzu ukumulema ivinama vyakwe, po bakamufugamilira. ¹⁰ Po aponyene Uyesu akanena nabo, "Mutanyire. Bukaji muye mubabuzge abakamu bane ukuti baye ku Galileya. Po abene inthi binze banen'ye ukonyene." ¹¹ Po aponyene po abene bakaba ukuti bakubuka, yen'yi, mubamo bo balonda bakafika ku chikaya, bakababuzga abansembe abasongo vyonsi vyo vikachitika. ¹² Po aponyene po bakati bawungana poka na basongo, bakanenesan'ya ichakuti bangachita, po bakabapa abasilikari indalama izginji ¹³ bakati, "Kanenaje ukuti, 'Abasambiri bakwe bang'winza ubusiku, bang'winza bamwiba po iswe tugonire.' ¹⁴ Ichi nanthi chinginze chivwiche kwa songo uwa muchigaba, twayu kumubuzga ichete po imwe mutakuyu kuba munthamyo." ¹⁵ Po abene po bakapoka indalama izgo, po bakachita mo bakababuzizga. Po inkhani iyo yikambu kuneneka na Bayuda ukufika mpaka nomba. ¹⁶ Kwene abasambiri teni nu wamwabo woka abo bakaya ku Galileya, kwigamba ukonyene ko Uyesu akababuzga ukuti baye bakumane. ¹⁷ Po aponyene po bakati bamwen'ya wuyo, bakamuchindika, kwene bamo batakagomezga. ¹⁸ Po Uyesu akinza nukunena nabo, akati, "Amaka gonsi gaperecheka kuine kumwanya na pacharu icha pansi. ¹⁹ Ichifukwa chakwe jendaji, musambizge abanthu abamitundu yonsi. Nukubababatizga mwizina ilya Baba, ni lya Mwana, ni lya Muzimu Mutuba. ²⁰ Nukubasambizga ukuti basunjilire ivinthu vyonsi vyo nkhababuzga imwe. Nomba yen'yi, Ine ndi poka niimwe amasiku gonsi, ukufichira ubumaliro ubwa charu icha pansi apa."