¹ Inzantchi kukati kwacha, abansembe abakuru poka na basongo bonsi bakanenesan'ya nukwivwana ukuti bamugoje Uyesu. ² Po bakati bamupinya, bakajenda ukumutwara kwa Pilato, usongo uwa chigaba. ³ Aponyene Uyudasi wo akamupereka Uyesu, aken'ya ukuti Uyesu ayeruzgika ukuti bamugoje, akayimba nkhani mu moyo wakwe, ubonyene akajenda ukubwezga indalama 30 izgamasiliva zira ku bansembe abakuru kweneso abasongo, ⁴ uwene akati, "Nananga ukumupereka munthu mulunji." Kwene abene bakamuzgora ukuti, "Iswe vitakutukhuza ivyonyene. Inthi umanye weka cho inthi ubombe." ⁵ Po aponyene akazitaga indalama pansi apa charichi, akafumapo, po akayipinyilira weka ni chingwe munsingo. ⁶ Po abansembe abasongo bakasenda indalama izgo, bakati, "Te chakuzomerezgeka ukuzibika mu chakusontcheramo indalama izga Mulungu, chifukwa za malipiro aga daba." ⁷ Kwene bakivwana bakaya bakalira umugunda uwa wakumata ivibiga ukuti gabe malo aga madindi aga balendo. ⁸ Ichifukwa chakwe cho bakawupunda umugunda ubo ukuti, "Mugunda uwa Daba" ukufichira ilero ili. ⁹ Aponyene po chikaba chakukwanirisyika cho Ujeremiya umuneneri akanenera, ukuti, "Po abene bakasenda indalama izo izga siliva ama teni gatatu, zgo zikaba umutengo uwakukalira umunthu wo bamo mu bana ba Israyeli wo bakamubichira, ¹⁰ Po bakakalira umugunda uwa wakumata ivibiga, malinga na mo Uyehova akandamulira." ¹¹ Aponyene po Uyesu akimilira paminso aga songo uwa chigaba, wo akamubuzga ukuti, "Ka iwe we we Mfumu iya Bayuda?" Po Uyesu akanena nawo, "Mwanena mwemwe." ¹² Kwene po abansembe abasongo na bakuru aba bayuda po bakamuneneraga, Uwene atakazgorapo chilichonsi. ¹³ Po aponyene Upilato akamubuzichizga ukuti, "Ka atakwivwa vyonsi vyo bakukunenera ivi?" ¹⁴ Kwene uwene atakazgora napo lizwi lyoka bulo, ubonyene usongo uwa chigaba po akazizwa. ¹⁵ Panyengo iya chikondwelero chilichonsi icha Paska, ko kakaba kabelo aka songo uwa chigaba ukubasatulira umukayidi woka, uyonyene wo abanthu bakwanza. ¹⁶ Po panyengo iyonyene bakaba ni wandende uwakumanyikwa nkhani izina lyakwe Ubanaba. ¹⁷ Ichifukwa chakwe po bakati bawungana, Upilato akanena nabo, "Mukwanza imbasatulire uwene? Ubanaba fwandi, pamo Uyesu wo akupundika ukuti Ukhristu?" ¹⁸ Pakuti akamanya ukuti bakamupereka ichifukwa chi bina. ¹⁹ Po aponyene po Upilato akikala pa mpando uwa kweruzga, umwanthanda wakwe akamutumizizga amazwi, akanena, "Mutachite chilichonsi nu munthu umulunji uyo. Pakuti ilero mukulota ine nayimba nkhani chifukwa cha munthu uyo." ²⁰ Kwene abansembe abakuru bakabuzga abanthu ukuti balabe Ubanaba, kwene ukuti bamugoje Uyesu. ²¹ Kwene usongo uwa chigaba akanena nabo, "Mukwanza ukuti imbasatulire uwene piiba abanthu babiri? Po abene bakati "Ubanaba" ²² Upilato po akanena nabo, "Ka ine nomba inthi buli nawo Uyesu uwakupundika ukuti Ukhristu? Bonsi bakati, "Uyo wo apayikike pamphinjika." ²³ Po uwene akati, "Chifukwa buli? Akapangana ichakubipa icha mutundo buli? Kwene abene bakapundilizga nkhani, "Uyo apayikike pamphinjika." ²⁴ Kwene Upilato pakwen'ya ukuti pate ichakwavwa, kwene ukuti ichongo cho chikaba chikuru, akasenda aminzi, akageza munyobe paminso aga banthu abo, akati, "Ine nthe nu mulandu uwa daba uwa munthu umulunji uyu. Muyenezge mweka." ²⁵ Po abanthu bonsi bakazomerezga nukuti, "Udaba wakwe ali piiswe na pa bana bitu." ²⁶ Po aponyene uwene akabasatulira Ubanaba, kwene akamukoma Uyesu, po akamupereka Uyesu ukuti uwene apayikike pamphinjika. ²⁷ Ubonyene abasilikari aba songo uwa chigaba bakamusendera Uyesu ku malo agakweruzizgako imilando, po bakawunganika ubwinji ubwa basilikari bonsi kwa wuyo. ²⁸ Po bakamuzura amalaya gakwe, po bakamuzwika amalaya agabenzu aga chifumu. ²⁹ Po bakataba ukorona uwa mivwa, po bakamuzwika kwitwe lyakwe, po bakamulemeka itete kunyobe yakwe iya ku ndyero. Po bakafugamira paminso gakwe nukumukunkhubizga, bakati, "Umutende wube niimwe, Imwe mwe Mfumu iya Bayuda!" ³⁰ Bakamuswilira amate, bakasenda itete, bakamukoma nalyo pitwe. ³¹ Po aponyene bakati bamarizga ukumupanjira ivy nkhanza, bakamuzura amalaya gala po bakamuzwika amalaya gakwe, bakamulongorezga panthanzi ukuti aye apayichiche pamphinjika. ³² Po aponyene po bakajendaga, bakakumana nu Simoni uwa ku Kurene, abene po bakamukakamizga ukuti anyamule imphinjika yakwe. ³³ Po aponyene bakafika ku malo izina lyakwe ko ku Golgota, ukung'anamura ukuti, "Amalo aga bwaza." ³⁴ Po bakamung'wensya ivinyo uwakusanzga na kanyongo. Po akati ayezga, akakana ukung'wera. ³⁵ Po aponyene po bakamupinya uwene, bakagabana amalaya gakwe aga kunzi umwakupanga amayere. ³⁶ Abene po bakikala pansi, po bakamulindilira kuranyene. ³⁷ Kweneso pamwanya pitwe lyakwe, bakakhomelerapo ichikwangwani icha amazwi agakunena umulandu wakwe ukuti, "Uyu wo Uyesu, Imfumu iya Bayuda." ³⁸ Aponyene po bakapayikika poka nawo abankhungu babiri, yumuno kunyobe iya ndyero, nu wunjiso kunyobe iya kamongo. ³⁹ Na banthu bo bakachilingan'yaga apo bakamupanjira umutafu nukuyinzga amatwe gabo ⁴⁰ bakati, "Iwe we wakugwisya icharichi nu kuzenga pa manda gatatu, yavwe! Nanthi nadi we Mwana wa Mulungu, yisikapo pikwi ilyakuyimbirapo ilyo!" ⁴¹ Umwakuyananaso na bansembe abasongo poka na balembi na bakuru, bopenyene bakamba ukumuchitira ikhanza, nukunena ukuti, ⁴² "Bamo akabaponosya, uwene atangayiponosya weka. Waje Mfumu iya Bayuda, atisiche nomba pamphinjika apo, po inthi twinze tumugomezge uwene. ⁴³ Agomezgaga Umulungu, Uwene amwavwe nomba, nathi amwanza. Pakuti akati, 'Ine ne Mwana wa Mulungu.'" ⁴⁴ Po bopeso abankhungu abo bo bakapayikika poka na wuyo, bope bakamba ukumunyoza. ⁴⁵ Ukwambira umusanya uwa 12 koloko kukagwa ichisi icharo chonsi icho ukufichira 3 koloko iya musanya. ⁴⁶ Icha m'ma 3 koloko umo, Uyesu akapundilizga umwamaka nkhani ukuti, "Eli, Eli, lamasabakatani?" Ko kuti, "Mulungu wane, Mulungu wane, choni cho mwandeka Ine?" ⁴⁷ Bakati bivwa ivi, bamo mu banthu abakwimilira aponyene bakambu kunena ukuti, "Umunthu uyu akumupunda Ueriya." ⁴⁸ Po aponyene woka wuibo akachimbira nukuyu kusenda isipanji, nukuyinjizga mu vinyo uwa kusasa, nukuyibika pitete, nukumung'wensya. ⁴⁹ Kwene abamo bakati, "Leka. twen'ye nanthi Ueriya inthi ayinze amuponosye." ⁵⁰ Po Uyesu akapundilizgaso amazwi agakuru nkhani, akampereka umuzimu wakwe. ⁵¹ Nomba yen'yi, ichimwenda ichakuzgika mu charichi chikarepuka pakasi, ukufuma kumwanya ukufichiraso pansi, po icharu chikayingana, na mabwe gope gakarepuka. ⁵² Na madindi gakiguka, ni mivimba iyinji iya banthu bo bakaba balunji abakugona kale, yikanyamuka. ⁵³ Po bakafuma mu madindi gabo pisinda apa kunyamuka kwakwe, po bakinjira mu chikaya cho chizelu, bakalorechera ku banthu bo binji. ⁵⁴ Kwene usongo uwa basilikari na banji bo bakaba nawo pakumulondera Uyesu, bakati ben'ya ichindindindi icho na vyo vikachitikaga ivyo, bakachita ilyoga nkhani, po bakati, "Uyu wo akaba nadi Mwana wa Mulungu." ⁵⁵ Po aponyene pakaba abanthanda abinji bo baken'yaga pawutari, bo bakamulandataga Uyesu kufuma ku Galileya, nukumutumichira wuyo. ⁵⁶ Pakasi pabo pakaba Umariya uwa ku Magadala, nu Mariya umama wakwe uwa Yakobo nu Yosefe, nu mama wakwe uwa bana aba Zebediya. ⁵⁷ Po aponyene po chikaba chamabwira, akinza umunthu uwa chuma uwa ku Arimateya, izina lyakwe Uyosefe, uyonyeneso wo akaba musambiri wakwe uwa Yesu. ⁵⁸ Uyonyene akaya kwa Pilato akalaba umuvimba uwa Yesu. Aponyene Upilato akalamulira ukuti wuperecheke. ⁵⁹ Po Uyosefe akasenda umuvimba, nukuwuvunga mumwenda uwuzelu uwakuyemba, ⁶⁰ po akawubika mwidindi lyakwe ilya nomba ilyakubinza ibwe. Po akakunkhuzizgapo ichibwe ichikuru pamulyango uwidindi, po akafumapo. ⁶¹ Po Umariya uwa ku Magadala wope akaba paranye nu Mariya uwamwabo, bakikala pansi pakwenan'ya ni dindi ilyo. ⁶² Po kundabi yakwe, lyo lisiku lyo lyakulandatana ni lyakuyanizga, abansembe abakuru na bafarisi bakawungana kwa Pilato. ⁶³ Bakanena, "We mfumu, twakumbuchira ukuti uwakupusika yura akati, po akaba nu wumoyo, 'Nkhwinzu kunyamuka pa masiku gatatu.' ⁶⁴ Chifukwa chakwe Mulamulire ukuti abalonda babe bakulondera idindi ilyo ukufichira amasiku gatatu, ukuti abasambiri bakwe banginza, banginze bamwibe nukwinzu kunena ku banthu ukuti, 'Uwene akanyamuka ku bakufwa,' Ubonyene ilenga ilya pisinda ilyo likwinzu ukuba libibi nkhani ukulusya ilyakwamba." ⁶⁵ Upilato akanena nawo, "musende abalonda bukaji, mube mwe bakulondera mo mukumanyira." ⁶⁶ Ubonyene bakajenda bakaya babika ichitetezo ichakukwana pidindi ilyo, umwakwigalira nkhani idindi ilyo ni chibwe, nukubikapo abalonda abakulondera.