¹ Aponyene po abaFarisi na balembi bakaya kwa Yesu, bo bakafuma ku Yerusalemu. Bakati, ² "Abasambiri binyu choni cho baduka imyambo iya bababa? Pakuti batakugeza munyobe pakulya." ³ Po uwene akazgora, akabazgora akati, "Imwe namwe choni cho mukuduka ilamulo ilya Mulungu chifukwa icha miyambo yinyu? ⁴ Pakuti uMulungu akati, 'Uchindiche ubaba wako nu mama wako,' nukuti 'Wo akunenera ubaba wakwe nu mama wakwe amazwi agabibi, afwe nadi.' ⁵ Kwene imwe mukunena, 'Aliwonsi wo akunena kwa baba wakwe olo kwa mama wakwe "Icho cho nge changukwavwa, chakupereka kwa Mulungu,"' ⁶ Uwene atamuchindiche ubaba wakwe nanthi pali mphi. Po imwe mwagabebura amazwi aga Mulungu chifukwa icha miyambo yinyu. ⁷ Mwe bakupusika imwe! UYesaya akanenera ichete izgi imwe, nu kunena ukuti, ⁸ 'Abanthu aba bakuntchindika na malomo gabo, kwene umoyo wabo wuli kuwutali sana niine. ⁹ Kwene bakumphuta apa bwelere, nukusambizga amalamulo aga banthu ngati visambizgo."' ¹⁰ Po uwene akitizga ubwinji ubwa banthu, akanena nabo, "Mwivwe po mumanye iching'anamulo chakwe, ¹¹ Te cho chikwinjira mumulomo, cho chingamunanga umunthu. Kwene cho chikufuma mumulomo wakwe, cho chikumunanga umunthu." ¹² Po aponyene po bakinza abasambiri bakwe, bakanena nawo, "Ka mukumanya ukuti amazwi go mwangunena abafarisi gangubakalarizga?" ¹³ Kwene uYesu akabazgora akati, "Ichakumera chilichonsi cho uBaba Wane atabyaye, chikwinzu kunyunkhulika. ¹⁴ Mubaleche, abo bo balongozgi bo batakwen'ya. nanthi wo atakwen'ya akamulongozga uwamwabo wo atakwen'ya, bonsi babiri bakwinzu kugwira muchibonga." ¹⁵ Po uPeturo akamuzgora akati, "Mutung'anamulire intharika iyi." ¹⁶ Po uYesu akazgora akati, "Ka imwe namweso muchili mutamanyire? ¹⁷ Ka mutakumanya ukuti vyonsi vyo vikwinjira mumulomo vikuchilingan'ya muwumala, po vikutajika kuchimbuzi? ¹⁸ Kwene ivyakufuma mumulomo vikufuma mumoyo. Ivyo vyo vikumunangu umunthu. ¹⁹ Pakuti mumoyo mukufuma ukughanaghana kubibi, ivyakugoga, ivyauhule, ubwamalaya, ubunkhungu, ivya uwukaboni uwamalenga, ukuba numutafu. ²⁰ Ivyo vyo vikumunangu umunthu, kwene ukulya umwamburu kugeza munyobe, kutakunanga umunthu awe." ²¹ Po uYesu akafumapo nukuya kuvigaba ivya Ture na Sidoni. ²² Nomba lora, umwanthanda uwa ku Kenani akafuma ku vigaba ivya kuwumaliro. Akapundilizga akati, "Mutchitire ubwira ine, Mulungu, Umwana wa Deveti! Umwana wane umwanthanda alemwa nkhani ni chibanda." ²³ Kwene atakamuzgora amazwi galigonsi awe. Po abasambiri bakwe bakinza, bakamulaba bakati, "Mumuwuzge ajendaje, chifukwa akupitilizga ukupunda mwisinda lyitu." ²⁴ Po uwene akazgora akati, "Nthatumisire kubanji, kwene ku mberere zo zisobereye izga nyumba iya Israyeli." ²⁵ Kwene uwene po akinza, akamufugamilira wuyo, akanena, "Mulungu, navwa ine." ²⁶ Po uwene akazgora akati, "Te chinza ukusenda ubuledi uwa bana nukumusumbira ku tumbwa." ²⁷ Kwene uwene akati, "Nadi, Mulungu, pakuti nu tumbwa tukulyanga imvinyumvinyu zgo zikugwa pitebulo ilya yisekulu." ²⁸ Aponyene uYesu akazgora, akanena nawo, "We mwanthandi iwe, ichigomezgo chako chikulu; chibe uwonyene kuiwe mo wanzira." Po umwana wakwe akachira inyengo iyonye. ²⁹ Po uYesu akafuma ukonyene, akinza ku nyanja iya Galileya. Akakwera mwigamba, akikala pansi aponye. ³⁰ Po ubwinji ubwa banthu bukaya kwa wuyo, balinabo bo balemaye ivinama, na bo batakwen'ya, na bo batakunena, na bo balemaye ivibalo, na banji bo binji. Akabikazga pansi pa vinama vyakwe, po uwene akabachizga. ³¹ Ubonyene ubwinji ubwa banthu bukazizwa pakwen'ya bo batakanenaga bambu kunena, na bakulemara ivibalo bakachizgika, na bakulemara ivinama bakambu kujenda, na bo bataken'yaga bakambu kwen'ya. Po abene bakamuchindika uMulungu uwa Israyeli. ³² UYesu akitizga abasambiri bakwe, akati, "Umoyo wane wivwa ubwira ku bwinji ubwa banthu abo, pakuti bikaye amanda gatatu niine, pakuti bate na chilichonsi ichakulya. Pakuti nthakwanza ukuti imbabuzge ukuti bajende ukwamburu kulya, bangazilika ni nzala panzira." ³³ Abasambiri bakanena nawo, "Inthi tumwen'ye kwii ubuledi muchimbalangwa uwakuti nu bwinji ubwa banthu ukuti bikute?" ³⁴ UYesu akanena nabo, "Muli nu buledi mulinga?" Po abasambiri bakati, "Fayivi nu wamwabo mubiri, nu tunswi tuli mphii." ³⁵ Po uwene akalamulira abanthu bonsi ukuti bikale pansi. ³⁶ Akasenda ubuledi fayivi nu wamwabo mubiri uyo poka ni nswi, akayiputa kwa Mulungu, akapyola, po akabapa abasambiri bakwe, na basambiri ku banthu. ³⁷ Po bonsi bakalya, bakikuta, po bakasenda vyo vikasyalako ninselo fayivi ni zgamwabo zibiri izga kwizula. ³⁸ Po bo bakalya bakaba abanavuli beka folo sauzandi, kwamburu kuberenjera abanthanda na bana abansi. ³⁹ Pawumaliro, akati alibuzga igulu ilya banthu ukuti lijendaje, akakwera iboti nukwinza mu vigaba ivya Magadani.