¹ Abafarisi na basaduki bakinza bakamuyezgaga, bakamuwuzga ukuti abalongozge ichimanyikwiro icha kumwanya. ² Kwene uwene akazgora, akabazgora akati, "Malinga chaba ichamabwira, mubelereye ukunena ukuti, 'Inthi kuche ichete, chifukwa ibingo libenze nkhani.' ³ Indabindabi, mukuti, 'Isiku ilyilero inthi kukatale po inthi kube imvula, chifukwa ibingo libenze nkhani, kwene likulorekaso lifitu.' Mukumanya ukunena amalorechero agi bingo, kwene ivimanyikwiro ivya zinyengo mutangavinena awe. ⁴ Akabiro akakupapwa muwubibi na muuhule kachiri kachiri kakulondora ichimanyikwiro, po batakwinzu kupochelera ichimanyikwiro ichinji, kwene ichimanyikwiro icha Yona." Po uwene akabaleka, akafumapo. ⁵ Po abasambiri bakinza kwisyira ilinji, bakaluvya ukunyamula ubuledi. ⁶ UYesu akanena nabo, "Mwenerezge, muchenjere ni chakututumusya ubuledi icha Bafarisi na Basaduki." ⁷ Po abene bakamba ukubuzichizan'ya uwamwabo nu wamwabo, bakati, "Tutanyamuye ubuledi." ⁸ Kwene uYesu akati amanya, akati, "Hoo, mwe mukugomezga kalimphi, choni cho mukubuzichizan'ya wamwabo nu wamwabo ukuti mutanyamuye ubuledi? ⁹ Ka imfundo yakwe ka muchiri mutakuyimanya, po mutakukumbuchira ubuledi fayivi yura uwa banthu bara fayivi sauzandi, vidunga vilinga vyo mukaseba? ¹⁰ Apamwabeso ubuledi fayivi nu wamwabo mubiri yura uwa banthu abakukwana folo sauzandi, mukaseba inselo izgakukwana zilinga? ¹¹ Choni cho mutakumanya ukuti nthakanena kuimwe izga buledi? kwene muchenjere ni chakututumusya icha bafarisi na basaduki." ¹² Po aponye bakivwisya ukuti atakababuzga ukuti bachenjere ni chakututumusya ababuledi, kwene ichisambizgo icha Bafarisi na Basaduki. ¹³ Nomba uYesu akati inza ku chigaba icha Kesareya uwa kwa Filipu, akababuzichizga abasambiri bakwe, akati, "Ka abanthu bakuti umwana wa munthu uwenu?" ¹⁴ Abene po bakati, "Bamo bakuti uYohane m'babatizi, abanji bakuti uEliya, abamwabeso bakuti uJeremiya, pameso woka uwa baneneri." ¹⁵ Uwene akanena nabo, "Ka imwe mukuti Ine ne wenu?" ¹⁶ Pakuzgora, uSimoni Petrosi akati, " Mwe Khristu, umwana wa Mulungu uwa moyo." ¹⁷ Po uYesu akamuzgora akati, "We wakukondwa iwe Simoni, we mwana uwa Yona, chifukwa mubiri nu daba te vyo vyakubuzga iwe, kwene uBaba wane uwa kumwanya. ¹⁸ Po ineso nkhunena niimwe ukuti iwe we Petrosi, po pibwe ili nkhwinzu kuzengapo umupingo wane. Imilyango iya bakufwa yitanginze yiwugonjesye. ¹⁹ Ine nkhwinzu kukupa amakiyi aga bufumu ubwa kumwanya. Po cho nanthi wapinya pa charu icha pansi, na kumwanya nge chapinyika, cho nanthi wachisatula pa charu icha pansi, na kumwanya nge chasatuka." ²⁰ Po aponyene po akabalamulira abasambiri ukuti batabuzge abanthu ukuti uyonyene wo uKhristu. ²¹ Ukufuma pa nyengo yiranye uYesu Khri akamba ukubuzga abasambiri bakwe ukuti akwenelera ukuti aye ku Yerusalemu, nu kuyimba mu vinji na banavuli abasongo kweneso abasongo aba basofi kweneso na balembi, nu kuyu kugojeka, isiku ilya chitatu inthi ayinze anyamuche. ²² Po ubonyeneso uPetrosi akamusendera palubazu, po akambu ukumususya, akati, "Muyichitire ubwira, Mulungu, chitakwinzu kuba ubonyene kuimwe awe." ²³ Uwene po akang'anamuka, akati kwa Petro, "Bukaga ku nsiinzi kwane, we satana iwe! We wakunkhalalizga ine, chifukwa utakupwelelera ivya Mulungu, kwene ivya banthu." ²⁴ Po aponyene uYesu akanena na basambiri bakwe, "Nanthi umunthu akwanza ukwinza pisinda lyane, ayikane weka, anyamule imphinjika yakwe, andandate ine. ²⁵ Pakuti uwene wo akwanza ukuti aponosye umoyo wakwe akwinzu kuwutaga, kwene uwene wo akutaga umoyo wakwe chifukwa chiine, wo akwinzu kuwaga. ²⁶ Pakuti umunthu anginze apindulechi nanthi apochelera icharu chonsi nu kutaga umoyo wakwe? Pamo umunthu inthi aperekechi ukuti asinthisye nu moyo wakwe? ²⁷ Pakuti Umwana wa Munthu akwinzu kwinza mu ulemelero ubwa Baba wakwe poka na bangelo bakwe. Po aponyene akwinzu kuwezezga ku banthu bonsi umwamachitiro gabo. ²⁸ Nadi nkhunena niimwe, ukuti balipo bamo bo bakwimilira apanye, bo nadi batakwinzu kufwa ukufichira po bakwinzu kumwen'ya Umwana uwa Munthu wo akwinza mubufumu bwakwe."