¹ Nagnaia gny malalanao, ry soa tarehy mare ami-gn'ampela? Namanta nagnaia gny malalanao, mba hilanay gn'azy miaraky agnaminao? Misafa ami-gny vatany somonjara io. ² Gny malalako la fa nidrotso nagnami-gny tondany agny, ho ami-gny farafaran-draha magnitsy agny, mba hiraoky ami-gny tonda egny ndraiky hitanta gnani-reo lilia. ³ Gnany gny malalako iaho, voho gn'ahy gn'ampela misafa agnaminy. ⁴ Soa tarehy manahaky gny Tirza iha, ry teako,maha te ho tea manahaky gnan'i Jerosalema, mampisy aingam-pagnahy manahaky gny miaramila miraky ami-gny fanevany. ⁵ Akalo agnamiko gny masonao, fa manafotsy gn'ahy rozy. Gny volonao la manahaky gny andian'aosy midrotso baka ami-gny hantsany gny vohitsin'i Geleada egny. ⁶ Gny hinao la manhaky gny andian-aondry vaviny miakatsy baka ami-gny toera fisasa agny. Samby mana gny hamba agnaminy gny kiraidraiky, voho tsy nisy banga reo. ⁷ Gny fignafignanao la manahaky gny hasin'ampongabendagnitsy ambaliky gny voalinao ao. Gny teany io ampela misafa ami-gny vatany io ⁸ Misy mpanjaka ampela enimpolo, valitsin-drano valopolo, voho somonjara tsy voa isaky. ⁹ Ry pizoko, ry malioko, hany tokako; ie la ampela tokan-dreniny; ie ro vatany teani-gn'ampela niteraky gn'azy, gny reo gnanak'ampelany gn'olony gny tanako laha nahita gn'azy la nikaiky gn'azy hoe sambatsy; gny reo mpanjaka ampela ndraiky gny valitsindrano avao koa la nahita, ka nandrengy gn'azy:Zao ro nivinolany gny mpanjak ampela ndraiky gny valitsindrano ¹⁰ "Ia moa miatoro manahaky gny mazava an-tignana io, soa tarehy manahaky gny vola, mamirapiratsy manahaky gny masoandro,mampisy aingam-pagnahy manahaky gny miaramila miaraky ami-gny fanevany?" Gny teany gn'ampela misaf ami-gny vatany. ¹¹ Nidrotso tami-gny reo ala maliniky misy hazom-bazana tegny iaho mba hijery gny tiry vaovao an-dohan-tonda egny, mba hijery laha nitsimoky gny voaloboky, voho laha fa namogny gny ampongabendagnitsy. ¹² La vatany la faly iaho ka nahatsapa manahaky gny hoe nitikitsy gny kalesany gny andrian-dahy. Gny teany gn'ampela misafa agnaminy ¹³ Mimpolia, mimpolia iha rampela tonga lafatsy; mimpolia, mimpolia, mba ahafahako mandiniky gnanao. Gny somomjara misafa ami-gny teany Nagnino iha ro mandiniky gn'ahy, ampela tonga lafatsy, manahaky gny hoe mitsindraky agnivony gny mpitsindraky roa an-dala eo iaho?