¹ Eri rhuba rhwamafuma, barhubwira okw'echo chirwa chihamagalwa Mileta. ² Abantu bw'okola chirwa, barhuyankirira n'obusime bw'okunali. Barhuchanira omuliro, barhubwira rhweshi mpu rhukaluke; bulala envula yamaligi rhoga, n'emboho yaliri nene. ³ Eri Paulo amali rholagul'enundo y'eshali ziyumire amalire zikweba oku chiko, mwa shoshoka enjoka, eri yamayunva echuka ch'omuliro, yachishwekera oku kuboko kwage. ⁴ Abantu b'okola chirwa, babwene'yo njoka eri yamachizingira oku kuboko, babwirana bonyine oku bonyine, ntya: oyu muntu ali chishambo; amafuma enyanja, s'aliko okuchiholera kwa Nyamuzinda kwarhuma arhalama. ⁵ Darha wani, amakungurhira eyo njoka omu muliro, na ntako abere; ⁶ abantu balemaga balinga okw'arhundagana, changw'okw'adurhuka honaho; aliko balinga kashanji kanene, babona oku ntako abere, bahindamula enkengero zabo, barhondera okuderha okw'ali nyamuzinda. ⁷ Haguma naho, haliri eshwa ly'omurhambo w'echo chirwa, ezino lyage ye Pubuliyo, arhuyankirira ana rhuhandisa bwinja siku esharhu. ⁸ Eshe wa Pubuliyo alilwer'eshushira n'omukunguru, Paulo ajimulola, amuhunira, amulambulira kw'amaboko, amufumya. ⁹ Babere babona ntyo, abandi balwala b'echo chirwa, nabo bamushimba, banafuma. ¹⁰ Okola kwarhuma barhukenga, n'eyi rhugenda, barhuha empamba. ¹¹ Rhwabere rhwamala yi myezi esharhu, rhwaja omu nkuge yageraga mw'echola chirwa omu mango g'envula. Yaliri nkuge y'e Alezandiriya, yanaliri kw'echimanyiso ch'aba-Diyoskori. ¹² Rhwasika e Serakuza, rhwaberayo siku esharhu. ¹³ Rhwarhengereyo, rhwabarabanya eburhambi bw'enyanja, rhwahika e Rejiyo; bwachere sezi empusi y'omukondo yahusa, rhwajira siku ebiri, rhwaboni sika e Putiyoli, ¹⁴ rhwabugana yi bene berhu b'abemezi, barhuyinginga mpu rhubere nabo siku mushanvu. Na ntyo ku rhwahikaga e Roma. ¹⁵ Amango bene berhu b'echo chishagala bamanyaga oku rhwayinjire, bayinja kurhulingira aha Itaramo ly'e Apiyo, n'aha Mahondo. Paulo ababwene, avuga Nyamuzinda omonkwa, anachiha obushiru. ¹⁶ Amango rhwahikaga e Roma, bayemerera Paulo ajihanda aha lonzeze, haguma n'enfola muherho yalimulangire. ¹⁷ Enyuma ya siku esharhu, Paulo ahamagala abarhambo b'Abayahudi; babere bamayikala haguma, ababwira ntya: Bene berhu, ntachibi najirir'eshanja lyerhu changw'engeso za bashokuluza, kurharhumaga barhampeba omu mpamikwa e Yerusalema n'oku mpana omu maboko g'abaroma, ¹⁸ Eyi bamala kunsambisa, abaroma balonza oku ndika, bulala barhabonaga echakarhuma banyirha. ¹⁹ Aliko Abayahudi balahira, banseza oku mpeme olubanja lwani baluchire emwa Sezari, kurhali kuderha oku hali echi nankasidakirwa kw'eshanja lyani. ²⁰ Ch'e charhumaga echo nahema oku mbabone na mbaderhese; bulala bulangalire bw'e Israeli burhumire ndi omu lukoba. ²¹ Nabo bashubiza: rhwabo nta maruba g'e Yudeya rhwabwene ku w'oyo, na bene benyu, ntaye n'omuguma wayinjire kurhubwira omwazi gubi ku w'oyo. ²² S'aliko rhulonzeze orhubwire wenyine gurhe olonzeze, bulala rhuyinji okw'elyo dini lyawe ligayirwe hoshi. ²³ Balaganana olusiku na Paulo, lwahikire ho, bayinja banene kumulambagirira aha lala. Paulo ababwira emyazi y'obwami bwa Nyamuzinda, omu kuhamiriza, n'okulonza oku bayemeza Yesu nk'okubiyandikirwe omu chitabu ch'amarhegeko ga Musa n'omu ch'abalebi. Eshambalo yabo ya rhonderaga esezi kuhika egolo. ²⁴ Baguma bayemera eby'alemaga aderha, n'abandi barhabiyemeraga. ²⁵ Babere balekana barhanayunvikene, Paulo ababwira eyi myazi: Muka Ochere aderhere okunali, amango abwiraga basho omu chitabu ch'omulebi Isaya, eri aderha, mpu: ²⁶ Oj'emunda ol'olubaga luli, ona lubwire ntya: mwakazi yunviriza n'amarwiri menyu, murhanayunva; mwakazi lolereza n' amesho menyu, murhanabona. ²⁷ Bulala omurhima gw'olo lubaga gwa hinzize; bafukire amarhwiri mabo, banazibize amesho mabo, mpu yibarhabonaga n'amesho mabo, mpu yibarhanayunvaga n' amarhwiri mabo, mpu yibarhanarhegereza omu mirhima, mpu yibarhanahindamukaga benja, mpu yintabafumya. ²⁸ Mumenye bwinja oku, abapagani, Nyamuzinda arhumire obuchunguke, mpu nji banabuyunve. ²⁹ ( Abere amaliderha eyo myazi, Abayahudi bagenda, bajirana kw'obuhaka bunene ). ³⁰ Paulo amala myak'ebiri yoshi omu nju alihandire mo. Alema ayankirira boshi balemaga bayinji mulola, ³¹ ayalagaza emyazi y'obwami bwa Nyamuzinda n'okuyigiriza ebiyerekere Nahano Yesu Kristu, okw'alonzeze na buzira chihanzo.