¹ Festo aber'aj'omu chihugo chage, hagerer'esiku esharhu azamukir'e Kayisariya ye y' e Yerusalema. ² Abadahwa bakulu n'abakulu b'ehano b'Abayahudi bayinja kulega Paulo. ³ Bamuyinginga mpu ababer' obonjo, arhegeke balerhe Paulo e Yerusalema, bulala balonzeze bamulingir'omu njira bamuyirhe. ⁴ Festo abashubiz'oku: Paulo aboherw' e Kayisariya n'oku yenine nj'achilerha birhalegemire. ⁵ Aba bwira: Abakulu benyu bayandagale bankulikire n'akaba hali echoleng' oyo mulume nji bachiderhe. ⁶ Festo ajira siku munane changw'ekumi, ayandagalir'e Kayisariya, aber'agerayo arhegek'oku balerhe Paulo. ⁷ Agerereyo, Abayahudi, bayandagala kurheng' e Yerusalema bamugorha, bamuleg'ebikomere, ebibarhagwerhe k'obuhamya. ⁸ Paulo aj'omuluhy'achirikuza, aderha: Nyono ntacho najirire chagarhuma nalegwa ntana jiraga kubi oku marhegeko g'Abayahudi, ntakubi oku shengero chiro na ntakubi emwa Kayisari. ⁹ Festo aber'alonza kusimis'Abayahudi, abwira Paulo: ka walonz'oku jichirw'olubanj'e Yerusalema eri nani ndiho? ¹⁰ Paulo ashubiza: Na sambira omu karubanda k'e Kayisariya, aho honachirw'olubanja. Nta bubi najirir'Abayahudi ; ebyo mbimenyere bwenene. ¹¹ Akaba najirir'obubi, chang'olugomo luhunir'okuyirhwa, ntalahir'okuyirhwa. Aliko nka ntacho najirir'omu bibali bandega oku bubeshi; ntaye wankampir'omu maboko gabo. Nyibusize Kayisari. ¹² Festo aber'amaj'omw'ihano n'abaganda bage, abwira Paulo mpu: Wanyibusize Kayisari, waj'e mwa Kayisari. ¹³ Buzinda bwa siku zigeke, mwami Agripa na Berenisi bager'e Kayisariya bali lamusa Festo. ¹⁴ Bajirire siku zinene baliyo. Festo ashambalir'oyo mwami olubanja lwa Paulo, aderha: Felisi aleker'oyu mulume omu mugozi. ¹⁵ Amango naliri e Yerusalema ; Abadahwa bakulu n'abagula b'Abayahudi bamulega balonzez'achirw'olubanja. ¹⁶ Nabashubiz'oku Abaroma barhajir'engeso y'oku hir'omuntu omu maboko gabanzi bage. Nay'aligwerh'obushobozi b'oku chiderher'oku bibamulegere. ¹⁷ Na ntyo, bayinja buchasezi, nayikal'oku ntebe y'emanja, n'okurhegeka balerh'oyo mulume. ¹⁸ Abamulegaga eri bahikaho ntacho bamushinjire nk'oku naliganizize baderha! ¹⁹ Baligwerh'omuka enyanya ly'edini lyabo n'enyanya lya Yesu wafire, eyi Paulo yewe aderha mpu; azene. ²⁰ Ntachimanyaga bande nkulikirage, na Paulo aj'e Yerusalema achirw'olubanj'eyo. ²¹ Paulo aber'ahamagala mpu; olubanja lwage lumanyikan'emwa mwami mukulu, na rhegeka bamulange kuger'olusiku namurhum'emwa Kayisari. ²² Agripa abwira Festo: Nangasima nani muyunviriz'omusezi , Festo amushubizi mpu: nji wamuyunva. ²³ Bwacher'sezi Agripa na Berenisi bayinja n'oburhwali boshi, bayikal'e karubanda n'abakulu b'enfola miherho, n'abagula b'echishagala oku burhegeke bwa Festo. ²⁴ Festo aderha: Mwami Agripa nenyu mweshi muli hano, mulole mweshi oyu mulume ye warhumir'olubanja lw'abayahudi lwajahano mwani, bali mbuganir'e Yerusalema banali bayama mpu ayirhwe. ²⁵ Oku bwani ntabonag'obubi bwangarhum'ayirhwa, naye yenine ahamagala okwaj'emwa Mwami mukulu; nabwen'ajeho. ²⁶ Ntabyo mperhe by'oku yandikira Mwami mukulu enyanya lyage chechirhumire namulerh'embere zenyu, n'embere za Mwami Agripa yihabonek'echokuyandika hano amaliyunvirizwa. ²⁷ Bulala birhakwirir'oku rhum'omushwekwa buzir'okuyandika ebiba mulegere.