¹ Nka mwankambera olukogo omu buhwinja bugeke ngwerhe n'echi mumbere olukogo. ² Bulala mperh'agahinda ku mwabo naka kahinda kali omu Nyamunzinda; bulala na bashambazaga enyanya za muhya mulume muguma, yi nkuyerekana embere za Kristu nka mubikira loshi ³ Kona kuguma nka kulal'enjoka ya shumikaga Eva, kugerera oku bwenge bubi bwayo nyubahire okw'enkengero zenyu zakazichikula omu bwimana bwa Kristu. ⁴ Bulala eyi hakayinja wabayigiriza owindi Kristu harheng'oyu rhwabayigirize changwa nka murhol'owindi Muka kulek' eyimugwerhe changw'ogundi mwazi kulek' ogu mugwerhe, murhankabula kuyemera! ⁵ Nabo nchikwebere okw'ezo ntumwa nkulu ntacho zindushire. ⁶ N'akaba nta bwenge boku derha njira, obumanyi bowe ntabubulire oku byoshi, n'embere za byoshi. ⁷ Obo ntyo, najirir'echaha bulala nachiyandagaza nyenyine mpu muj'enyanya, nabayamagiziza oku busha omwazi gwa Nahano? ⁸ Nanyegere agandi mashengero, obugale bwabo, n'abahag'oluhembo libankolera. N'amango naliri emwenyu naba n'obulagirire, ntaye nazidohere. ⁹ Bulala beneberhu barhengaga e Masedoniya babamenyaga ebimbulire. Omu byoshi ntabazidoheraga nachilanga. ¹⁰ Kuger'omu kuli kwa Kristu kuli mu nyono, ndahire oku bilolere erenge, ntaye wakabinkulamo muchino chihugo cha Akaya. ¹¹ Bulagurhe? ... kabulala ntabasima? ...Nyakasani yebimenyere! ... ¹² S'aliko, namabijira nji nashubi bijira ntyo omu kuntu nkule bilala bayerekana omu kuchibisha mubyo, mpu yibarhabonekanaga kuguma nerhu omu bintu bachiha mw'obukuze. ¹³ Abo bantu, bali ntumwa z'obubeshi, bakozi babeshi, bachihindamwire ntumwa za Kristu. ¹⁴ N'ebyola birhakasomezwa bulala na Lyangombe naye yenyine anachihindamula nka malayika w'akamole. ¹⁵ Kusiga birhali bihyahya okw'eshengero zabo zakachihindamula nka shengero z'okuli; obuzinda bwabo bwebe nk'orhwasi rhwabo. ¹⁶ Namashuba derha, ntaye ondolage nka musire, aliko muntole nka musire linani mba nkanachikunga hityu. ¹⁷ Ebinderhere omu bulangalire ntabiderhere okuba n'ebinakachikubagira, ntabiderhere oku bwa Nahano, aliko nk'oku busire. ¹⁸ Bulala haliboneken'abachikubagira kugerera oku by'omubiri nani nchikubagire byo. ¹⁹ Bulala mubalembera n'obulonza, balala barhajira bwenge mwebanya bwenge. ²⁰ Nk'omuntu akakujira mugaragu, nk'omuntu akakushenyagula, nk'omuntu aka kurhol'ebyawe, nk'omuntu akakushurha, mumulembere. ²¹ Nyunvirhe ensonyi z'okubiderha bulala ntayerekene oku bulirwa n'emisi. S'aliko, eyihakajira w'owanshubira, nderhere nka musire, nakagera kubijira. ²² Kab'ali ba Heburaniya? Nani ntyo, kab'ali Ba Israeli? Nani ntyo, kab'ali omulala gw'Abrahamu? nani ntyo. ²³ Kab'ali bw'omushengero lya kristu? Embiderhere buzira lugero, nde yewe nakulusha kandi kugerera oku rhwasi, kugerera omu kushurhwa nashurhirwe, kugerera kandi n'omukushekwa nashwekerwe, n'ahanene nalire omu mahanya g'olufu. ²⁴ Karhano, nashurhurhirwe n'Abayahudi rhurhi makumi mane rhwabulagamo kaguma; ²⁵ kasharhu nashurhirw'orhurhi, liguma nashurhirwe amabale, kasharhu nazikire omu menji, nayorhere lusiku luguma obudufu n'ezuba enyanya z'amenji. ²⁶ Kanene omu mbalamo nabalamaga naliri omu buhanya bwenyinji zizibuzibu, omu buhanya bw'ebishambo, omu buhanya bw'abe chihugo chani, omu buhanya bwa balala bantu baherere omu mahanya g'omu mpinga. Omu mahanya g'enyanja, omu mahanya ga beneberhu b'obubeshi. ²⁷ Naliri omu rhwasi n'omu malibuko, nalichihebere omu borhere b'oku chishalisa, omu kuchishibis'omu nzara, n'omu nyorha y'oku chishalisa, omu kuyiriza bwenene omu mboho, n'omu kuyorha busha buzira kuyambala, ²⁸ na buzira kuderh'ebindi bintu, nali limbukire n'enkengero za ngasi lusiku, nakazigi hembwa n'amashengero goshi. ²⁹ Nde molokazi? Nani ndi molokazi? Nde wakagayiswa nani ntayunva nalibuzwa? ³⁰ Akaba nakachikunga omu borhere bwani b'obuzamba. ³¹ Nyamuzinda Eshe wa Nahano Yesu, Yewagishirw'emyaka yoshi, Amenyer'oku ntabeshere. ³² Omu Damasiki, omurhegesi wa mwami Aretas alangiziz'echihugo ch'Abadamasi y'agala kugwarha. ³³ Kurhenger'omu dirisha munayandagazwaga elimpeberwe omu karhanda, nayandagazwa oku chibambazi, nafuma kurhenga omu maboko gage.