¹ Paoly, apostolin'i Jesosy Krisity araka ny sitrapôn'Andriamanitra, ho amin'iré ôlo-masin'Andriamanitra agny Efesosy, izay mahatoky akô amin'i Kristy Jesosy. ² [Fagnamarihagna: Misy fandikagna sanany manala ny hoe: ''Ao Efesosy'' saingy mety akô amin'ny taratasin'i Paoly tamin'ny vôalôhagny izegny. ] Ho aminaré ny fahasoavagna ndraiky fiadanana avy amin'Andriamanitra Raintsika sy Jesosy Kristy Tompo. ³ Deraina ané ny Andriamanitra sy Rain'i Jesosy Kristy Tompontsika, izay nitahy antsika takô amin'i Kristy tamin'ny fitahiam-pagnahy jiaby avy akagny andagnitra akô amin'i Kristy. ⁴ Andriamanitra nifidy antsika takô aminanjy letrin'ny fiantombôhan'izao tontôlo izao, mbô ho masigna sy tsy manan-tsigny aké agnatrehany antsika. ⁵ Andriamanitra de nisafidy antsika mialôha ho amin'ny fananganagna ho zanaka tamin'ny alalan'i Jesosy Kristy, araka ny sitrapôny. ⁶ Ny fananganagna antsika de mitôndra amin'ny fideragna ny fahasoavagny be vogninahitra izay namiany antsika maimaimpoagna takô amin'ilay iraiky izay tiagny. ⁷ Akô amin'i Jesosy Kristy de mahazo fanavôtagna amin'ny ràny sy ny famelan-keloka antsika, araka ny harem-pahasoavagny. ⁸ Narôtsagny tamintsika tamin'ny fahindrégna sy fahalalagna jiaby izégny fahasoavagna izégny. ⁹ Natôn'Andriamanitra fantatra tamintsika ny raha miafin'ny sitrapôny, araka izay tiàny, sy izay nasehony takô amin'i Kristy, ¹⁰ niaraka tamin'ny fandaharagna araiky amin'ny fahafenoan'ny fotoagna, hanangognagna ny raha jiaby, atô an-tany sy agny an-dagnitry, ho lôha araiky, na Kristy aza. ¹¹ Akô amin'i Kristy de voatendry ho pandôva antsika. Nofidiagna mialôha araka ny fandaharan'ilay mampiasa ny raha jiaby araka ny tanjon'ny sitrapôny antsika. ¹² Andriamanitra nanendry antsika ho mpandôva mbô ho antsika no manana fahatokiagna voalôhagny akô amin'i Kristy, mbô ho fideragna ny voninahiny antsika. ¹³ Takô amin'i Kristy, anaré kôa, kôfa naharegny ny tenin'ny fahamarinagna, de ny filazantsaran'ny famonjegna anaré, de nino Ananjy anaré ké votomboka tamin'ilay Fagnahy Masigna nampanantinaigna, ¹⁴ izay antoka ho an'ny lôvantsika mandra-mpahazoantsika tanteraka izegny, ho fideragna ny voninahiny. ¹⁵ Noho izegny atony izegny, letrin'ny naharenesako ny finoanaré ny Tompo Jesosy ary ny fitiavanaré iré ôlo-masigny jiaby, ¹⁶ de tsy nitsahatra ny nisaotra an'Andriamanitra zaho noho ny aminaré ké tsaroàko am-bavaka anaré. ¹⁷ Mivavaka zaho mbô ny Andriamanitr'i Jesosy Kristy Tompontsika, ilay Rain'ny vogninahitra, hanamia anaré ny fagnahin'ny fahindregna sy fanambaragna amin'ny fahalalagna Ananjy. ¹⁸ Mivavaka zaho mbô hanazavagna ny mason'ny fônaré, mbô hahafantaranaré ny toky izay niantsogny anaré sy ny herin'ny voninahitry ny lôvany aké amin'iré ôlo-masin'Andriamanitra jiaby. ¹⁹ Akô amin'ny fivavako de mangataka zaho mbô hahafantaranaré ny fihoaran'ny halehiben'ny heriny akô amintsika izay mino, araka ny fiasan'ny heriny lehibe. ²⁰ Izegny hery izegny foagna no nampiasain'Andriamanitra takô amin'i Kristy kôfa natsangany tamin'ny maty Izy ké nambelany také an-tanagny ankavanagna tagny an-dagnitry. ²¹ Kristy de nambelany ho ambônin'ny lalàgna sy ny fahefagna mbôn'ny hery ndraiky fitsarana, ary ny anaragna jiaby izegny misy. Hanapaka Kristy, tsy ho aminjao vanim-potoagna zao foagna, fô ho amin'ny vanim-potoagna ho avy koà. ²² Nambélan'Andriamanitra ho akô ambanin'ny tongotr'i Kristy avokoa ny raha jiaby ké natolony ho lôhan'ny raha jiaby akô amin'ny fiangonagna Izy. ²³ Ny fiangonagna no tenagny, ilay fahafenoin'Ilay mameno ny raha jiaby amin'ny endriny jiaby.