¹ Lebuh Yesus meda bala urang mayoh, Iya niki ngagai bukit sigi, alu leboh Iya nuduk ka Diri, sida murid Iya alu datai ngagai Iya. ² Iya alu belaboh ngajar sida, ko Iya: ³ “Beberekat meh urang ke seranta alam roh, laban Perintah surga endang enggi sida. ⁴ “Beberekat meh urang ke ngulit, laban sida deka di perindang. ⁵ “Beberekat meh urang ke baruh ati, laban sida deka bempu dunya. ⁶ “Beberekat meh urang ke lapar sereta aus ka pengelurus, laban Allah Taala deka ngemuas ka sida. ⁷ “Beberekat meh urang ke kasih ka urang, laban sida deka nerima pengasih. ⁸ “Beberekat meh urang ke tuci ati, laban sida deka meda Allah Taala. ⁹ “Beberekat meh urang ke bekereja ke pemaik, laban sida deka dikumbai anak Allah Taala. ¹⁰ “Beberekat meh urang ke kena perinsa ketegal pengelurus, laban sida deka bempu Perintah surga. ¹¹ “Beberekat meh kita leboh urang mecat kita alu merinsa ka kita, alu nyebut semua macam utai ti bula ngelaban kita ketegal Aku. ¹² Lantang sereta gaga meh kita, laban upah ti besai udah disedia ke kita di surga, laban nya mega cara urang merinsa ka sida nabi ke dulu ari kita. ¹³ “Kita to garam dunya. Tang enti garam nadai age masin, baka ni ko jalai ngaga iya masin baru? Iya nadai guna agi, tang dibuai alu di indik kaki mensia. ¹⁴ “Kita to penerang dunya. Nengri ti di dirika ba atas bukit, enda ulih dilalai ka. ¹⁵ Nadai mega urang nungkun lampu, alu nangkup iya ngena bisin, tang ngengkah ka lampu nya ba penuduk lampu, alu lampu nya deka meri penerang ngagai semua urang alam rumah nya. Baka nya mega kita; ¹⁶ awak ka penerang kita mancar ngagai urang, ngambika sida meda pemadas pengawa kita alu ngemulia ka Apai kita ti di surga. ¹⁷ “Anang ngumbai Aku datai deka muai Taurat, tauka muai ajar sida nabi. Aku ukai datai deka muai Taurat, tang deka ngamatka iya. ¹⁸ Laban, enggau bendar Aku madah ngagai kita, sebedau langit enggau dunya lesap, nadai leka jako tauka titik ti pemadu mit deka enyau ari Taurat, sebedau semua utai di kamatka. ¹⁹ Nya alai, barang sapa ngelanggar pesan ti pemadu mit to, alu ngajar urang ngelanggar iya, deka dikumbai pemadu mit alam Perintah surga, tang barang sapa ngasi ka pesan, alu ngajar urang ngasi ka iya, deka dikumbai besai alam Perintah surga. ²⁰ Laban, Aku madah ngagai kita, enti kita enda lebih agi lurus ari sida pengajar Taurat enggau urang Farisi, kita enda ulih tama Perintah surga. ²¹ Kita udah ninga pasal utai ti udah dipadah ka ngagai urang ke dulu kelia, ‘Anang munuh urang; barang sapa munuh urang deka kena pecara.’ ²² Tang Aku madah ngagai kita, enti kita ringat ngagai menyadi lelaki tauka menyadi indu kita enggau nadai kebuah-buah, kita deka kena pecara; alu enti kita ngelese ka menyadi kita, kita deka dibai ngagai Makamah Agama; lalu enti kita nyebut, ‘Nuan to beli’, kita deka dibuai ngagai api neraka. ²³ Nya alai lebuh kita deka meri pemeri kita ba altar, alu teingat ka menyadi lelaki tauka menyadi indu kita bisi nda nyamai ati ngagai kita, ²⁴ tinggal ka pemeri kita dia di mua altar, bebaik dulu enggau iya, udah nya baru kita mansang alu meri pemeri kita. ²⁵ “Bebaik meh enggau penyampat enggau urang ke bedawa ka kita, seagi nuan benong begulai besama-sama ba jalai, enggai ke iya nyerahka kita ngagai akim, alu akim nyerahka kita ngagai jejaga iya, alu kita ditutup alam penjara. ²⁶ Enggau bendar Aku madah ngagai kita, kita enda uleh pansut ari penjara nya datai ke kita udah mayar semua utang kita. ²⁷ “Kita udah ninga jako ti munyi to, ‘Anang butang.’ ²⁸ Tang Aku madah ngagai kita, barang sapa merening ngagai indu enggau ati ti kamah, iya udah butang enggau indu nya alam ati iya. ²⁹ Enti mata kanan nuan mai nuan bedosa, keruk alu buai iya! Manah agi nuan enyau siti ari perengka tubuh nuan, ari ke semua tubuh nuan dibuai ngagai neraka. ³⁰ Alu enti jari kanan nuan mai nuan bedosa, tetak jari nuan alu buai iya! Manah agi nuan enyau jari sepiak, ari ke semua tubuh nuan dibuai ngagai neraka. ³¹ “Jako to udah mega disebut, ‘Barang sapa muai bini, enda tau enda meri bini iya surat sarak.’ ³² Tang Aku madah ngagai kita, genap iko urang ke muai bini, kelimpah ari bini iya butang, deka ngujungka bini iya butang, alu barang sapa jadi enggau indu ke udah sarak, iya mega butang. ³³ “Kita udah mega ninga pasal jako ti udah disebut ngagai urang ke dulu kelia, ‘Anang bula ka semaya, tang kereja utai ti udah disemaya kita enggau Tuhan.’ ³⁴ Tang Aku madah ngagai kita: anang besumpah, nemu ka atas nama surga, laban nya takhta Allah Taala, ³⁵ tauka atas nama dunya, laban nya penumpu kaki Iya, tauka atas nama Yerusalem, laban nya nengri Raja ti besai. ³⁶ Alu anang besumpah atas pala kita empu, laban kita nda uleh ngaga selambar buk kita, burak tauka celum. ³⁷ Nya alai, ti au padah au’ ti enggai padah enggai; Utai ti lebih ari nya datai ari Sitan. ³⁸ “Kita udah ninga urang nyebut jako to, “Mata balas mata, ngeli balas ngeli.’ ³⁹ Tang Aku madah ngagai kita: Anang ngelaban urang ke jai. Enti urang nampar kuyu kanan kita, awakka iya mega nampar kuyu kiba kita. ⁴⁰ alu enti urang deka nyara kita laban iya deka ngambi baju kita, awak ka iya mega ngambi kelambi kita. ⁴¹ Lalu enti urang mejal ka kita bejalai sekilometer, bejalai meh enggau iya dua kilometer. ⁴² Beri ngagai urang ke minta ari kita, alu anang nulak urang ke nginjau ari kita. ⁴³ “Kita udah ninga pasal jako ti udah disebut, ‘Rindu ka pangan kita, alu begedika munsuh kita.’ ⁴⁴ Tang Aku madah ngagai kita: rindu ka munsuh kita, alu besampi ka urang ke merinsa ka kita, ⁴⁵ ngambi ka kita nyadi anak Apai kita ti di surga, laban Iya ngasuh mata panas mancar ngagai urang ke jai enggau ngagai urang ke manah, alu ngasoh hari ujan ke urang ke lurus enggau ke urang ke jai. ⁴⁶ Enti kita semina rindu ka urang ke rindu ka kita, nama upah kita? Endah sida pengumpul cukai deh nemu ngereja nya. ⁴⁷ Alu enti kita semina nabe pangan kita, baka ni ko nya tao lebih ari utai ti dikereja urang bansa bukai? Endah urang bansa bukai deh nemu ngereja nya. ⁴⁸ Nya alai kita nda tao nda nyadi pemado badas, baka Apai kita ti di surga.