¹ Udah nya Roh Kudus alu mai Yesus ngagai menua puang, ngambi ka Iya diuji Sitan. ² Leboh Iya udah bepuasa empat puluh hari empat puluh malam, ³ Iya lapar. Penguji datai alu bejako ngagai Iya, “Enti Nuan amat Anak Allah Taala, asoh batu to nyadi roti.” ⁴ Tang ko Yesus nyaut, “Endang udah dituleh, ‘Mensia enda ulih idup makai roti aja, tang beridup ba genap leka jako ti pansut ari mulut Allah Taala.’ ” ⁵ Udah nya Sitan mai Yesus ngagai Yerusalem, nengri ti kudus, ngengkah ka Iya ba langit perabung Rumah Sembayang, ⁶ alu bejako ngagai Iya, “Enti Nuan amat Anak Allah Taala, terejun Nuan ari to, laban udah dituleh, ‘Allah Taala deka ngasoh bala melikat Iya nyaga Nuan. Sida deka nyambut Nuan ngena jari sida, ngambika kaki Nuan enda terempas ba batu.’ ” ⁷ Ko Yesus bejako ngagai Sitan, “Munyi ti udah dituleh, ‘Anang nguji Tuhan Allah Taala nuan.’ ” ⁸ Sitan alu mai Yesus ngagai bukit sigi ti tinggi, alu mandangka ngagai Iya semua perintah di dunya to, enggau semua pengaya sida, ⁹ alu bejako ngagai Iya, “Semua utai to deka diberi aku ngagai Nuan, enti Nuan deka belutut alu nyembah aku.” ¹⁰ Yesus alu bejako ngagai iya, “Rari nuan Sitan! Laban endang udah dituleh, ‘Sembah Tuhan Allah Taala nuan, alu betuai ka Iya siko aja!’ ” ¹¹ Udah nya Sitan ninggal ka Iya, alu bala malaikat datai alu ngelayan Iya. ¹² Lebuh Yesus ninga Yohanes udah kena tangkap, Iya alu mupuk ngagai menua Galilea. ¹³ Iya ninggalka Nazaret, alu diau di Kapernaum, sebuah nengeri ti ngimbai Danau Galilea, di menua Zebulon enggau Naftali. ¹⁴ To ngamatka jako ti udah disebut nabi Yesaya, ¹⁵ “Menua Zebulon enggau menua Naftali, ti tunga ngagai tasik, di seberai Sungai Yordan, Galilea, menua urang bansa bukai! ¹⁶ Urang ke diau alam petang udah meda penampak ti besai. Penampak udah mancar ngagai sida ke diau di menua bayang-bayang pemati.” ¹⁷ Kenyau ari nya Yesus alu belaboh madahka pesau to: “Nesal ati ke dosa kita, laban Perintah surga nyau damping!” ¹⁸ Lebuh Yesus bejalai ba tebing Danau Galilea, Iya tepedaka dua iko urang diri menyadi, Simon ke dikumbai Petrus, enggau menyadi iya Andreas, benung nyala, laban seduai iya urang berikan. ¹⁹ Ko Yesus bejako ngagai seduai iya, “Titihka Aku. Aku deka ngajar seduai jalai ngulihka mensia.” ²⁰ Tekala nya seduai iya alu ninggalka jala seduai, alu nitihka Yesus. ²¹ Lebuh Iya mupuk ari endor nya, Iya tepedaka dua iko agi urang diri menyadi, Yakobus seduai Yohanes, anak Zebedeus, alam perau sama enggau apai seduai iya Zebedeus, benung nyeruri jala sida. Yesus alu ngangauka seduai iya. ²² Tekala nya seduai iya alu ninggal ka perau enggau apai seduai iya, alu nitih ka Yesus. ²³ Yesus alu bejalai di serata menua Galilea, ngajar alam sinagoge-sinagoge, alu nusi Berita Badas pasal Perintah Allah Taala, sereta ngeraika urang ke kena laban semua macam penyakit enggau pemedih. ²⁴ Nya alai berita pasal Iya nyelekai di serata menua Siria, alu urang mai ngagai Iya semua urang ke sakit, ke merinsa laban semua macam penyakit enggau pemedih, urang ke dirasuk antu, ke sakit gila-babi, urang ke sakit bajung, alu Iya ngeraika semua sida. ²⁵ Mayuh amat urang nitihka Iya ari menua Galilea enggau ari Sepuluh Buah Nengri, ari Yerusalem, ari Yudea, enggau ari menua ti di seberai Sungai Yordan.