¹ Leboh Yesus udah nyebut semua utai nya, Iya alu bejako ngagai sida murid Iya, ² “Kita nemu, hari Paskah deka belaboh dua hari da age, alu Anak Mensia deka di serah ka ngambi ka Iya disalib.” ³ Sida tuai imam enggau sida tuai bansa alu baum dalam istana imam besai ke benama Kayafas, ⁴ sida bekira ka jalai nangkap Yesus ngena cara belalai, alu munuh Iya. ⁵ Tang ko sida, “Ukai leboh maya hari raya, enggai ke urang begau.” ⁶ Nyadi leboh Yesus di Betania, ba rumah Simon ke udah sakit Kusta, ⁷ siko indu datai ngagai Iya mai sebutul minyak wangi ti berega, alu nuang minyak wangi nya ba pala Yesus, leboh Yesus benung makai. ⁸ Tang leboh sida murid meda nya, sida pedih ati, alu bejako, “Nama kebuah ngayah ka minyak wangi nya baka nya? ⁹ Minyak nya tao di jual ngena rega ti berega, alu duit nya diberi ngagai urang ke mesekin!” ¹⁰ Tang Yesus nemu utai ti di sebut sida, alu bejako ngagai sida, “Nama kebuah kita ngacau indu to? Iya udah ngereja utai ti badas ke Aku. ¹¹ Laban kita deka seruran bise urang ke mesekin begulai enggau kita, tang Aku enda seruran begulai enggau kita. ¹² Leboh iya nuang minyak wangi nya ba tubuh Aku, iya nyendia ka Aku di kubur. ¹³ Enggau bendar Aku madah ngagai kita, di semua endur alai Berita Badas to di tusi di serata dunya, utai ti udah di kereja iya deka di tusi, kena ngingat ka iya.” ¹⁴ Udah nya siko ari sida ke dua belas murid, ke benama Yudas Iskariot, mansang ngagai sida tuai imam ¹⁵ alu bejako, “Nama utai ti deka diberi kita ngagai aku enti aku nyerah ka Yesus ngagai kita?” Sida alu meri iya tiga puluh singkap duit pirak. ¹⁶ Berengkah ari nya Yudas belaboh begiga ka peluang kena nyerah ka Yesus ngagai sida. ¹⁷ Nyadi ba hari ti keterubah ke hari Roti Ti Enda Beragi, sida murid datai ngagai Yesus, alu bejako, “Dini endur alai Nuan deka ngasoh kami nyendia ka pemakai hari Paska ke Nuan?” ¹⁸ Ko Yesus nyaut, “Mansang kita ngagai urang siko di nengri, alu sebut ngagai iya: ‘Ko Giru, Maya Aku nyau damping. Aku enggau bala murid Aku deka ngintu hari Paska ba rumah nuan.’ ” ¹⁹ Sida murid alu ngereja niteh ka asoh Yesus alu nyendia nyiap ka pemakai hari Paska. ²⁰ Leboh hari nyau lemai, Iya duduk enggau sida murid dua belas iko. ²¹ Leboh sida benung makai, Yesus bejako, “Enggau bendar Aku madah ngagai kita, siko ari kita deka nyual Aku.” ²² Sida alu tusah amat ati, alu belaboh nanya Iya, udah siko-siko, “Ukai aku ti ko Nuan, Tuhan?” ²³ Disaut Iya, “Urang ke nepu ka roti ke dalam jalung beretai enggau Aku, nya meh urang ke deka nyual Aku. ²⁴ Anak Mensia endang deka mati munyi ti di tuleh dalam Kitab suci , tang naka meh penusah urang ke nyual Anak Mensia! Badas age enti iya enda adai!” ²⁵ Yudas, ke nyual Iya, alu bejako, “Ukai aku ti ko Nuan, Guru?” Disaut Yesus, “Nuan empu udah madah ka diri.” ²⁶ Leboh sida benung makai, Yesus ngambi roti, merekat alu mecah ka roti nya, nyua ka roti nya ngagai sida murid Iya, alu bejako, “Ambi meh, empa meh; to tubuh Aku.” ²⁷ Udah nya Iya ngambi cawan, alu leboh Iya udah meri terima kasih, Iya nyua ka cawan nya ngagai sida murid, ko Iya, “Irup to, semua kita, ²⁸ laban to darah Aku kena nanggam sempekat baru Allah Taala, ti di tuang ke urang mayoh ke pengampun dosa. ²⁹ Aku madah ngagai kita, Aku enda age ngirup anggur to datai ngagai maya Aku ngirup iya baru enggau kita dalam Perintah Apai Aku.” ³⁰ Leboh sida udah belagu site pantun, sida alu mupuk ngagai Bukit Zaitun. ³¹ Yesus alu madah ngagai sida, “Malam to semua kita deka rari magang ketegal Aku, laban endang udah di tuleh, ‘Aku deka munuh pengibun bedus, alu raban bedus deka pambar.’ ³² Tang leboh Aku udah di angkat ka idup baru, Aku deka mupuk dulu ari kita ngagai Galilea.” ³³ Petrus alu bejako ngagai Iya, “Enti sema semua urang rari ketegal Nuan, aku meh enda.” ³⁴ Ko Yesus bejako ngagai Petrus, “Enggau bendar Aku madah ngagai nuan: malam to, sebedau manuk mengkukuk, nuan udah besangkal ka Aku tiga kali.” ³⁵ Ko Petrus bejako ngagai Iya, “Enti sema aku mati enggau Nuan, enda meh aku besangkal ka Nuan!” Semua murid ti bukai bela bejako munyi nya magang. ³⁶ Udah nya Yesus mupuk enggau sida murid Iya ngagai endur site ti di kumbai Getsemani, alu ko Iya bejako ngagai sida, “Duduk dito. Aku deka kin alu besampi.” ³⁷ Iya alu mai enggau Iya Petrus enggau anak Zebedeus ke dua iko. Ati Iya balat tusah sereta sinu. ³⁸ Udah nya Iya bejako ngagai sida, “Ati Aku balat tusah, asai ke deka mati. Diau dito, alu bejaga enggau Aku.” ³⁹ Iya bejalai jauh mimit, nyungkur ka Diri ke tanah, alu besampi, “Apai, enti uleh, awak ka cawan to diambi ari Aku! Tang ukai niteh ka peneka Aku, tang niteh ka peneka Nuan.” ⁴⁰ Iya alu pulai baru ngagai sida murid, alu nemu sida tinduk, alu ko Iya bejako ngagai Petrus, “Kati kita enda uleh bejaga enggau Aku sejam? ⁴¹ Bejaga sereta besampi ngambi ka kita enda kena laban penguji. Roh amat deka, tang tubuh lemi.” ⁴² Iya mupuk baru kedua kali, alu besampi, “Apai, enti cawan to enda tao di ambi ari Aku, alu Aku enda tao enda ngirup iya, awak ka peneka Nuan nyadi.” ⁴³ Iya pulai baru, alu nemu sida murid tinduk, laban sida nyau kelalu deka tinduk. ⁴⁴ Nya alai Iya ninggal ka sida baru, mupuk, alu besampi ketiga kali, munyi ti dulu. ⁴⁵ Udah nya Iya pulai baru ngagai sida, alu bejako, “Kati kita age tinduk sereta belelak? Peda kita! Jam udah cukup, alu Anak Mensia deka di jual ngagai urang ke bedosa. ⁴⁶ Angkat, aram kitai mupuk. Peda kita, urang ke nyual Aku udah datai!” ⁴⁷ Leboh Yesus age benung bejako, Yudas datai, iya nya siko ari sida ke dua belas murid. Mayoh amat urang ke betangkin ka pedang enggau bebai ka pemalu datai enggau iya ari asoh sida tuai imam enggau sida tuai bansa. ⁴⁸ Nyadi urang ke nyual Iya udah meri siti tanda ngagai sida, ko iya, “Urang ke di sium aku, nya meh Iya. Tangkap Iya!” ⁴⁹ Yudas mansang ngagai Yesus, alu bejako, “Tabi, Guru,” alu nyium Iya. ⁵⁰ Ko Yesus bejako ngagai iya, “Unggal, kereja enggau jampat utai ti deka di kereja nuan. Sida mansang, megai Yesus, alu nangkap Iya. ⁵¹ Siko urang ke enggau Yesus alu tekala nya nyintak pedang iya, alu mantap kuli imam besai, mutus ka pending iya. ⁵² Yesus alu bejako ngagai iya, “Selit ka pedang nuan. Semua urang ke ngena pedang deka mati laban pedang. ⁵³ Kati kita ngumbai Aku enda uleh ngangau ka Apai Aku, alu Iya tekala nya ngirum ka lebih dua belas raban sedadu malaikat? ⁵⁴ Tang enti baka nya, baka ni ko Kitab Suci dikamat ka, ti madah ka utai to enda tao enda nyadi baka to?” ⁵⁵ Yesus alu bejako ngagai urang mayoh, “Kati Aku to perumpak nya ngasoh kita bebai ka pedang enggau pemalu mansang nangkap Aku? Tiap hari Aku duduk ngajar dalam Rumah Sembayang, alu kita enda nangkap Aku. ⁵⁶ Tang semua utai to nyadi kena ngamat ka jako ti udah di tuleh sida nabi dalam Kitab Suci.” Udah nya semua murid ninggal ka Iya, alu ngerari kediri. ⁵⁷ Udah nya urang ke nangkap Yesus alu mai Iya ngagai rumah imam besai Kayafas endur sida pengajar Adat enggau sida tuai bansa udah begempuru. ⁵⁸ Tang Petrus niteh ka Iya ari jauh, nyentuk ngagai tengah laman rumah imam besai. Iya tama alu nuduk ka diri enggau bala penyaga, deka ngelila ka semua utai ti nyadi. ⁵⁹ Nyadi sida tuai imam enggau semua raban Sanhedrin nguji ngiga saksi ti bula kena ngelaban Yesus, ngambi ka sida uleh munuh Iya, ⁶⁰ tang sida nadai tetemu ka saksi ke baka nya, taja pen mayoh urang mansang ke mua alu nyebut utai ti bula pasal Iya. Ke pengujung iya, dua iko urang mansang ke mua ⁶¹ alu bejako, “Urang to udah nyebut, ‘Aku uleh ngerubuh Rumah Sembayang Allah Taala, alu niri ka iya baru dalam tiga hari.’ ” ⁶² Imam besai bediri, alu bejako, “Kati Nuan enda nyaut nya? Nama utai ti disebut urang to ngelaban Nuan?” ⁶³ Tang Yesus mengkang enda bemunyi. Imam besai alu bejako baru ngagai Iya, “Dalam nama Allah Taala ti idup, aku ngasoh nuan madah ngagai kami enti Nuan to Mesias, Anak Allah Taala.” ⁶⁴ Ko Yesus bejako ngagai iya, “Nuan empu udah nyebut nya. Tang Aku madah ngagai kita, berengkah ari diato kita deka meda Anak Mensia duduk sepiak ari kanan Allah Taala ti Pemadu Bekuasa, alu datai atas remang ari surga!” ⁶⁵ Imam besai alu nyarik ka gari diri, alu bejako, “Iya udah bejako busung! Nama kebuah kitai beguna ka saksi bukai? Kita empu baru udah ninga Iya bejako busung! ⁶⁶ Baka ni ko penemu kita?” Sida pemimpin Yahudi alu nyaut, “Iya patut di bunuh.” ⁶⁷ Sida alu ngeludah mua Iya, alu mukot Iya. Lalu ko sekeda urang ke nampar Iya bejako, ⁶⁸ “Bernubuat meh ngagai kami Nuan, Mesias! Sapa ke nampar Nuan?” ⁶⁹ Nyadi Petrus duduk di luar, ba tengah laman. Siko indu ke nyadi kuli imam besai datai alu bejako ngagai Petrus, “Nuan to pen sama enggau Yesus urang Galilea.” ⁷⁰ Tang Petrus besangkal di mua semua bala sida, ko iya, “Nadai aku nemu utai ti ko nuan.” ⁷¹ Leboh Petrus pansut ngagai mua pintu penama, siko age kuli indu meda iya, alu bejako ngagai bala urang ke bediri damping dia, “Urang to udah enggau Yesus urang Nazaret.” ⁷² Petrus alu besangkal baru, “Aku besumpah, aku enda nemu urang nya!” ⁷³ Enda lama udah nya, sida lelaki ke bediri dia datai alu bejako ngagai Petrus, “Nuan to siko ari bala sida, ari cara nuan bejako!” ⁷⁴ Ko Petrus, “Aku besumpah, aku madah ka utai ti amat! Awak ka Allah Taala ngukum aku enti aku enda! Aku enda ngelala urang nya!” Tekala nya manuk alu mengkukuk. ⁷⁵ Petrus alu ingat ka utai ti udah dipadah ka Yesus ngagai iya: ‘Sebedau manuk mengkukuk, nuan deka udah besangkal ka Aku tiga kali.” Petrus pansut alu duie-duie nyabak.