¹ “Leboh maya nya ila, Perintah surga tao di banding ka enggau sepuluh iko indu dara, ke mai kelita mansang ngambat laki ke deka di nikah. ² Lima iko ari bala sida nya beli, alu lima iko pintar. ³ Leboh sida ke beli mai kelita sida, sida nadai mekal diri enggau minyak, ⁴ tang sida ke pintar mekal diri enggau minyak ke kelita sida. ⁵ Leboh lelaki ke deka di nikah nya laun datai, semua sida ngantuk alu tinduk. ⁶ Tang ba urung tengah malam, urang ngangau, ‘Dinga kita! To lelaki ke deka di nikah! Pansut kita alu ambat iya.’ ⁷ Indu dara ke sepuluh iko nya angkat alu nginsur sumbu kelita sida. ⁸ Sida ke beli alu bejako ngagai sida ke pintar, ‘Beri kami minyak, laban kelita kami nyau deka padam.’ ⁹ Tang ko sida ke pintar nyaut, ‘Enggai kami! Enggai ke minyak kami enda cukup di bagi enggau kita. Badas kita mansang ngagai kedai lalu meli minyak ke diri empu.’ ¹⁰ Leboh sida benong mansang meli minyak, lelaki ke deka di nikah pen datai. Indu ke endang udah sedia nya tama enggau laki nya ngagai pengerami nikah. Pintu alu di tutup. ¹¹ “Udah nya sida ti bukai datai, alu bejako, ‘Tuan, tuan! Buka pintu ke kami!’ ¹² Tang ko lelaki nya nyaut, ‘Enggau bendar aku madah ngagai kita, aku enda ngelala kita.’ ¹³ Nya alai bejaga kita, laban kita enda nemu hari tao ka jam.” ¹⁴ “Laban Perintah surga nya baka urang siko ke baru deka bejalai ngagai menua bukai. Iya ngangau ka bala urang gaji iya, alu ngasoh sida ngemata ka reta tengkira iya. ¹⁵ Ngagai siko iya nyerah ka lima ribu singkap duit emas, ngagai siko ti bukai dua ribu singkap, alu ngagai siko, seribu singkap, nitih ka pengelandik sida siko-siko. Udah nya iya mupuk. ¹⁶ Urang gaji ke nerima lima ribu singkap alu tekala nya bedagang ngena duit nya, alu buleh untung lima ribu singkap. ¹⁷ Baka nya mega urang gaji ke nerima dua ribu singkap. Iya buleh untung dua ribu singkap. ¹⁸ Tang urang gaji ke nerima seribu singkap mupuk, numbak lubang ba tanah alu ngelalai ka duit tuan iya dalam lubang tanah nya. ¹⁹ “Nyau kelama udah bekau nya, tuan sida datai, alu ngira gaji enggau sida. ²⁰ Lalu urang gaji ke nerima lima ribu singkap datai, mai lima ribu singkap nambah ka nya. Ko iya, ‘Tuan, nuan udah nyerah ka ngagai aku lima ribu singkap duit. To lima ribu singkap untung ti udah uleh aku.’ ²¹ Ko tuan iya bejako ngagai iya, ‘Badas pengawa nuan! Nuan to urang gaji ke badas sereta tetap ati. Nuan tao di karap ka ngemata ka utai ti mimit, nya alai aku deka ngasoh nuan ngemata ka utai ti mayoh. Tama ke dalam alu sama gaga ati enggau aku!’ ²² Udah nya urang gaji ke udah nerima dua ribu singkap duit datai, alu bejako, ‘Tuan, nuan udah nyerah ka ngagai aku dua ribu singkap duit. To dua ribu singkap untung ti uleh aku.’ ²³ Ko tuan iya bejako ngagai iya, ‘Badas pengawa nuan! Nuan to urang gaji ke badas sereta tetap ati! Nuan udah tao di karap ka ngemata ka utai ti mimit, nya alai aku deka ngasoh nuan ngemata ka mayoh utai. Tama ke dalam alu sama gaga ati enggau aku!’ ²⁴ Udah nya, urang gaji ke nerima seribu singkap datai alu bejako, ‘Tuan, aku nemu nuan endang urang ke terit, ngetau utai ti ukai di tanam nuan, alu ngumpul utai ti ukai di tabur ka nuan, ²⁵ nya alai aku takut, lalu ngelalai ka duit nuan dalam tanah. To duit nuan.’ ²⁶ Tang ko tuan iya nyaut iya, ‘Nuan to urang gaji ke jai sereta ngelusu! Nuan nemu aku ngetau utai ti ukai di tanam aku, alu ngumpul utai ti ukai di tabur ka aku, ²⁷ ukai enda? Enti nuan nemu nya, nuan patut udah beranak ka duit aku dalam bank, ngambi ka leboh aku datai, aku uleh nerima duit nya enggau bungai iya. ²⁸ Nya alai ambi duit nya ari iya, alu beri ngagai iya ke bisi sepuluh ribu singkap. ²⁹ Laban, genap iko urang ke bisi utai, deka diberi mayoh age, alu iya deka ngembuan mayoh age utai. Tang urang ke nadai utai, indah utai ti di kebisi iya deh deka di rampas ari iya. ³⁰ Lalu buai urang gaji ke nadai guna nya ke luar ngagai endur ti petang, endur iya deka nyabak sereta begerit ngeli.’" ³¹ “Leboh Anak Mensia datai dalam mulia Iya, alu semua malaikat datai enggau Iya, nya baru Iya deka duduk ba takhta Iya ti bemulia. ³² Semua bansa deka di gempuru ka di mua Iya, alu Iya deka nyerara ka sida ari pangan diri, baka pengibun bedus ke nyerara ka bedus ari kambing, ³³ alu Iya deka ngengkah ka urang ke lurus sepiak ari kanan Iya, alu sida ti bukai, sepiak ari kiba Iya. ³⁴ Udah nya Raja deka bejako ngagai urang ke sepiak ari kanan Iya, ‘Datai kito, kita ke udah di berekat ka Apai Aku, awak ka kita bempu Perintah ti udah di sedia ke kita kenyau ari penumbuh dunya, ³⁵ laban leboh Aku lapar, kita meri Aku makai. Leboh Aku aus, kita meri Aku ngirup. Leboh Aku nyadi urang kampar, kita ngelalu ka Aku ngagai rumah kita. ³⁶ Aku telanjai, alu kita meri Aku gari. Aku sakit, alu kita ngintu Aku. Aku ditutup dalam rumah jil, alu kita ngabas Aku.’ ³⁷ Udah nya sida ke lurus deka nyaut Iya, ‘Tuhan, kemaya kami meda Nuan lapar, alu meri Nuan makai, tao ka meda Nuan aus, alu meri Nuan ngirup? ³⁸ Lalu kemaya kami meda Nuan nyadi urang kampar, alu ngelalu ka Nuan ngagai rumah kami, tao ka meda Nuan telanjai, alu meri Nuan gari? ³⁹ Lalu kemaya kami meda Nuan sakit, tao ka meda Nuan dalam rumah jil, alu ngabas Nuan?’ ⁴⁰ Lalu Raja nya deka nyaut sida, ‘Enggau bendar Aku madah ngagai kita, leboh kita ngereja utai to ngagai siko ari menyadi Aku ti pemadu mit to, kita ngereja nya ngagai Aku!’ ⁴¹ “Udah nya Iya deka bejako ngagai sida ke sepiak ari kiba Iya, ‘Rari ari Aku, kita ke kena sumpah, ngagai api ti enda nemu padam, ti udah di sedia Allah Taala ke Sitan enggau ke bala malaikat iya! ⁴² Laban leboh Aku lapar, kita enda meri Aku makai. Leboh Aku aus, kita enda meri Aku ngirup. ⁴³ Aku urang kampar, tang kita enda ngelalu ka Aku ngagai rumah kita. Aku telanjai, tang kita enda meri Aku gari. Aku sakit enggau ditan dalam rumah jil, tang kita enda ngabas Aku.’ ⁴⁴ Udah nya sida deka nyaut Iya, ‘Tuhan, kemaya kami meda Nuan lapar tao ka aus, tao ka ngampar, tao ka telanjai, tao ka sakit, tao ka ditan dalam rumah jil, alu enda ngintu Nuan?’ ⁴⁵ Udah nya Iya deka nyaut sida, “Enggau bendar Aku madah ngagai kita, genap kali kita enda nulung siko ari sida ke pemadu mit to, kita enda nulung Aku.’ ⁴⁶ Lalu sida deka di ukum belama iya, tang sida ke lurus deka tama ngagai pengidup ti meruan belama iya.”