¹ “Laban Perintah surga nya baka urang siko ke mupuk tumu pagi-pagi ngiga urang ke tao digaji iya kerja ba kebun anggur iya. ² Leboh iya udah besetuju deka meri gaji sesingkap duit pirak sehari ngagai siko-siko sida, iya alu ngasoh sida bekereja ba kebun anggur iya. ³ Iya mupuk baru ke pasar ba urung pukul semilan pagi, alu tepeda ka sekeda urang ke laki beketegir ngapa enda kerja. ⁴ Iya alu bejako ngagai sida, ‘Alai kita kerja ba kebun anggur. Aku deka meri kita gaji ti patut.’ Sida lalu mupuk. ⁵ Iya ngereja baka nya baru ba urung pukul dua belas, enggau ba urung pukul tiga. ⁶ Ba urung pukul lima, iya bejalai ke pasar, alu tepeda ka sekeda sida ka laki ti bukai mengkang beketegir enda kerja. Lalu ko iya bejako ngagai sida, ‘Nama kebuah kita masau jam sehari-hari to enda kerja?’ ⁷ Sida alu nyaut, ‘Laban urang nadai ngasoh kami kerja.’ Ko iya bejako ngagai sida, ‘Alai kita gawa ba kebun anggur aku.’ ⁸ “Leboh hari nyau lemai, urang ke bempu kebun nya alu madah ngagai mandur, ‘Kangau ka bala urang gaji alu bayar gaji sida, belaboh ari sida ke pemadu dudi, nyentuk ngagai sida ke pemadu dulu.’ ⁹ Leboh urang gaji ke berengkah kerja ari pukul lima datai, sida alu dibayar siko-siko urang nerima sesingkap duit pirak. ¹⁰ Leboh urang ke pemadu dulu kerja datai, sida ngumbai diri deka nerima gaji ti besai agi. Tang sida mega diberi sesingkap duit pirak siku. ¹¹ Leboh sida nerima gaji nya, sida alu mut-mut ngagai urang ke ngaji sida. ¹² Ko sida, ‘Urang ke pemadu dudi semina bekereja sejam aja, alu nuan udah ngaga gaji sida sebaka enggau gaji kami ke udah bekereja sehari-hari to ngenat ka diri laban panas.’ ¹³ Tang ko iya ke bempu kebun nyaut sida, bejako ngagai siko ari sida dia ‘Unggal, nadai aku ngakal nuan. Ukai enda nuan empu ke besetuju ka gaji sesingap duit pirak? ¹⁴ Ambi gaji nuan, alu pulai. Aku empu ke meri gaji ngagai urang ke pemadu dudi to ngenyampau ti diberi aku ngagai nuan. ¹⁵ Kati aku enda tao ngena duit aku sepeneka ati aku? Tauka nuan kepapas meda aku gerah mudah meri utai ngagai urang?’ ¹⁶ Nya alai, urang ke dudi deka nyadi dulu, alu urang ke dulu deka nyadi dudi.” ¹⁷ Leboh Yesus mansang ngagai Yerusalem, Iya mai murid ke dua belas iko ke tisi leboh sida benung di rantau jalai, Iya alu bejako ngagai sida, ¹⁸ “Dinga kita, kitai deka mupuk ngagai Yerusalem, alu Anak Mensia deka diserah ka ngagai bala tuai imam, enggau ngagai bala pengajar Adat, alu sida deka ngasoh Iya diukum bunuh. ¹⁹ Sida deka nyerah ka Iya ngagai urang bansa bukai, ti deka beduan Iya, nyipat Iya, alu nyalib ka Iya. Tang ba hari ti ketiga Iya deka diangkat ka idup baru.” ²⁰ Udah nya bini Zebedeus datai ngagai Yesus, mai anak lelaki iya ke dua iko. Iya besugang di mua Yesus, alu minta Iya ngereja siti utai. ²¹ Yesus alu nanya iya, “Nama utai dipinta nuan?” Ko bini Zebedeus nyaut, “Awak ka anak aku dua iko to duduk siko ba sepiak kanan Nuan enggau siko ba sepiak kiba Nuan dalam Perintah Nuan.” ²² Tang ko Yesus nyaut iya, “Kita enda nemu utai ti di pinta kita. Kati kita uleh ngirup ari cawan ti deka di irup Aku?” Seduai iya alu nyaut, “Uleh.” ²³ Ko Yesus bejako ngagai seduai iya, “Seduai sige deka ngirup ari cawan Aku, tang pasal duduk sepiak ari kanan enggau ari kiba Aku, Aku nadai kuasa ngeletak nya. Penuduk nya udah disedia ka Apai Aku ke urang ke bempu kerusi nya.” ²⁴ Leboh murid ke sepuluh iko ninga nya, sida alu pedih ati ngagai seduai menyadi nya. ²⁵ Tang Yesus ngangau ka sida, alu bejako, “Kita nemu, urang ke merintah urang bansa bukai, nekan ka pengidup urang ke dipegai sida, alu bala tuai sida merinsa ka sida. ²⁶ “Tang ba kita utai nya enda baka nya. Barang sapa deka nyadi urang ke besai ba bala kita, enda tao enda nyadi pelayan semua kita, ²⁷ alu barang sapa deka nyadi dulu ba bala kita, enda tau enda nyadi kuli kita, ²⁸ sama baka Anak Mensia ke datai ukai minta Diri dibela, tang laban Iya deka mela, alu nyerah ka nyawa Diri kena nebus urang mayoh.” ²⁹ Leboh sida mupuk ari Yerikho, mayoh amat urang niteh ka Iya. ³⁰ Nyadi ba endur nya bisi dua iko urang buta duduk ba tisi jalai. Leboh seduai iya ninga Yesus mansa, seduai iya alu ngangau, “Kasih ka kami, Anak Daud!” ³¹ Bala urang mayoh alu balat amat ngerara seduai iya, ngasoh seduai iya badu agi capoh. Tang seduai iya ngangau nyareh age, “Tuhan, Anak Daud, kasih ka kami!” ³² Yesus ngetu, alu ngangau ka seduai iya. Ko Iya, “Nama utai ti diasoh seduai kereja Aku ke seduai?” ³³ Ko seduai iya bejako, “Tuhan, awak ka kami dua uleh meda!” ³⁴ Yesus sinu ati ke seduai iya. Iya negu mata seduai iya, alu tekala nya seduai iya uleh meda. Seduai iya alu niteh ka Yesus.