¹ Leboh Yesus udah badu nyebut semua utai nya, Iya mupuk ari menua Galilea alu bejalai ngagai menua Yudea, di seberai Sungai Yordan. ² Mayoh amat urang nitih ka Iya, alu Iya ngerai ka sida dia. ³ Sekeda urang Farisi alu datai ngagai Iya, deka nguji Iya. Ko sida, “Kati laki tao muai bini enggau bemacam alasan?” ⁴ Disaut Yesus, “Kati kita nadai udah kala maca pasal Allah Taala ti ngaga mensia lelaki enggau indu kenyau ari pun kelia? ⁵ Ko Iya bejako, ‘Ketegal nya, lelaki deka ninggal ka apai enggau indai iya, alu begulai enggau bini iya, alu seduai iya deka nyadi setubuh’? ⁶ Seduai iya ukai dua iko age, tang siko. Nya alai, nadai urang tao nyerara ka utai ti udah ditampil ka Allah Taala.” ⁷ Ko urang Farisi nanya Iya, “Enti pia, nama kebuah Musa ngasoh laki meri surat sarak alu muru bini diri?” ⁸ Disaut Yesus, “Musa ngemendar ka kita muai bini kita, laban ati kita kieh. Tang utai to ukai baka nya kenyau ari pun. ⁹ Nya alai, Aku madah ngagai kita, barang sapa muai bini, kelimpah ari bini iya butang, alu urang nya bebini baru, iya butang.” ¹⁰ Ko sida murid bejako enggau Iya, “Enti nya adat entara laki enggau bini, badas age enda bebini.” ¹¹ Tang ko Yesus bejako ngagai sida, “Ukai semua urang uleh nerima ajar to, tang semina urang ke diberi ajar to. ¹² Laban sekeda urang adai nadai perengka tubuh kena bebini. Bisi mega urang nadai perengka nya ari asoh mensia. Bisi mega urang ke sengaja muai perengka tubuh diri ketegal Perintah surga. Awak ka urang ke uleh nerima ajar to, nerima iya.” ¹³ Anak mit alu dibai ngagai Iya, ngambi ka Iya ngengkah ka jari Iya atas sida, alu besampi ka sida. Tang murid Iya balat amat ngerara urang ke mai sida anak mit nya. ¹⁴ Tang ko Yesus bejako, “Awak ka anak mit datai ngagai Aku, alu anang nagang sida, laban Perintah surga diempu urang ke baka sida to.” ¹⁵ Iya alu ngengkah ka jari Iya atas sida, Iya alu mupuk ari endur nya. ¹⁶ Nyadi sekali, siko urang datai ngagai Yesus, alu nanya, “Guru, nama pengawa ti badas ti enda tao enda di kereja aku ngambi ka aku tao buleh pengidup ti meruan belama iya?” ¹⁷ Ko Yesus bejako ngagai iya, “Nama kebuah nuan nanya ka utai ti badas ngagai Aku? semina siko aja ti badas. Enti nuan keran deka tama ngagai pengidup ti meruan belama iya, titih ka pesan.” ¹⁸ Urang nya alu nanya Iya, “Pesan iya ka ni?” Disaut Yesus, “Anang munuh urang. Anang butang. Anang ngencuri. Anang besaksi bula. ¹⁹ Bebasa ka apai enggau indai nuan, alu rindu ka pangan nuan baka nuan ti rindu ka diri empu.” ²⁰ Ko urang bujang nya nyaut, “Semua pesan nya udah dititeh ka Aku magang. Nama utai bukai ti enda tao enda dikereja aku?” ²¹ Ko Yesus bejako ngagai iya, “Enti nuan deka nyadi pemadu badas, mupuk nuan alu jual semua reta tengkira nuan, alu beri duit nya ngagai urang ke miskin, alu nuan deka bisi pengaya di surga. Udah nya datai alu titeh ka Aku.” ²² Leboh urang bujang nya ninga nya, iya angkat ari endur nya tusah ati laban iya urang ke kaya amat. ²³ Yesus alu bejako enggau sida murid Iya, “Enggau bendar Aku madah ngagai kita, mar amat meh urang ke kaya tama ngagai Perintah surga. ²⁴ Aku nando nya baru: nyamai agi jelu unta tama nengah lubang jarum ari urang ke kaya tama ngagai Perintah Allah Taala.” ²⁵ Leboh sida murid ninga nya, sida alit ati, alu nanya, “Enti pia, sapa uleh diselamat ka?” ²⁶ Yesus merening ngagai sida, alu bejako, “Ba mensia, utai to enda uleh, tang ba Allah Taala semua utai uleh magang.” ²⁷ Petrus alu bejako, “Peda Nuan, kami udah ninggal ka semua utai alu niteh ka Nuan. Nama utai uleh kami?” ²⁸ Ko Yesus bejako ngagai sida, “Enggau bendar Aku madah ngagai kita, leboh Anak Mensia duduk ba kerusi diraja Iya ti dimulia ba dunya ti baru, kita ke udah niteh ka Aku deka mega duduk ba dua belas ite kerusi diraja, ngakim dua belas raban bansa urang Israel. ²⁹ Lalu genap iko urang ke udah ninggal ka rumah, tauka menyadi lelaki, tauka menyadi indu, tauka apai, tauka indai, tauka anak, tauka umai, ketegal nama Aku, deka nerima seratus kali mayoh age, alu deka diberi pengidup ti meruan belama iya. ³⁰ Tang mayoh urang ke dulu deka nyadi dudi, alu urang ke dudi deka nyadi dulu.