¹ Nyadi sekali lebuh Jesus bejalai nengah umai gandum kena hari Sabat, sida murid Iya ngambi tangkai gandum, ngusuk lalu makai leka gandum nya. ² Tang ku sekeda orang Parisi, “Nama kebuah kita ngereja utai ti enda disagi lebuh hari Sabat?” ³ Jesus lalu nyaut, “Kati kita nadai udah kala maca pasal utai ka dikereja Daud lebuh iya enggau bala iya lapar? ⁴ Iya tama ngagai rumah Allah Taala, ngambi lalu makai roti ka udah dienjuk ngagai Allah Taala, roti ti enda tau diempa mensia, kelimpah ari sida imam, lalu meri roti nya ngagai bala iya?” ⁵ Iya lalu bejaku ngagai sida, “Anak Mensia Tuhan ke hari Sabat.” ⁶ Nyadi sekali lebuh hari Sabat ka bukai, Iya tama ngagai balai gempuru, lalu ngajar, lalu siku lelaki ke mati jari kanan, bisi dia. ⁷ Sida pengajar Adat enggau orang Parisi lalu nengkilaka Jesus, deka meda enti Iya deka ngeraika orang nya lebuh hari Sabat tauka enda, ngambika sida ulih besalahka Iya. ⁸ Taja pen nemu runding sida, tang Iya bejaku ngagai orang ke mati jari nya, “Datai kitu, lalu bediri ditu.” Orang nya angkat, lalu bediri. ⁹ Jesus lalu bejaku ngagai sida, “Aku nanya ngagai kita: Kati kitai tau ngereja utai ti manah tauka ngemedis lebuh hari Sabat, ngidupka nyawa, tauka munuh?” ¹⁰ Lebuh Iya udah merening ngagai semua sida, Iya lalu bejaku ngagai orang ke mati jari nya, “Unjurka jari nuan.” Orang nya lalu ngunjurka jari iya, lalu jari iya gerai. ¹¹ Tang sida balat pedis ati, lalu berandau enggau pangan diri pasal utai ti deka dikereja sida ngagai Jesus. ¹² Lebuh maya nya, Iya niki ngagai bukit sigi, deka besampi, lalu Iya besampi semalam-malam nya ngagai Allah Taala. ¹³ Ba urung rerak tawas, Iya ngangauka sida murid Iya, lalu milih dua belas iku ari bala sida, lalu Iya ngumbai sida nya rasul: ¹⁴ Simon (ke digelar Iya Petrus) enggau menyadi iya Andreas; Jakubus seduai Johanes, Philip enggau Bartolomeus, ¹⁵ Matius seduai Thomas, Jakubus anak Alpius, enggau Simon (ke digelar Bujang Berani), ¹⁶ Judas anak James, enggau Judas Iskariot, ke nyual Iya. ¹⁷ Iya lalu nurun ari bukit nya enggau sida, lalu bediri ba tanah ka rata, sama enggau mayuh sida murid Iya, sereta enggau mayuh amat orang ari semua menua Judea, Jerusalem, enggau ari Tire enggau ari Sidon ka ba tebing tasik. ¹⁸ Sida udah datai deka mendingka Iya, sereta minta diri digeraika ari penyakit. Lalu orang ke dikeduan antu digeraika. ¹⁹ Semua orang dalam bala mayuh nya nguji negu Iya, laban kuasa pansut ari Iya lalu ngeraika semua sida. ²⁰ Iya lalu merening ngagai sida murid Iya, lalu bejaku, “Beberekat meh kita ke seranta, laban kita deka bempu Perintah Allah Taala! ²¹ “Beberekat meh kita ke lapar diatu, laban kita deka dikenyangka! “Beberekat meh kita ke nyabak diatu, laban kita deka ketawa! ²² Beberekat meh kita lebuh orang begedika kita, lebuh sida nulak kita, ngeleseka kita, lalu bejai kita ketegal Anak Mensia! ²³ Rami gaga ati meh kita lebuh hari nya, lalu merejuk gaga ati, laban upah ti besai disedia ke kita di serega. Laban nya meh utai ka udah dikereja aki ini sida kelia ngagai sida nabi. ²⁴ Tang tulah meh kita ke kaya; laban kita udah nyamai diau! “Tulah meh kita ke ²⁵ kenyang diatu, laban kita deka lapar! “Tulah meh kita ke ketawa diatu, laban kita deka ngulit sereta nyabak! ²⁶ Tulah meh kita lebuh semua orang muji kita, laban nya utai ka udah dikereja aki ini sida ngagai sida nabi ti palsu. ²⁷ Tang Aku madah ngagai kita ke mending: Rinduka munsuh kita. Kereja utai ka manah ngagai orang ke begedika kita. ²⁸ Berekatka orang ke nyumpah kita, besampika orang ke merinsaka kita. ²⁹ Enti orang nampar kuyu kita sepiak, awakka iya mega nampar kuyu kita sepiak. Enti orang ngambi kelambi kita, awakka iya mega ngambi baju kita. ³⁰ Beri ngagai semua orang ke minta utai ari kita, lalu lebuh orang ngambi utai kita, anang minta utai nya dipulaika baru. ³¹ Kereja ngagai orang baka ke dikedekaka kita kereja sida ngagai kita. ³² “Enti kita rinduka orang ke rinduka kita, baka ni ku nya tau nyadika berekat kita? Indah orang ke bedosa deh nemu rinduka orang ke rinduka sida! ³³ Lalu enti kita manah enggau orang ke manah enggau kita, baka ni ku nya tau nyadika berekat kita? Indah orang ke bedosa deh nemu ngereja nya! ³⁴ Enti kita nyali utai semina ngagai orang ke dikarapka ulih mulaika utai nya ngagai kita, baka ni ku nya tau nyadika berekat kita? Indah orang ke bedosa deh nemu nyali utai ngagai pangan diri, lalu ngarapka diri ulih nerima utai nya pulai baru! ³⁵ Tang rinduka munsuh kita, lalu kereja utai ka manah ngagai sida. Jali utai ngagai orang, lalu anang ngarapka diri nerima bayar. Nya baru upah kita besai, lalu kita deka nyadi anak Allah Taala ka Pemadu Tinggi; laban Iya manah enggau orang ke enda nemu beterima kasih, sereta enggau orang ke jai. ³⁶ Kasihka orang, baka Apai kita ka kasih. ³⁷ Anang ngakim, nya baru kita enda diakim. Anang ngukum, nya baru kita enda diukum. Ampun, nya baru kita diampun. ³⁸ Beri, lalu kita deka diberi. Takar ti cukup, ka dienyak, digusak, ka meruap lalu lilih, deka diberi ngagai kita; laban takar ka dikena kita nakar deka dikena nakar utai ke kita.” ³⁹ Jesus mega madahka sempama tu ngagai sida: “Kati orang ke buta ulih ngiring orang ke buta? Enda ka seduai iya deka sama labuh ngagai lubang kebung? ⁴⁰ Murid endang nadai kala lebih ari pengajar iya; tang semua murid, lebuh sida udah tembu belatih, deka nyadi sebaka enggau pengajar sida. ⁴¹ Nama kebuah kita betilikka empeleman ba mata pangan kita, tang enda tepedaka lumpung kayu ka ba mata kita empu? ⁴² Tauka, baka ni ku kita nyebut ngagai menyadi kita, ‘Menyadi, awakka aku muai empeleman ari mata nuan,’ tang kita enda meda lumpung kayu ti ba mata kita empu? Kita tu orang ke pura-pura ngapa! Buai dulu lumpung kayu ari mata kita empu, nya baru mata kita lansik lalu kita ulih muai empeleman ari mata menyadi kita. ⁴³ Kayu ka manah enda mansutka buah ka jai. Lalu kayu ka jai enda mansutka buah ka manah. ⁴⁴ Laban genap batang kayu dikelala ari buah iya. Buah ara ukai diambi ari unak, lalu buah anggur ukai diambi ari madang emperingat. ⁴⁵ Orang ke manah mansutka utai ka manah ari ati iya, lalu orang ke jai mansutka utai ka jai ari ati iya. Laban iya nyebut utai ka ngemenuhka ati iya. ⁴⁶ Nama kebuah kita ngumbai Aku, ‘Tuhan, Tuhan,’ tang enda ngereja utai ti diasuh Aku? ⁴⁷ Aku deka madah ngagai kita gaya orang ke datai ngagai Aku, ke mending lalu ngasika jaku Aku. ⁴⁸ Iya baka orang siku ke ngaga rumah. Iya numbak lubang ti dalam lalu nudukka pugu rumah iya ba atas batu. Sungai bah ngampuhka tebing, lalu mangka ngagai rumah nya, tang enda ulih nguyat rumah nya, laban rumah nya udah tegap digaga. ⁴⁹ 49Tang orang ke ninga tang enda ngasika jaku Aku, nya baka orang siku ke ngaga rumah ka nadai batu pemun. Lebuh ai bah mangka ngagai rumah nya, rumah nya tumbang tekala nya. Balat amat rumah nya rusak!”