¹ Nyadi sekali, lebuh Jesus bediri ba tebing Danau Genesaret, mayuh amat orang mansang ngagai Iya, deka mendingka jaku Allah Taala. ² Iya tepedaka dua buah perau ba tebing danau nya, tang orang berikan udah ninggalka perau nya, benung masu jala sida. ³ Iya lalu nepan sebuah ari perau nya ke diempu Simon, lalu ngasuh Simon ngejangka perau nya jauh mimit ari tebing. Iya duduk, lalu ngajar orang mayuh ari perau nya. ⁴ Lebuh Iya udah tembu bejaku ngagai sida, Iya lalu bejaku ngagai Simon, “Kejangka perau tu ngagai ai ka dalam, lalu ulurka pukat nuan ngambika bulih ikan.” ⁵ Simon lalu nyaut, “Pengajar, kami udah bebendar gawa semalam-malam tu, tang nadai bulih utai. Tang laban Nuan ngasuh, aku deka ngulurka pukat.” ⁶ Lebuh sida udah ngulurka pukat sida, sida bulih mayuh amat ikan, datai ke pukat sida nyau ka carik. ⁷ Nya alai sida ngepai ngagai pangan sida ke ba perau sebuah, minta sida datai nulung sida. Sida datai lalu ngisi dua buah perau nya enggau ikan, datai ke perau nya nyau deka karam. ⁸ Tang lebuh Simon Petrus meda nya, iya lalu nyungkurka diri ngagai patung Jesus, ku iya, “Rari ari aku, Tuhan, laban aku tu orang ke bedosa!” ⁹ Laban iya enggau semua orang ke enggau iya balat alit ati ke pemayuh ikan ka ulih sida, ¹⁰ lalu baka nya mega James seduai John, anak Sebedi, ke sama bekunsi berikan enggau Simon. Jesus lalu bejaku ngagai Simon, “Anang takut. Berengkah ari diatu nuan deka ngulihka mensia.” ¹¹ Lebuh sida udah narit perau dua buah nya ke tebing, sida ninggalka semua utai, lalu nitihka Iya. ¹² Nyadi sekali lebuh Jesus dalam sebuah nengeri, siku lelaki ke sakit lan datai. Lebuh iya meda Jesus, iya nyungkurka diri, minta Jesus nulung iya, “Tuhan, enti Nuan deka, Nuan ulih ngaga aku nyadi tuhi!” ¹³ Jesus lalu ngunjurka jari Iya, negu orang nya, lalu bejaku, “Aku deka! Tuci meh nuan!” Tekala nya penyakit lan nya lalu nadai agi ba orang nya. ¹⁴ Jesus lalu enda nyagi iya madahka nya ngagai orang. Ku Iya, “Mansang ngagai imam, ngambika imam nya meresa nuan, lalu beri piring ka diasuh Musa, nyadika saksi di mua orang mayuh nuan udah gerai.” ¹⁵ Tang berita pasal Jesus majak balat agi ngelekai, lalu mayuh amat orang datai ningaka Iya, sereta digeraika ari penyakit sida. ¹⁶ Tang Iya mupuk ngagai endur ti sunyi, lalu besampi. ¹⁷ Nyadi sekali, lebuh Iya benung ngajar, orang Parisi enggau pengajar adat bisi duduk semak nya dia. Sida nya datai ari semua genturung pendiau di menua Galili enggau menua Judea, enggau ari Jerusalem. Lalu kuasa Tuhan bisi enggau Iya kena Iya ngeraika orang. ¹⁸ Lebuh maya nya sekeda orang datai mai siku orang ke sakit bajung atas peninduk iya. Sida nguji mai iya tama ngagai rumah nya deka ngengkahka iya di mua Jesus. ¹⁹ Tang lebuh sida nadai nemu jalai mai iya tama, laban orang kelalu mayuh, sida lalu mai iya ngagai perabung, lalu ngulurka iya ngena peninduk iya nengah lubang ba perabung nya ngagai tengah-tengah bala mayuh, di mua Jesus. ²⁰ Lebuh Iya meda pengarap sida, Iya lalu bejaku, “Unggal, dosa nuan diampun.” ²¹ Sida pengajar adat enggau orang Parisi lalu belabuh betanya ngagai pangan diri, “Sapa orang tu ke bejaku busung baka tu? Sapa ulih ngampun dosa, kelimpah ari Allah Taala?” ²² Lebuh Jesus nemu runding sida, Iya lalu nyaut sida, “Nama kebuah kita betanya munyi nya dalam ati kita? ²³ Ni ka nyamai agi disebut, ‘Dosa nuan diampun,’ tauka ‘Bediri, lalu bejalai’? ²⁴ Tang ngambika kita nemu Anak Mensia bisi kuasa di dunya tu ngampun dosa,” -- Iya lalu bejaku ngagai orang ke sakit bajung nya -- “Aku bejaku ngagai nuan: bediri nuan. Bai peninduk nuan, lalu pulai!” ²⁵ Tekala nya orang nya lalu bediri di mua sida, ngambi peninduk ka udah alai iya gali, lalu pulai ke rumah, ngemuliaka Allah Taala. ²⁶ Semua sida bela alit ati, lalu sida ngemulia sereta nangika Allah Taala. Ku sida, “Kitai udah meda utai ti nyelai sehari tu!” ²⁷ Udah bekau nya, Jesus pansut lalu tepedaka siku pengumpul cukai, ke benama Lewi, duduk dalam opis alai ngumpul cukai. Jesus lalu bejaku ngagai iya, “Titihka Aku.” ²⁸ Lewi angkat, ninggalka semua utai, lalu nitihka Iya. ²⁹ Lewi lalu nyendiaka pengerami makai besai dalam rumah iya ke Jesus. Mayuh amat pengumpul cukai enggau orang bukai makai enggau sida. ³⁰ Orang Parisi enggau sida pengajar Adat lalu mut-mut ngagai murid Jesus. Ku sida, “Nama kebuah kita makai ngirup enggau pengumpul cukai, enggau orang ke bedosa?” ³¹ Jesus lalu nyaut, “Orang ke gerai enda begunaka lutur, tang semina orang ke sakit. ³² Aku datai, ukai deka ngangauka orang ke lurus, tang ngangauka orang ke bedosa ngasuh sida nesal ati.” ³³ Udah nya sida bejaku ngagai Jesus, “Sida murid John, baka murid orang Parisi, suah bepasa sereta besampi, tang murid Nuan makai ngirup.” ³⁴ Jesus lalu bejaku ngagai sida, “Kita enda ulih ngasuh bala pengabang ba gawai tikah bepasa lebuh lelaki ke ditikah agi enggau sida, ukai enda? ³⁵ Hari deka datai alai lelaki ke ditikah nya deka diambi ari sida. Nya baru sida bepasa.” ³⁶ Iya mega madahka siti sempama ngagai sida: “Nadai orang nyarikka cebik ari kain ka baru, lalu nampalka iya ngagai kain ka lama, enggai ke nyarikka kain ka baru, lalu cebik ka baru nya enda sebaka enggau kain ka lama. ³⁷ Lalu nadai mega orang nyimpan anggur ka baru dalam kambut ka lama, enggai ke anggur ka baru nya mecahka kambut nya, lalu anggur nya deka nyaya, lalu kambut nya rusak. ³⁸ anggur ti baru enda tau enda disimpan dalam kambut ka baru! ³⁹ Lalu nadai mega orang deka ngirup anggur ka baru lebuh iya udah ngirup wain ka lama, laban ku iya, ‘Iya ti lama nyamai agi.’ ”