¹ Te hoqare ariara tiha, Ne ruvaqumavi vaiha Kotiva nivata, ekaa vaiinti nahentivata kahaqiarire ti, vira aarehama virara koqeve tivaqi vuata. ² Avuhainaa vaintive, Kamaanira vaiintive, ekaa noraiqamavi vai vaiintikave, vikaravata irihama ne Kotira aaraivaro viva vika kahaqiarira. Ne mintiaqi viha Kotira aare vaivaro Kotiva vika kahaqira vika tinavuqaa koqemake raqiki vaiqe viraqaahai tenavu ho variariraro tinavu mutukavano paru iharo qihaamake vairaqe tirema vaiha Kotira kaiqa vareha koqe aaraqaaqai vuari. ³ Mitimake Kotira aare varia okarava koqe i vaivaro Kotiva virara quahe vairo. ⁴ Kotiva ekaa vaiinti nahentiara quqaa uva okara kankomake iriqi vuate tiro, viva vika kuvantu nimitaariravama vaivo. ⁵ Variqa vohaiqavanoqai vaivaro tavaaranahainaa vaiinti vohaiqavanoqai vaiharo, vaiinti nahenti Kotira vataake vohaa variate tiro, viva vika avutana vaira. Vi vaiintiva Ihu Karaitiva. ⁶ Viva ekaa vaiinti nahentiara kuvantu nimitaare tiro, qutuvira. Viva Kotiva tivato entaraqaa qutu viharo Kotiva vaiinti nahenti kuvantu kero ntitaaina okarara qovarama kaira. ⁷ Vi vakaakara vaiinti nahenti tiva nimiane tiro, ti noraiqama kero tititaimanta te ekaa vo vaatanaaka kia Iutaa vatanaaka vi vakaakara quqaave tivake iriqi vuate ti, vika tiva nimiqi vivaunara. Kia te una tiraiti, te quqaa uvama ti vauro. ⁸ Virara irihama ti hantuqavano mantimakero vairo. Ekaa vatukaini varia vaiintika vika kia arara itairamanta kia tiroriraiti, Kotira kaiqaqai vara amiteha, nai kauqu virini tuaherakeha Kotira aaramaqi vivara. ⁹ Te nahentiara tirera: Nahenti vika kia nai vaata hampi qohaama keha vairaiti, koqemake naavumateha variata. Kia vo qaraa vo qaramake qiata kauhi vuntaraiti, kia kori oriqohai aututaa haikarave, nora monu aquta hankaarorove, nora monu vaina utavaaqarave, varake nonkutaata. ¹⁰ Nahentivano te Kotira autu tuahere vauraukave tirera, viva koqe kaiqa vokaiqa vokaiqa vare vairava, vivama vira vahehema taina haikavama varianaro. ¹¹ Ne ruvaaqumavi vaimanta nahenti vika kia uva tiraiti, nai vara muntuvi vatainiqamake vaiha uva iriqi vuata. ¹² Kiama nahentivano himpiro vaiinti nahenti Kotira uva tiva nimiarira. ¹³ Kotiva Adaamura naane autukero vatero, vira naantiara Evaara autukero vataira. ¹⁴ Andaamuva Sataanira uvara kia quqaa uvave tivaro nahentivano Sataanira uvara quqaa uvave tivakero Kotira uva raqakaira. ¹⁵ Ho nahetivano Ihurara kempukaiqama kero iriqiro viharo, vorara vorara muntuka vateharo, Kotira kaiqa varaqiro viharo, kia nai autu tuahera karaitiro, variqiro viharo vainti vataqiro vi vairaro Kotiva vira kuvantu amitanaro.