¹ Te Poruka Kotiva tinavu kuvantu kero tivitaariravavata, Ihu Karaitiva tenavu vira tavaainarara veka variariravavata, vitanta tiamanta te noraiqamavi Karaitira uva vaiinti nahenti tiva nimi vauraukama vai. ² Te maa qarara ari Timotira ntuva amitauro. Are Ihu Karaitirara quqaave tianarara ti, te ariara ti maaquve tivaunara. Tinavu Qova Kotivavata, tinavu Noravano Ihu Karaitivavata, ari aaquriha amiteha koqema amite vaivaro ari muntukaqihairo paru i vairara variana. ³ Te Masedoniaini virera ihama ariara mpo Epasasini variane tunantemake, te qaiqaavata ariara miniqai variane, turo. Vo vaiitinavu mini vaiha hampi uva maara vaiinti nahenti tiva nimi variaka, are vinavukara qioqama kehara kia mintiate tiana. ⁴ Vika vuri uvaqai tivaqi viha nai naaqu taato kaivaqaukavara vika antu nuntuqai qiriqi viha viraqaahai tirorira uvaqai ovavaraiqamake variara. Are vikara kia minti tiate tiana. Vi uvava kiama Kotira kaiqa kahaqianaro.Vaiintivano Ihu Karaitirara kempukaiqaa kero iriqiro vi vaiva, vivama Kotira kaiqa kahaqi vairo. ⁵ Vaiinti nahenti nariara nariara muntuka vataate ti, te ariara vi vaiintinavuka qioqama kaane tunara. Vaiinti nahenti Karaitira uvara kia taara aato iriraiti, vira uva quqaiqamake iriqi viha, Kotira avuqa koqe kaiqaqai varaqi viha, Kotira uvaaqa koqe kaiqaqai varaqi vai okararaqaahai vika nariara nariara muntuka vataqi vivara. ⁶ Hini vaiintinavu vi okarara qaqirake qumina uvaqai tivaqi vi variara. ⁷ Vika tiha, Kaiqe tenavu Mosiraqaa tivatai uvara vaiinti nahenti tiva nimiare, tivakeha vika vi uvara kankomake iriaka voqaara vaiha, vika vi uvaravata, vo uva nai ti varia uvara okaravata, kia kankomake iri variaka variara. ⁸ Tenavu kankomake irunara: Mosiraqaa tivatai uvava vaireva, koqe uva vaivaro vaiintivano vi uvara naintarama kero iriqiro viharo kiama Kotira uva raqa kanaaro. ⁹ Tenavu vo uvavata kankomake irunara: Kotiva kia nai uva avuqavuqamake iri varia vaiinti nahentikara iriharo vi uvara Mosiraqaa tiva taraittiro, vira uva raqakeha qora kaiqa vare varia vainti nahentikara iriharo Kotiva vi uvara Mosiraqaa tiva taira. Vaiinti nahenti kia Kotirara iri variakave, qora kaiqa vare variakave, Kotira uva aqirake vataihainaa okarara iri variakave nai noka qoka aruke variakave, vora aruke variakave, ¹⁰ vaiinti nahenti hampi qivariakave, nai kana vaiinti vataake hampi ni variakave, vaiinti muara ravaqavukeha voka nimi variakave, una uva ti variakave, nai kauqu aiqiqaa aqukeha una uva ti variakave, quqaa uva tauvaqa utu amiteha hampi kaiqa, vo kaiqa vo kaiqa varaqi vi variakave, vikara iriharo Kotiva nai uva maara vataira. ¹¹ Quqaa uva vaireva Karaitira uvama vairo. Kotiva vaiinti nahenti koqema nimite vaiva, viva ti noraiqama kero vi uvarara, nai voqaraa uva vaiinti nahenti tiva nimiane timanta te tiva nimi vaunara. ¹² Ihu Karaitiva tinavu Noravano, vivama ti kempukaiqama timitero tiriara viva homa ti uva tiva nimiqiro vuanaro tivakero ti noraiqama kaimanta te vira kaiqa vare vaunarara ti, te virara koqema iaro ti vaunara. ¹³ Quqaama te haaru Karaittirara qora uva tiva amiteha vira vaiintinavu oraiqama nimitaqi viha vika ntaihamaqi vi vaunara vi entara te Karaitirara kia kankomake iriraiti, tenta hampi kaiqa vare vauna okararavata kia iri vaunararatiro, Kotiva ti aaqurihama timitaimanta te Karaitirara quqaa vivave tivaunara. ¹⁴ Tinavu Noravano Ihu Karaitiva voqamakero ti aaquriqama timitero koqema timitaimatanta, viraqaahai te virara kempukaiqaake iriqi viha virara muntuka vateha vaunara. ¹⁵ Maa uvara quqaa uva tivataara, vaiinti nahenti virara quqaa uvave tivakeha homa iriqi vivara: viva qora kaiqa vare varia vaiinti nahentika kuvantu nimitairaro Kotiva vika ntitaarire tiro, Ihu karaitiva vataini ntuvirave, Ike, qora kaiqa vare varia vaiinti nahentikaqihai te anomake voqavata qora kaiqa vare vauraukama vauro. ¹⁶ Te minti vaura vaiintika vauraro Ihuva Karaitiva vaiinti nahentiara paruma nimitaaina okarara tavaate tiro, viva ti naane aaqurima timittairara irihama, vaiinti nahenti aato kenko tira iri vimanta vika, tiha Ike, Karaitira Porura aaqurihama amitainantema kero, viva tinavuvata aaqurihama timitairaqe tenavuvata ekaa enta qaqi variqi vuare, tivara. ¹⁷ Ekaa enta qaqi variqiro vi vai Avuhainaava, kia qutuarira okaravavata viraqi vaiva, tenavu vira kia vo avuqohaivata tavaarirava vaiva, viva nai vohaiqavanoqai Variqavano vaira. Viva mintimakero vairara ti, kaiqenavu ekaa enta vaiha vira quahama amiteha vira autuqai tuaheraqi vuare. Quqaave turo. ¹⁸ Ti maaqu Timotio, haaru vo vaiintinavu ari tiva amiha Kotiva ariara mintima tivo ti uvara iriharama, te maa uvaravata ari tiva amirera: Are Kotira aaraqaa viharama qora kaiqa vare vaika ari aatarakevorave tivakehara koqe iqoka vainti voqaara variqira vihara, qora kaiqa vi aataraka aatarakamaqira vuane, turo. ¹⁹ Kotira aaraqaa vihara Karaitirara kempukaiqaamakera iriqira vihara koqe kaiqaqai vare vairaro kia ari toqaavu aruarire. Vokia vaiintika koqe aara qaqirake qora kaiqa vareha toqaavu aruainarara vika kia karaitirara iriqi vuava qoraiqama vi vaira. ²⁰ Himeneusivavata Arekisantavavata vitanta mintiake koqe aara qaqirake qora kaiqaqai varaqi vi variara. Vitanta kia Kotirara qora uva tivaqi vuate ti, te vitanta Sataanira kauquqi kaunara.